9:35 వరకే పది పరీక్షలకు ప్రవేశం

పదో తరగతి వార్షిక పరీక్షలు ఎల్లుండి నుంచి ప్రారంభంకానున్నాయి. 21న ప్రారంభమై ఏప్రిల్‌ 4 వరకు జరుగుతాయి. ఈ పరీక్షలకు ఐదు నిమిషాలు ఆలస్యంగా వచ్చే విద్యార్థులను అనుమతిస్తారు.

• ఎల్లుండి నుంచి పదో తరగతి వార్షిక పరీక్షలు
• 2,650 సెంటర్లు, పరీక్షరాయనున్న 5.09లక్షల మంది విద్యార్థులు

హైదరాబాద్‌, మార్చి 18 (నమస్తే తెలంగాణ) : పదో తరగతి వార్షిక పరీక్షలు ఎల్లుండి నుంచి ప్రారంభంకానున్నాయి. 21న ప్రారంభమై ఏప్రిల్‌ 4 వరకు జరుగుతాయి. ఈ పరీక్షలకు ఐదు నిమిషాలు ఆలస్యంగా వచ్చే విద్యార్థులను అనుమతిస్తారు. ఉదయం 9:30 గంటలకు పరీక్ష ప్రారంభంకానుండగా, 9:35 వరకు వచ్చే విద్యార్థులను అనుమతిస్తామని, ఆ తర్వాత వచ్చే విద్యార్థులను ఎట్టి పరిస్థితుల్లో అనుమతించబోమని ప్రభుత్వ పరీక్షల విభాగం డైరెక్టర్‌ కృష్ణారావు తెలిపారు.

హాల్‌టికెట్లు విడుదల చేశామని, వెబ్‌సైట్‌ నుంచి డౌన్‌లోడ్‌ చేసుకున్న హాల్‌టికెట్లతో పరీక్షకు అనుమతిస్తామని చెప్పారు. రాష్ట్రవ్యాప్తంగా 2,650 సెంటర్లను ఏర్పాటు చేయగా, 5, 09,403 మంది విద్యార్థులు పరీక్షలు రాయబోతున్నట్టు తెలిపారు. కాంపోజిట్‌ పేపర్లకు పరీక్షరాసేవారికి మాత్రం ఉదయం 9:30 నుంచి మధ్యాహ్నం 12:50 గంటల వరకు పరీక్షలు నిర్వహిస్తారు.

పరీక్షలకు ప్రత్యేక ఏర్పాట్లు ఇవే..

• తొలిసారిగా విద్యార్థులకు 24 పేజీల బుక్‌లెట్‌ను ఇస్తున్నారు. విద్యార్థులు ఆయా పేజీల్లోనే ఆన్సర్లు రాయాలి.
• పేపర్లు లీకేజీని అరికట్టేందుకు ప్రశ్నపత్రాలపై మొదటి సారిగా క్యూఆర్‌ కోడ్‌ను ముద్రిస్తున్నారు.
• తొలిసారిగా ఒక్కో పేపర్‌పై ఒక యూనిక్‌ నంబర్‌ను సైతం ముద్రిస్తున్నారు. ఈ యూనిక్‌ నంబర్‌ ప్రశ్నపత్రంలోని అన్ని పేజీలపై ఉంటుంది.
• ఇక సైన్స్‌లో భౌతికశాస్త్రం, జీవశాస్త్రం పేపర్లకు పరీక్షలను వేర్వేరు రోజుల్లో నిర్వహిస్తారు. ఈ రెండింటికి మాత్రం ఉదయం 9:30 నుంచి 11 గంటల వరకే పరీక్ష జరుగుతుంది. గణితం పరీక్ష రోజు గ్రాఫ్‌ పేపర్‌ విడిగా ఇస్తారు.
• సీఎస్‌డీవో గదుల్లో సీసీ కెమెరాల పర్యవేక్షణ ఉంటుంది. సీసీ కెమెరాల నిఘాలోనే ప్రశ్నపత్రాల బండిట్స్‌ తెరుస్తారు.