Wanindu Hasaranga : శ్రీలంక స్పిన్నర్ వనిందు హసరంగ(Wanindu Hasaranga) ప్రపంచ రికార్డు కొల్లగొట్టాడు. ఐదు వన్డేల్లో అత్యధిక వికెట్లు తీసిన బౌలర్గా చరిత్ర సృష్టించాడు. ఈ బౌలింగ్ ఆల్రౌండర్ 5 వన్డేల్లో 22 వికెట్లు పడగొట్టాడు. దాంతో, పాకిస్థాన్ మాజీ పేసర్ వకార్ యూనిస్(Waqar Younis) 33 ఏళ్ల క్రితం నెలకొల్పిన రికార్డును సమం చేశాడు.
వరల్డ్ కప్ క్వాలిఫైయర్స్(World Cup Qualifiers 2023)లో భాగంగా ఐర్లాండ్తో ఈ రోజు జరిగిన మ్యాచ్లో హసరంగ ఈ ఫీట్ సాధించాడు. 10 ఓవర్లలో 79 పరుగులిచ్చి ఐదు వికెట్లు తీశాడు. అంతేకాదు వరుసగా మూడు వన్డేల్లో ఐదేసి వికెట్లు తీసిన మొట్ట మొదటి స్పిన్నర్గా నిలిచాడు.
🖐️🖐️🖐️
Wanindu Hasaranga celebrates his third consecutive five-wicket haul as Sri Lanka advances to the Super Six! 🎉🏏#LionsRoar #SLvIRE #CWC23 pic.twitter.com/riUZGMRQge
— Sri Lanka Cricket 🇱🇰 (@OfficialSLC) June 25, 2023
తొలుత బ్యాటింగ్ చేసిన శ్రీలంక 325 పరుగులు చేసింది. దిముత్ కరుణరత్నే(103) సెంచరీతో, సదీర సమరవిక్రమ(82) అర్ధ శతకంతో కదం తొక్కారు. కొండంత లక్ష్య ఛేదనలో ఐర్లాండ్ తడబడింది. హసరంగ ఐదు వికెట్లతో ఐర్లాండ్ పతనాన్ని శాసించాడు. అతడి ధాటికి ఆ జట్టు 192 పరుగులకే కుప్పకూలింది. 113 పరుగుల తేడాతో గెలిచిన లంక గ్రూప్ బిలో అగ్రస్థానానికి చేరింది. అంతేకాదు సూపర్ సిక్స్కు అర్హత సాధించింది. 1996లో విశ్వ విజేతగా అవతరించిన శ్రీలంక ఈ ఏడాది క్వాలిఫైయర్ పోటీల్లో పసికూనలతో తలపడుతోంది. న్యూజిలాండ్ పర్యటనలో వన్డే సిరీస్ కోల్పోవడంతో వరల్డ్ కప్ పోటీలకు అర్హత సాధించలేకపోయింది.