Handloom | యాదాద్రి భువనగిరి, ఏప్రిల్ 22 (నమస్తే తెలంగాణ) : ప్రభుత్వం, టెస్కో నిర్వాకంతో చేనేత రంగం ఆగమవుతున్నది. వస్త్ర పరిశ్రమ ఆర్థిక ఇబ్బందుల్లో చిక్కుకుంటున్నది. చేనేత పట్టు చీరల నిల్వలు ఇబ్బడిముబ్బడిగా పేరుకుపోతున్నాయి. ఎప్పటికప్పుడు కొనాల్సిన టెస్కో కనీసం పట్టించుకోకపోవడంతో గిరాకీ లేక కార్మికులకు పని దొరకడంలేదు. ఉమ్మడి నల్లగొండ జిల్లాలో చేనేత సహకార సంఘాలు, పవర్లూమ్లు కలిపి మొత్తం 84 సంఘాలు ఉండగా, ఒక్క యాదాద్రి భువనగిరి జిల్లాలో అత్యధికంగా 43 ఉన్నాయి. వీటిలో 25,800 మంది చేనేత కార్మికులు సంఘ సభ్యులుగా ఉన్నారు. పోచంపల్లి, గట్టుప్పల, పుట్టపాక, నారాయణపురం, భువనగిరి, కొయ్యలగూడెం, చండూరు, మునుగోడు తదితర ప్రాంతాల నుంచి చీరలు ఉత్పత్తి చేస్తారు. చేనేత వస్ర్తాలు మగ్గాలపై నేయించాలని సహకార సంఘాలకు తెలంగాణ రాష్ట్ర సహకార సంస్థ (టెస్కో) ముందుగానే ఆర్డర్ ఇస్తుంది. ఆర్డర్ ఇచ్చాక చేనేత పట్టు చీరలను నేయిస్తారు. మూడు నెలలకోసారి నాలుగు విడుతల్లో వస్ర్తాలను టెస్కో కొనుగోలు చేస్తుంది. కానీ నాలుగు నెలలుగా టెస్కో పట్టించుకోవడం లేదు. అసెంబ్లీ ఎన్నికలకు ముందు నవంబర్లో చీరలను కొనుగోలు చేశారు. అప్పటినుంచి ఇప్పటివరకు మళ్లీ ఇటువైపు చూడలేదు. దీంతో ఉత్పత్తి చేసిన చీరలన్నీ షావుకార్లు, సంఘాల్లో కుప్పలు తెప్పలుగా పేరుకుపోయాయి. యాదాద్రి భువనగిరి జిల్లాలో రూ.8 కోట్ల విలువైన చీరలు నిలిచిపోయాయి. ఒక్క పోచంపల్లి పట్టణంలోని సొసైటీలో రూ.రెండు కోట్లు, చౌటుప్పల్ మండలంలోని కొయ్యలగూడెం సహకారం సంఘంలో రూ.1.10 కోట్ల విలువైన వస్ర్తాలు పేరుకుపోయాయి. అదే విధంగా ఇప్పటికే కొనుగోలు చేసిన వస్ర్తాల బిల్లులు సైతం పెండింగ్లో పెట్టారు. నాలుగు నెలలుగా ఒక్కపైసా విడుదల చేయలేదు. యాదాద్రి భువనగిరి జిల్లాలో రూ.2 కోట్ల మేర బిల్లులు పెండింగ్లో మూలుగుతున్నాయి. నల్లగొండ జిల్లాలోనూ ఇదే పరిస్థితి నెలకొన్నది.
పట్టుచీరలు అంతంత మాత్రంగానే అమ్ముడుపోతుండటం, టెస్కో కొనకపోవడంతో నేతన్నలకు ఇబ్బందులు తప్పడంలేదు. చేనేత కార్మికులు మాస్టర్ వీవర్స్ వద్ద కూలికి మగ్గాలు నేస్తుంటారు. కానీ వస్త్ర నిల్వలు పేరుకుపోవడంతో ఉత్పత్తికి ముందుకు రావడంలేదు. దీంతో షావుకార్లు నేతన్నలకు పెద్దగా పని ఇవ్వడంలేదు. కొందరు పని కల్పిస్తున్నా కూలి ఆలస్యంగా ఇస్తున్నారు. మరోవైపు గిరాకీ లేకపోవడంతో కొందరు తక్కువ ధరలకే చీరలను అమ్ముకుంటున్నారు. నేతన్నలు కష్టాల పాలవుతున్నా సర్కారు పట్టించుకోవడం లేదని, వెంటనే కొనుగోలు చేపట్టాలని సంఘాలు డిమాండ్ చేస్తున్నాయి.
కార్మికులు తయారు చేసిన వస్త్రాలకు మారెటింగ్ లేక ఉపాధి దొరుకతలేదు. చేనేత సహకార సంఘంలో కోట్ల విలువైన చేనేత వస్త్ర నిల్వలు పేరుకుపోయాయి. వస్త్రాల కొనుగోలు జరగక.. కార్మికులు పని లేక వీధిన పడే పరిస్థితి నెలకొన్నది. ప్రభుత్వం నుంచి సంఘాలకు బకాయిలు రాకపోవడంతో తీవ్ర ఇబ్బందులకు గురవుతున్నాం. పనిలేక వలస వెళ్లే దుస్థితి ఏర్పడింది. ప్రభుత్వం చేనేత రంగాన్ని ఆదుకొని కార్మికులకు పని కల్పించాలి.
చేనేత సమస్యల పరిషారం కోసం ప్రభుత్వం శాశ్వత చర్యలు చేపట్టాలి. కార్మికులకు పనిలేకపోవడంతో అప్పుల భారంతో కూరుకుపోతున్నారు. నేసిన వస్త్రానికి మారెటింగ్ సౌకర్యం కల్పించాలి. నిల్వ ఉన్న వస్త్రాలన్నీ ప్రభుత్వం కొనాలి. చేనేత సహకార సంఘాలకు ఎన్నికలు నిర్వహించాలి. సహకార సంఘాలను బలోపేతం చేయాలి. కార్మికులకు పని కల్పించి ఆదుకునేందుకు ప్రభుత్వం తగిన చర్యలు తీసుకోవాలి.