Rishabh Pant : టీమిండియా వికెట్ కీపర్ రిషభ్ పంత్(Rishabh Pant) పునరాగమనానికి సిద్దమవుతున్నాడు. ఈ డాషింగ్ బ్యాటర్ ఐపీఎల్ 17వ సీజన్లో ఢిల్లీ క్యాపిటల్స్(Delhi Capitals) కెప్టెన్గా రీ ఎంట్రీ ఇవ్వనున్నాడు. అయితే.. కెరీర్లో రాకెట్లా దూసుకెళ్తున్న సమయంలో కారు యాక్సిడెంట్(Car Accident) అతడి జీవితాన్ని ఒక్కసారిగా తలకిందులు చేసింది. ఎంతో ఇష్టమైన ఆటకు తనను దూరం చేసిన రెండేండ్ల క్రితం నాటి కారు యాక్సిడెంట్ను పంత్ తాజాగా గుర్తు చేసుకున్నాడు.
స్టార్ స్పోర్ట్స్ ఛానెల్ విడుదల చేసిన ఒక ప్రోమో వీడియోలో మాట్లాడిన పంత్.. ‘ప్రపంచంలో నా కథ ముగిసిందని జీవితంలో మొదటిసారి అనిపించింది. కానీ నేను అదృష్టవంతుడిని. ఎంతో పెద్ద ప్రమాదం అది. నేను బతికాను. ఏదో ఒక శక్తి నన్ను కాపాడింది. నేను కోలుకునేందుకు 16-18 నెలలు పడుతుందని డాక్టర్లు చెప్పారు. రెండో జీవితం లభించినందుకు లక్కీగా ఫీలవుతున్నా’ అని వెల్లడించాడు.
Rishabh Pant’s Perseverance Through Adversity & Road To Recovery
Watch as he narrates and describes his journey towards glory, for the FIRST TIME!
Thu 1st Feb, 7 PM and 10 PM, and on Fri 2nd Feb, 10:15 PM – and LIVE on 1st Feb at 7:30 PM on our YouTube channel! pic.twitter.com/rXJTwd36vb
— Star Sports (@StarSportsIndia) January 29, 2024
కొత్త సంవత్సరం వేడుకలో పాల్గొనేందుకు పంత్ 2022 డిసెంబర్ 31న కారులో ఇంటికి బయల్దేరాడు. ఢిల్లీ – డెహ్రడూన్ రహదారిపై వెళ్తున్న అతడి మర్సిడెస్ కారు రూర్కీ సమీపంలోని హమ్మద్పూర్ ఝాల్ (Hammadpur Zhal) వద్ద యాక్సిడెంట్కు గురైంది. వేగంగా వెళ్తున్న అతడి కారు రెయిలింగ్కు ఢీకొని అమాంతం బోల్తా పడింది. క్షణాల్లో మంటలు చెలరేగాయి. కారులోనే చిక్కుకుపోయిన పంత్కు నుదురు, కాలికి కాలిన గాయాలయ్యాయి. కారులోంచి మంటలు రావడం గమనించిన కొందరు.. అద్ధాలు పగలగొట్టి పంత్ను కాపాడారు. అంబులెన్స్లో అతడిని డెహ్రాడూన్లోని ప్రైవేట్ ఆస్పత్రికి తరలించారు.
అనంతరం ముంబైలోని కోకిలా బెన్ ఆస్పత్రిల్ పంత్ మోకాలి సర్జరీ చేయించుకున్నాడు. అక్కడి నుంచి బెంగళూరులోని నేషనల్ క్రికెట్ అకాడమీ(NCA)కి వెళ్లిన పంత్.. ఫిట్నెస్పై దృష్టి పెట్టాడు. కష్టమైన వ్యాయామాలు చేసి తక్కువ సమయంలోనే ఫిట్గా అయ్యాడు. ప్రస్తుతం బ్యాటింగ్ ప్రాక్టీస్తో బిజీగా ఉన్న పంత్ ఐపీఎల్ 17వ సీజన్ కోసం ఎదురుచూస్తున్నాడు.