ఓకే ఒక్కడు.. కేసీఆర్

తెలంగాణ రాష్ట్ర సాధనలో చిరస్మరణీయమైన పేరు కల్వకుంట్ల చంద్రశేఖర రావు. ఈ డెబ్బయి ఒక్కేండ్ల బక్కపలుచని నాయకుడిది నాలుగు దశాబ్దాలకు పైగా విరామమెరుగని రాజకీయ చరిత్ర. విశాలాంధ్రలో తెలంగాణకు జరిగిన అన్యాయాలపై పోరాటానికి ఆయన 2001లో రణ నినాదం చేశారు.

తెలంగాణ రాష్ట్ర సాధనలో చిరస్మరణీయమైన పేరు కల్వకుంట్ల చంద్రశేఖర రావు. ఈ డెబ్బయి ఒక్కేండ్ల బక్కపలుచని నాయకుడిది నాలుగు దశాబ్దాలకు పైగా విరామమెరుగని రాజకీయ చరిత్ర. విశాలాంధ్రలో తెలంగాణకు జరిగిన అన్యాయాలపై పోరాటానికి ఆయన 2001లో రణ నినాదం చేశారు. పదమూడేండ్లపాటు వివిధ వ్యూహాలతో కేంద్ర ప్రభుత్వాన్ని ఒప్పించి తెలంగాణ రాష్ర్టాన్ని సాధించారు. ఆ ప్రస్థానాన్ని అవలోకనం చేసుకుందాం.

• కల్వకుంట్ల చంద్రశేఖర రావు సిద్దిపేట జిల్లా చింతమడకలో 1954 ఫిబ్రవరి 17న జన్మించారు. యువజన నాయకుడిగా రాజకీయ అరంగేట్రం చేశారు. 1983లో తెలుగుదేశం పార్టీలో చేరారు.
• 1985, 1989, 1994, 1999 సంవత్సరాల్లో సిద్దిపేట నుంచి ఉమ్మడి ఆంధ్రప్రదేశ్‌ శాసనసభకు ప్రాతినిధ్యం వహించారు.
• చంద్రబాబు నాయుడు ప్రభుత్వం రూపొందించిన ‘విజన్‌ 2020’ తెలంగాణ ప్రయోజనాలను దెబ్బతీస్తుందని కేసీఆర్‌ భావించారు. తన ఉపసభాపతి పదవికి, ఎమ్మెల్యే సభ్యత్వానికి, టీడీపీ సభ్యత్వానికి 2001లో రాజీనామా సమర్పించారు.
• మలిదశ తెలంగాణ ఉద్యమానికి అంకురార్పణ చేసి, ఆచార్య జయశంకర్‌ సలహాతో కొనసాగించారు. 2001 ఏప్రిల్‌ 27న హైదరాబాద్‌లోని జలదృశ్యంలో తెలంగాణ రాష్ట్ర సమితిని స్థాపించారు. అదే ఏడాది మే 17న కరీంనగర్‌లో ‘సింహగర్జన’ పేరుతో భారీ బహిరంగ సభ నిర్వహించారు.
• 2001 సెప్టెంబర్‌లో సిద్దిపేట శాసనసభ ఉప ఎన్నికలో కేసీఆర్‌ 58వేల ఓట్ల మెజారిటీతో ఘన విజయం సాధించారు.
• 2003 జనవరి 6న సికింద్రాబాద్‌లోని జింఖానా గ్రౌండ్స్‌లో ‘తెలంగాణ గర్జన’, ఏప్రిల్‌ 27న ద్వితీయ వార్షికోత్సవ సభను వరంగల్‌లో నిర్వహించారు. వీటికి శిబు సోరెన్‌, రాం విలాస్‌ పాసవాన్‌, దేవెగౌడ తదితర నాయకులు హాజరయ్యారు. అలా కేసీఆర్‌ తెలంగాణ డిమాండ్‌కు విశాల ప్రాతిపదిక కల్పించారు.
• 2004 ఎన్నికల్లో కేసీఆర్‌ కాంగ్రెస్‌తో పొత్తుపెట్టుకున్నారు. కరీంనగర్‌ ఎంపీగా గెలుపొందారు. కేసీఆర్‌ చొరవతో యూపీఏ ప్రభుత్వం తెలంగాణను కామన్‌ మినిమమ్‌ ప్రోగ్రామ్‌లో చేర్చింది.
• 2005లో కేంద్రం ప్రణబ్‌ ముఖర్జీ కమిటీని నియమించింది. కేసీఆర్‌ కృషి వల్ల 36 పార్టీలు తెలంగాణకు అనుకూలంగా లేఖలిచ్చాయి.
• 2009 నవంబర్‌ 29న కేసీఆర్‌ ఆమరణ నిరాహార దీక్షకు పూనుకొన్నారు. కేంద్రం దిగివచ్చింది. డిసెంబర్‌ 9న తెలంగాణ ఏర్పాటు ప్రక్రియ ప్రారంభమైందని ప్రకటించింది.
• అనంతరం కేంద్రం డిసెంబర్‌ 23న యూటర్న్‌ తీసుకున్నది. అయితే, కేసీఆర్‌ నాయకత్వంలో ఉద్యమం ఉధృతమైంది. ఆయన తనతోపాటు మొత్తం తెలంగాణ సమాజాన్ని ఉద్యమంలో పాల్గొనేలా చేశారు. రాస్తారోకోలు, మిలియన్‌ మార్చ్‌, సకల జనుల సమ్మె లాంటి ఉద్యమ రూపాలతో తెలంగాణ సాధన పోరాటం ముందుకు సాగింది.
• కేసీఆర్‌ వ్యూహాలు ఫలించి 2014 ఫిబ్రవరిలో తెలంగాణ బిల్లు పార్లమెంటు ఆమోదం పొందింది. అదే ఏడాది జూన్‌ 2న తెలంగాణ ప్రత్యేక రాష్ట్రంగా అవతరించింది.
• 2014లోనే సాధారణ ఎన్నికలు జరిగాయి. ఉద్యమ నాయకుడైన కేసీఆర్‌ రాష్ట్ర తొలి ముఖ్యమంత్రిగా బాధ్యతలు చేపట్టారు.