Virat Kohli : ప్రపంచంలోని మేటి క్రికెటర్ మాస్టర్ విరాట్ కోహ్లీ(Virat Kohli) ప్రతిష్ఠాత్మక అవార్డు రేసులో నిలిచాడు. లెజెండరీ ఫుట్బాలర్ లియోనల్ మెస్సీ(Lionel Messi)ని విరాట్ సవాల్ చేస్తున్నాడు. అవును.. ‘పుబిటి అథ్లెట్ ఆఫ్ ది ఇయర్'(Pubity Athete Of The Year) 2023 అవార్డు కోసం ఈ ఇద్దరూ నువ్వానేనా అన్నట్టు పోటీ పడుతున్నారు.
తమ సొగసరి ఆటతో ప్రపంచవ్యాప్తంగా కోట్లాది మంది అభిమానులను సొంతం చేసుకున్న కోహ్లీ, మెస్సీ ఈ ఏడాది మైదానంలో అదరగొట్టారు. ఒకరు పరుగుల వరద పారిస్తే.. మరొకరు గోల్స్ వర్షం కురించారు. పరస్పరం విరుద్ద స్వభావం కలిగిన వీళ్లలో విజేతగా నిలిచేది ఎవరో త్వరలోనే తేలనుంది.
Virat Kohli vs Lionel Messi for the “Pubity Sports men’s Athlete of the Year” 2023. pic.twitter.com/q8CMBBvTUx
— CricketMAN2 (@ImTanujSingh) December 30, 2023
ప్రపంచ క్రికెట్లో పరుగుల రారాజుగా వెలుగొందుతున్న విరాట్ కోహ్లీ(Virat Kohli) ఈ ఏడాది సెంచరీల మీద సెంచరీలు బాదాడు. ఐపీఎల్లో వరుసగా రెండు శతకాలతో పాటు ఆసియా కప్, వరల్డ్ కప్లో రికార్డు సెంచరీలు కొట్టాడు. ఇక వన్డేల్లో దాదాపు అసాధ్యమనుకున్న రికార్డును విరాట్ బద్దలు కొట్టాడు. సచిన్ టెండూల్కర్ పేరిట ఉన్న 49 శతకాల రికార్డును విరాట్ బ్రేక్ చేశాడు.
విరాట్ కోహ్లీ, సచిన్ టెండూల్కర్
సొంతగడ్డపై జరిగిన వన్డే వరల్డ్ కప్లో దక్షిణాఫ్రికా సెంచరీతో చెలరేగిన కోహ్లీ.. మాస్టర్ బ్లాస్టర్ను అధిగమించాడు. ఈ రన్మెషిన్ జోరు చూస్తుంటే సచిన్ 100 సెంచరీల రికార్డులను బ్రేక్ చేసేలా ఉన్నాడు. మరో 21 శతకాలు బాదితే ప్రపంచంలోనే అత్యధిక శతకాలు కొట్టిన క్రికెటర్గా కోహ్లీ అవతరిస్తాడు.
నిరుడు ఖతర్లో జరిగిన వరల్డ్ కప్లో 35 ఏండ్ల లియోనల్ మెస్సీ(Lionel Messi) అద్భుతం చేశాడు. అర్జెంటీనాను రెండో సారి ఫైనల్కు తీసుకెళ్లిన ఈ దిగ్గజ ఫుట్బాలర్ సగర్వంగా ప్రపంచకప్ ట్రోఫీని ముద్దాడాడు. టైటిల్ పోరులో అర్జెంటీనా 4-2తో ఫ్రాన్స్ను ఓడించింది. మెస్సీ రెండు గోల్స్తో జట్టు విజయంలో కీలక పాత్ర పోషించాడు. దాంతో, 36 ఏళ్ల తర్వాత మళ్లీ అర్జెంటీనా ప్రపంచ ఛాంపియన్గా అవతరించింది.
ప్రపంచకప్ ట్రోఫీని ముద్దాడుతున్న మెస్సీ
వరల్డ్ కప్ అనంతరం పీఎస్జీ క్లబ్ను వీడిన మెస్సీ అమెరికాకు చెందిన ఇంటర్ మియామి క్లబ్తో ఒప్పందం చేసుకున్నాడు. మేజర్ సారగ్ లీగ్లో తన మార్క్ ఆటతో ఆ జట్టును విజేతగా నిలిపాడు. ఈ ఏడాది అత్యుత్తమ ప్రదర్శనతో ఆకట్టుకున్న మెస్సీని ప్రతిష్ఠాత్మక ‘బాలన్ డీ ఓర్'(Ballon d’Or) అవార్డు వరించింది. మెస్సీ రికార్డు స్థాయిలో ఎనిమిదోసారి ఈ అవార్డును అందుకోవడం విశేషం.