టీకా ఒక మోతాదు కూడా చాలా ఉపయోగకరమే.. బ్రిట‌న్ అధ్య‌యనం

క‌రోనా వైర‌స్ ఇన్‌ఫెక్ష‌న్ వ్యాప్తి నివార‌ణ‌కు సింగిల్ డోస్ వ్యాక్సిన్ కూడా చాలా ఉప‌యోగ‌క‌రంగానే ఉంటుంద‌ని ప‌రిశోధ‌కులు తేల్చారు

April 28, 2021 / 10:03 PM IST

టీకా ఒక మోతాదు కూడా చాలా ఉపయోగకరమే.. బ్రిట‌న్ అధ్య‌యనం

లండ‌న్ : క‌రోనా వైర‌స్ ఇన్‌ఫెక్ష‌న్ వ్యాప్తి నివార‌ణ‌కు సింగిల్ డోస్ వ్యాక్సిన్ కూడా చాలా ఉప‌యోగ‌క‌రంగానే ఉంటుంద‌ని ప‌రిశోధ‌కులు తేల్చారు. ఒక మోతాదు తీసుకున్నప్పటికీ వ్యాప్తిని అరిక‌ట్ట‌వ‌చ్చ‌ని వారు పేర్కొన్నారు. లండ‌న్‌కు చెందిన పబ్లిక్ హెల్త్ సర్వీస్ ఆఫ్ ఇంగ్లండ్ (పీహెచ్ఈ) నిర్వహించిన అధ్యయనంలో ఈమేర‌కు తేల్చారు. ప్రధానంగా ఆక్స్‌ఫ‌ర్డ్-ఆస్ట్రాజెనెకా, ఫైజర్-బయోనోటెక్ అభివృద్ధి చేసిన వ్యాక్సిన్‌ను బ్రిట‌న్‌లో పెద్ద ఎత్తున అందిస్తున్నారు.
టీకాలు వేసిన 14 రోజుల తర్వాత‌ కరోనా నుంచి రక్షణ కనిపించిందని పీహెచ్ఈ గుర్తించింది.

ఒక మోతాదు వ్యాక్సిన్ ప్రమాదాన్ని 50 శాతం తగ్గిస్తుందని ఆరోగ్య మంత్రి హాంకాక్ చెప్పారు. టీకా తీసుకోవ‌డం వ‌ల్ల మీతోపాటు మీ చుట్టుపక్కల వారిని కూడా రక్షిస్తుందనే వాస్తవాన్ని హాంకాక్ వ్యాఖ్య‌లు పునరుద్ఘాటిస్తున్నాయి.

బుధవారం బయటకు వచ్చిన ఈ కొత్త అధ్యయనాన్ని నిపుణులు ఇంకా పూర్తిగా సమీక్షించలేదు. 24,000 గృహాల నుంచి 57,000 మందికి పైగా అధ్యయనం సమయంలో సంప్రదించారు. వీరికి వ్యాక్సిన్ డోసు ఇచ్చారు. వీరిని టీకాలు వేయని దాదాపు మిలియన్‌ మందితో పోల్చారు. ఒక మోతాదు వ్యాక్సిన్ తీసుకున్న నాలుగు వారాల తర్వాత, వ్యాధి బారిన పడే ప్రమాదం 60-65 శాతం తగ్గుతుందని ప‌రిశోధ‌కులు గుర్తించారు. కాగా, గ‌తం అధ్యయనాల్లో రెండు వ్యాక్సిన్ల డోసులు తీసుకున్న 4 వారాల తర్వాత వ్యాప్తి ప్రమాదం 60-65 శాతం తగ్గుతుందని కనుగొన్నారు.

వ్యాధి తీవ్ర‌త‌.. వ్యాప్తి ప్ర‌మాదమూ త‌గ్గుతాయి

ప్ర‌జ‌లు సాధారణ జీవితాలకు తిరిగి రావడానికి టీకాలు చాలా ముఖ్యమైనవి అని పీహెచ్ఈ లోని ఇమ్యునైజేషన్ హెడ్ మేరీ రామ్‌సే చెప్పారు. టీకాలు వ్యాధి తీవ్రతను తగ్గించడమే కాకుండా నిత్యం వేలాది మంది మరణాలను నివారిస్తాయని పేర్కొన్నారు. ఇతరుల్లో కరోనా వ్యాప్తి చెందే ప్రమాదాన్ని తగ్గించడంలో కూడా ఇవి సహాయపడతాయని తమ ప‌రిశోధ‌న‌లో తేలింద‌ని వెల్ల‌డించారు.