IPL 2024 : ఐపీఎల్ ఫ్రాంచైజీ సన్రైజర్స్ హైదరాబాద్(Sunrisers Hyderabad)కు షాకింగ్ న్యూస్. స్టార్ స్పిన్నర్ వనిందు హసరంగ (Wanindu Hasaranga) రాకకోసం ఎదురుచూస్తున్న కోట్లాది మంది అరెంజ్ అభిమానులకు నిరాశే మిగిలింది. అతడు మెగా టోర్నీ మొత్తానికి దూరం కానున్నాడు. బంగ్లాదేశ్ పర్యటనలో గాయపడిన ఈ మిస్టరీ స్పిన్నర్ ఇంకా కోలుకోలేదు. దాంతో, అతడు ఐపీఎల్ 17వ సీజన్కు అందుబాటులో ఉండడని ఆదివారం శ్రీలంక క్రికెట్ బోర్డు తెలిపింది.
‘ఐపీఎల్ టోర్నీలో హసరంగా ఆడడం లేదు. అతడు త్వరలోనే కాలి మడిమ నిపుణుల(పొడియాట్రిస్ట్)ను కలిసి చికిత్స చేయించుకోనున్నాడు. అనంతరం కొన్నిరోజులు పునరావాసంలో ఉంటాడు’ అని శ్రీలంక క్రికెట్ సీఈఓ అష్లే డిసిల్వా(Ashley de Silva) వెల్లడించాడు. మెరుగైన వైద్య కోసం త్వరలోనే హసరంగా దుబాయ్కు వెళ్లనున్నాడు.
Major blow for Us Wanindu Hasaranga set to miss entire IPL! pic.twitter.com/grRdRzaft7
— SunRisers OrangeArmy Official (@srhfansofficial) March 31, 2024
ఐపీఎల్ 16వ సీజన్లో హసరంగ అదరగొట్టాడు. రాయల్ చాలెంజర్స్ బెంగళూరు తరఫున ఆడిన అతడు ఏకంగా 26 వికెట్లు పడగొట్టాడు. అయితే.. మినీ వేలానికి ముందు ఆశ్చర్యంగా ఆర్సీబీ హసరంగను వదిలేసింది. దాంతో, దుబాయ్లో జరిగిన వేలంలో హైదరాబాద్ రూ.1.5 కోట్లకు అతడిని కొన్నది. పదిహేడో సీజన్లో హసరంగ తమ ప్రధాన అస్త్రం అవుతాడని హైదరాబాద్ మేనేజ్మెంట్ ఎన్నో ఆశలు పెట్టుకుంది. అయితే.. గాయం కారణంగా అతడు టోర్నీ నుంచి వైదొలగడంతో స్పెషలిస్ట్ స్పిన్నర్ లోటుతోనే కమిన్స్ సేన అన్ని మ్యాచ్లు ఆడాల్సిన పరిస్థితి ఏర్పడింది. హసరంగా స్థానంలో ఎవరిని తీసుకుంటారు? అనేది ఆరెంజ్ ఆర్మీ ఇంకా వెల్లడించలేదు.