Congress-BJP | కేంద్రంలో పోరాటం.. రాష్ట్రంలో చెట్టపట్టాల్‌.. కాంగ్రెస్‌, బీజేపీ చీకటి స్నేహం?

అక్కడ కయ్యం, ఇక్కడ వియ్యం అన్నట్టుగా రెండు ప్రధాన జాతీయ పార్టీలు వ్యవహరిస్తున్నాయని తెలంగాణలో రోజువారీ పరిణామాలను గమనిస్తున్న పరిశీలకులు వ్యాఖ్యానిస్తున్నారు.

• రేవంత్‌ ప్రజావ్యతిరేక విధానాలపై బీజేపీ మౌనం
• రాష్ట్రంలో పరిణామాలపై పరిశీలకుల అభిప్రాయం

Congress-BJP | హైదరాబాద్‌, సెప్టెంబర్‌ 30 (నమస్తే తెలంగాణ): అక్కడ కయ్యం, ఇక్కడ వియ్యం అన్నట్టుగా రెండు ప్రధాన జాతీయ పార్టీలు వ్యవహరిస్తున్నాయని తెలంగాణలో రోజువారీ పరిణామాలను గమనిస్తున్న పరిశీలకులు వ్యాఖ్యానిస్తున్నారు. కేంద్రంలో బద్ధ విరోధులుగా ఉంటున్న కాంగ్రెస్‌, బీజేపీ రాష్ట్రంలో మాత్రం స్నేహ బంధాన్ని కొనసాగిస్తున్నట్టున్నాయని పేర్కొంటున్నారు. పది నెలల పాలనలో రేవంత్‌రెడ్డి ప్రభుత్వం అన్ని వర్గాల వ్యతిరేకతను మూటగట్టుకుంటున్నా బీజేపీ ఇంతవరకు స్పందించకపోవడం అనుమానాస్పదంగా ఉన్నదని అంటున్నారు.

హైడ్రాకు వికృతరూపమిచ్చి పేదల ఇండ్ల మీదికి వదలడంతో వందల కుటుంబాలు రోడ్డు పడుతున్నాయి. రూ 2 లక్షల రుణమాఫీ కోసం లక్షల మంది రైతులు గంపెడు ఆశతో ఎదురుచూస్తున్నారు. రైతు భరోసా అందక, అప్పు పుట్టక రైతన్నలు ఆత్మహత్యకు పాల్పడుతున్నారు. ఇంత జరుగుతున్నా బీజేపీ నాయకులు రేవంత్‌రెడ్డి ప్రభుత్వం మీద ఒక్క విమర్శ కూడా చేయకపోగా.. ఏ అధికారమూ లేని బీఆర్‌ఎస్‌ను, కేసీఆర్‌ను టార్గెట్‌ చేస్తూ విమర్శించటం పట్ల స్వయంగా ఆ పార్టీల శ్రేణులే విస్మయం వ్యక్తంచేస్తున్నాయి.

బంధానికి అనుమానాలెన్నో

అమృత్‌ స్కీం టెండర్లలో జరిగిన కుంభకోణాన్ని బహిర్గతం చేసిన బీఆర్‌ఎస్‌ పార్టీ వర్కింగ్‌ ప్రెసిడెంట్‌ కేటీఆర్‌ బాధ్యులను చట్టప్రకారం శిక్షించాలని డిమాండ్‌ చేశారు. దీనిపై కేంద్ర పట్టణాభివృద్ధి శాఖకు సైతం ఆయన ఆధారాలతో సహా లేఖ రాశారు. ఈ విషయంలో మొదట్లో కొంత హడావుడి చేసినట్టు కనిపించినా బీజేపీ ఎమ్మెల్యే మహేశ్వర్‌రెడ్డి ఆ తరువాత మౌనం దాల్చారు. ఇక హైదరాబాద్‌లో హైడ్రా ఆగడాలతో పేదలు గూడులేని పక్షలుగా మారిపోతున్నారు. దీనిపై సర్వత్రా విమర్శలు వ్యక్తమవుతున్నా బీజేపీ నేతలు మాత్రం స్పందించలేదు. చివరికి తాము ఎక్కడ వెనుకబడిపోతామోనన్నట్టు కేంద్ర మంత్రి బండి సంజయ్‌ సోమవారం స్పందించారు. చెరువులు, కుంటలను ఆక్రమించి సంపన్నులు నిర్మించిన భవనాలను హైడ్రా కూల్చివేస్తుందని భావించామని, కానీ పేద, మధ్య తరగతి ప్రజల ఇండ్లను కూల్చి వాళ్లకు నిలువ నీడలేకుండా చేస్తున్నదని విమర్శించారు.

• రేవంత్‌రెడ్డి ప్రభుత్వం ఆరు గ్యారెంటీలతో అధికారంలోకి వచ్చి 10 నెలలు గడిచిపోయింది. ఇప్పటివరకు మహిళలకు ఉచిత బస్సు మినహా ఏ గ్యారెంటీని అమలు చేయలేదు. ఉచిత బస్సుతో ఉపాధి కోల్పోయిన ఆటో డ్రైవర్లకు ప్రత్యామ్నాయం చూపలేదు. ఫలితంగా 9 మంది ఆటో డ్రైవర్లు ఆత్మహత్య చేస్తున్నారు. ప్రజాభవన్‌ సాక్షిగా ఒక ఆటోడ్రైవర్‌ తన ఆటోను తగులబెట్టి నిరసన వ్యక్తంచేశారు. ఈ పరిణామాలపై బీజేపీ పల్లెత్తు మాట మాట్లాడకపోవడమే కాకుండా అసలది సమస్యే కాదన్నట్టుగానే వ్యవహరిస్తున్నది.
• రాష్ట్రంలో ఇంకా 22 లక్షల మంది రైతులకు రూ.2 లక్షల రుణమాఫీ కానేలేదు. కాంగ్రెస్‌ పాలన 10 నెలల మైలురాయిని దాటకమందే రాష్ట్రంలో రైతు ఆత్మహత్యలు 300 మార్కును దాటేశాయి. దీనిపై బీఆర్‌ఎస్‌ వీధి పోరాటాలు, ధర్నాలు, రస్తారోకోలు చేస్తున్నది. ఈ విషయంలో మొదట్లో కొంత హడావుడి చేసిన ఎమ్మెల్యే ఏలేటి మహశ్వర్‌రెడ్డి ఆ తరువాత మిన్నకుండిపోయారు. ప్రతి జిల్లాలో రైతుల ఆందోళనలు ఉధృతమవుతున్న నేపథ్యంలో.. ఇంతకాలం మౌనం వహించిన బీజేపీ నేతలు తప్పనిసరి పరిస్థితిలో సోమవారం రైతుల పక్షాన నిరసన దీక్ష చేపట్టారు.
• రాష్ట్రంలో బియ్యం టెండర్లలో రూ.1100 కోట్ల భారీ కుంభకోణం జరిగిందని బీఆర్‌ఎస్‌ అసెంబ్లీ లోపలా, బయటా ఆధారాలతో సహా వెల్లడించింది. ప్రభుత్వం స్పందించకపోవటంతో ప్రజాధనాన్ని కాపాడాలనే ఉద్దేశంతో హైకోర్టును సైతం ఆశ్రయించింది. తొలుత ఈ వ్యవహారాన్ని బయటపెట్టిందే తామేనన్నట్టు, పేటెంట్‌ తమదే అన్నట్టు చెప్పుకున్న బీజేపీ నేతలు నాలుగైదు మీడియా సమావేశాలు పెట్టి ఆ తరువాత చడీచప్పుడు లేకుండా ఉండిపోవడం అనుమానాలకు తావిస్తున్నది.
• కేంద్ర ప్రభుత్వం తెచ్చిన మూడు కొత్తచట్టాలను ఇండియా కూటమిలోని పలు భాగస్వామ్యపక్షాలు వ్యతిరేకిస్తున్నాయి. తమిళనాడు, కర్ణాటక, పశ్చిమ బెంగాల్‌ రాష్ర్టాలు ఆ చట్టాల అమలు విషయంలో పునరాలోచించాలని కేంద్రానికి లేఖలు రాశాయి. ఈ చట్టాలపై రాష్ట్ర ప్రభుత్వ వైఖరిని ప్రకటించాలని బీఆర్‌ఎస్‌ పార్టీ వర్కింగ్‌ ప్రెసిడెంట్‌ కేటీఆర్‌ డిమాండ్‌ చేశారు. రేవంత్‌రెడ్డి సర్కార్‌ మాత్రం ఆ చట్టాలను అమలు చేస్తున్నది.
• ఇటీవలి భారీ వర్షాలతో అతలాకుతలమైన ఖమ్మం పట్టణంలో ప్రభుత్వం పునరావాస, సహాయక చర్యలను గాలికి వదిలేసింది. దీనిపై బీజేపీ నేతలు ప్రభుత్వాన్ని పల్లెత్తు మాట కూడా అనలేదు. దీంతో కాంగ్రెస్‌, బీజేపీ మధ్య మ్యాచ్‌ ఫిక్సింగ్‌ జరిగిందని రాజకీయ పరిశీలకులు విశ్లేషిస్తున్నారు.
• సీఎం రేవంత్‌రెడ్డితో బీజేపీ మైత్రిబంధం పార్లమెంట్‌ ఎన్నికల సందర్భంగా బహిరంగ రహస్యమైందనే చర్చ సాగుతున్నది. కరీంనగర్‌ పార్లమెంటు స్థానం నుంచి పోటీచేసిన బండి సంజయ్‌ సునాయాసంగా గెలవటానికి వీలుగానే అక్కడ కాంగ్రెస్‌ పార్టీ డమ్మీ అభ్యర్థిని నిలబెట్టిందనే ఆరోపణలువచ్చాయి.