Usman Khawaja: ఐసీసీ వద్దన్నా ఆ ప్రయత్నాలను విరమించుకోని ఖవాజా.. గాజా కోసం పట్టు వదలని విక్రమార్కుడిలా..!

Usman Khawaja: అంతర్జాతీయ క్రికెట్‌ మండలి (ఐసీసీ) నుంచి వార్నింగ్‌లు వచ్చినా, ఒక వర్గం అభిమానుల నుంచి ఎత్తిపొడుపులు, విమర్శలు వచ్చినా వాటిని పట్టించుకోకుండా ఖవాజా ముందుకెళ్తున్నాడు. తాజాగా ఈ ఆస్ట్రేలియా టెస్టు జట్టు ఓపెనర్‌ మరోసారి గాజాకు మద్దతు చాటుకున్నాడు.

Usman Khawaja: పాలస్తీనాపై వంద రోజులుగా బాంబులతో విరుచుకుపడుతున్న ఇజ్రాయెల్‌ దాష్టీకాలను నిరసిస్తూ ఇప్పటికే పలువురు అంతర్జాతీయ క్రీడాకారులు తమ గళాన్ని వినిపిస్తున్నారు. క్రికెట్‌లో ఈ జాబితాలో నిలిచేవారిలో ఆస్ట్రేలియా క్రికెటర్‌ ఉస్మాన్‌ ఖవాజా ముందుంటాడు. పాలస్తీనాకు మద్దతుగా అతడు తన స్థాయి మేరకు గళాన్ని వినిపిస్తూనే ఉన్నాడు. ఈ క్రమంలో అతడు అంతర్జాతీయ క్రికెట్‌ మండలి (ఐసీసీ) నుంచి వార్నింగ్‌లు వచ్చినా, ఒక వర్గం అభిమానుల నుంచి ఎత్తిపొడుపులు, విమర్శలు వచ్చినా వాటిని పట్టించుకోకుండా ముందుకెళ్తున్నాడు. తాజాగా ఈ ఆస్ట్రేలియా టెస్టు జట్టు ఓపెనర్‌ మరోసారి గాజాకు మద్దతు చాటుకున్నాడు.

ఖవాజా తాజాగా ప్రముఖ టీషర్ట్‌ కంపెనీ ఎలక్ట్రిక్‌ విక్కీతో జతకలిశాడు. ‘ఫ్రీడమ్‌ అండ్‌ ఈక్వాలిటీ’ పేరిట కొత్త టీషర్ట్‌లను మార్కెట్‌లోకి రిలీజ్‌ చేశాడు. ఈ టీషర్ట్‌ల ద్వారా వచ్చిన లాభాలను గాజాలోని చిన్నపిల్లలకు అందించనున్నానని ఈ మేరకు ఖవాజా ఎక్స్‌ (ట్విటర్‌) వేదికగా ప్రకటించాడు. స్వయంగా ఖవాజా ఈ టీషర్ట్‌లను ధరించి ప్రమోట్‌ కూడా చేసుకున్నాడు. ఈ ట్వీట్‌పై నెటిజన్లు ప్రశంసలు కురిపిస్తున్నారు. సదుద్దేశంతో ఖవాజా చేస్తున్న ఈ ప్రయత్నం విజయవంతం కావాలని ఆకాంక్షించారు.

 

I’ve team up with @electric_wicky to bring you the Uzzy “Freedom and Equality” T shirts. All profits will be donated to the ‘Unicef Children of Gaza’ appeal 🍉. For those who can, please purchase to help support those who are struggling and spread the word! Link in my Bio! ❤️ pic.twitter.com/h2HOtZ7f1p

— Usman Khawaja (@Uz_Khawaja) January 16, 2024

ఇటీవలే పాకిస్తాన్‌తో స్వదేశంలో ముగిసిన టెస్టు సిరీస్‌లో ఖవాజా.. గాజాకు మద్దతుగా తన షూ పై ‘ఆల్‌ ఆర్‌ ఈక్వల్‌’, ‘ఫ్రీడమ్‌ ఈజ్‌ హ్యూమన్‌ రైట్‌’ అని రాసిఉన్న షూస్‌ను ధరిస్తానని ఐసీసీని కోరాడు. కానీ ఐసీసీ మాత్రం అందుకు అనుమతించలేదు. ఇలాంటివి ఐసీసీ నిబంధనలకు విరుద్ధమని చెప్పడమే గాక అతడికి షోకాజ్‌ నోటీసులు కూడా జరీ చేసింది. ఇంటర్నేషనల్‌ క్రికెట్‌ బాడీ ఖవాజాపై పక్షపాత వైఖరిని చూపుతున్నదని విమర్శలు వెల్లువెత్తిన విషయం విదితమే. దీంతో ఖవాజా.. ఆటలో కాకుండా నేరుగా టీషర్ట్‌ కంపెనీతో ఒప్పందం కుదుర్కోవడం విశేషం.