5 రోజుల్లోనే నిర్మించిన తొలి 3డీ ప్రింటింగ్ ఇల్లు

కేవ‌లం 5 రోజుల్లోనే 3డీ ప్రింటింగ్ టెక్నాల‌జీతో తొలి ఇంటిని నిర్మించారు

April 28, 2021 / 04:00 PM IST

5 రోజుల్లోనే నిర్మించిన తొలి 3డీ ప్రింటింగ్ ఇల్లు

చెన్నై : కేవ‌లం 5 రోజుల్లోనే 3డీ ప్రింటింగ్ టెక్నాల‌జీతో తొలి ఇంటిని నిర్మించారు. ఈ ఇల్లు సాంప్రదాయ ఇంటి కంటే 30 శాతం తక్కువ ఖర్చు అవుతుందంట‌. సమయాన్ని ఆదా చేయ‌డ‌మే కాకుండా కాలుష్యాన్ని కూడా తగ్గిస్తుందని చెప్తున్నారు ఈ ఇంటి నిర్మాణ‌దారులు.

ఐఐటీ-మద్రాస్ పూర్వ విద్యార్థులు కేవలం 5 రోజుల్లో 3 డీ ప్రింటర్‌తో సిమెంట్ కాంక్రీట్ ఇంటిని నిర్మించారు. చెన్నై క్యాంపస్‌లో 600 చదరపు అడుగుల విస్తీర్ణంలో నిర్మించిన ఈ ఇల్లు చూపరుల‌ను ఎంత‌గానో ఆక‌ట్టుకుంటున్న‌ది.

ఈ ఇల్లు మ‌రో ప్రత్యేకమైన విషయం ఏమిటంటే, ఇంటి నిర్మాణం ఆలోచన నుంచి డిజైన్ వరకు పూర్తిగా ప్రతిదీ ‘మేడ్ ఇన్ ఇండియా’. ఇది గృహనిర్మాణ రంగంలో ఒక విప్లవాత్మక సాంకేతిక పరిజ్ఞానంగా పరిగణించబడుతున్న‌ది. భవిష్యత్తులో ‘బిల్డ్’ కు బదులుగా ‘ప్రింట్’ అనే పదాన్ని చౌకగా, బలమైన ఇళ్ళు నిర్మించడానికి ఉపయోగించే అవ‌కాశాలు ఉన్నాయి.

ఐఐటీ మద్రాసులో మెకానికల్, ఎలక్ట్రికల్ ఇంజనీరింగ్ చ‌దివిన‌ ముగ్గురు పూర్వ విద్యార్థులు.. టీస్టా మాన్యుఫ్యాక్చరింగ్ సొల్యూషన్స్ వ్య‌వ‌స్థాప‌కులు అయిన‌ ఆదిత్య వీఎస్ (సీఈఓ), విద్యాశంకర్ సీ (సీఓఓ), పరివర్తన్ రెడ్డి (సీటీఓ) ఈ టెక్నాలజీని అభివృద్ధి చేశారు.

తొలుల ఇంటిలోని వివిధ భాగాలను వర్క్‌షాప్‌లో ముద్రించి, ఆపై క్రేన్ ద్వారా చెన్నై క్యాంపస్‌కు చేర్చారు. అక్క‌డ 600 చదరపు అడుగుల విస్తీర్ణంలో పడకగది, హాల్, వంటగది వంటి వాటితో ఇంటిని నిర్మించారు. ఖాళీ స్థలం లభిస్తే త‌మ‌ ఫౌండేషన్ నుంచి ప్రతి సదుపాయంతో వెయ్యి చదరపు అడుగుల ఇల్లు కేవలం రెండు, రెండున్నర వారాల్లో నిర్మించి ఇస్తామ‌ని టీస్టా సీఓఓ విద్యాశంకర్ చెప్తున్నారు.

ఈ ఇంటిని కేంద్ర మంత్రి నిర్మల సీతారామన్ వర్చువల్ పద్ధతిలో ప్రారంభిస్తూ దేశానికి ఇలాంటి పరిష్కారాలు అవసరమని చెప్పారు. ఈ సాంకేతిక పరిజ్ఞానం గురించి ఇంతకుముందే ప్రభుత్వానికి తెలిసి ఉంటే, అనేక నగరాల్లో నిర్మిస్తున్న గృహాలలో దీనిని ఉపయోగించుకోవచ్చని కేంద్ర మంత్రి నిర్మలా సీతారామన్ అన్నారు.