Australia Open 2024: ఆస్ట్రేలియా ఓపెన్ – 2024లో సెర్బియా స్టార్, టాప్ సీడ్ నొవాక్ జొకోవిచ్ ఆధిపత్యం కొనసాగిస్తున్నాడు. తనకు అచ్చొచ్చిన టోర్నీలో 11వ టైటిల్ సాధించి కెరీర్లో 25వ గ్రాండ్ స్లామ్ కొట్టాలని చూస్తున్న జొకో.. శుక్రవారం మెల్బోర్న్లోని రాడ్ లీవర్ ఎరీనా వేదికగా ముగిసిన మూడో రౌండ్ పోరులో 6-3, 6-3, 7-6 (7-2) తేడాతో అర్జెంటీనాకు చెందిన థామస్ మార్టిన్ ఎచెవెరిని ఓడించాడు. వరుస సెట్లలో దూకుడుగా ఆడిన జొకో.. ప్రత్యర్థికి ఏమాత్రం అవకాశమివ్వకుండా నాలుగో రౌండ్కు చేరుకున్నాడు.
ఆస్ట్రేలియా ఓపెన్లో జొకోకు ఇది వందో మ్యాచ్ కాగా అందులో 92 విజయాలు సాధించడం గమనార్హం. డిఫెండింగ్ ఛాంపియన్గా బరిలోకి దిగిన జొకో.. తర్వాతి పోరులో బెన్ షెల్టన్-మన్నారినో మధ్య జరుగుతున్న మూడో రౌండ్ పోరులో విజేతతో తలపడనున్నాడు. ఆస్ట్రేలియా ఓపెన్లో వందో మ్యాచ్ ఆడటం ద్వారా జొకో.. దిగ్గజ ఆటగాళ్లు రోజర్ ఫెదరర్, సెరీనా విలియమ్స్ సరసన చేరాడు. సీజన్ ఆరంభ టోర్నీ అయిన ఆస్ట్రేలియా ఓపెన్లో ఫెదరర్.. 117 మ్యాచ్లు ఆడగా సెరీనా 105 మ్యాచ్లు ఆడింది.
Too strong. Too clean. Too good.@djokernole cruises into the fourth round with a 6-3 6-3 7-6(2) victory over Tomas Martin Etcheverry.#AusOpen • @wwos • @espn • @eurosport • @wowowtennis pic.twitter.com/hu64jY7GOP
— #AusOpen (@AustralianOpen) January 19, 2024
మిగిలిన మ్యాచ్లలో గ్రీక్ టెన్నిస్ ప్లేయర్ స్టెఫనోస్ సిట్సిపస్.. 6-3, 6-0, 6-4 తేడాతో ఫ్రెంచ్ ఆటగాడు వాన్ ఆస్చేను చిత్తుచేసి నాలుగో రౌండ్కు చేరుకున్నాడు. ఆస్ట్రేలియా ఆటగాడు అలెక్స్ డి మినార్.. 6-3, 6-3, 6-1 తేడాతో ఫ్లవియొ కొబిల్ (ఇటలీ)ని మట్టికరిపించాడు. అమెరికా ఆటగాడు టేలర్ ఫ్రిట్జ్.. 3-6, 6-4, 6-2, 6-2 తేడాతో ఫబియన్ మరోజన్ (హంగేరి)ని ఓడించి నాలుగో రౌండ్కు చేరాడు.
Simply unstoppable 🔥@SabalenkaA chalks up the first 6-0 6-0 W of #AO2024. pic.twitter.com/TcMkKmSrCU
— #AusOpen (@AustralianOpen) January 19, 2024
మహిళల సింగిల్స్లో టాప్ సీడ్ కోకోగాఫ్.. 6-0, 6-2 తేడాతో అమెరికాకే చెందిన పార్క్స్ను చిత్తుచేసింది. బెలారస్ బామ అరీనా సబలెంక.. 6-0, 6-0 తేడాతో లెసియా సురెంకొ (ఉక్రెయిన్)ను ఓడించింది. రష్యా సంచలనం, 16 ఏండ్ల మిర్రా ఆండ్రీవా.. 1-6, 6-1, 7-6 (10-5) తేడాతో ఫ్రెంచ్ ప్లేయర్ డయాన్ పారీని ఓడించి నాలుగో రౌండ్కు చేరింది.