చలికాలం..నారుమడి పైలం

ఉమ్మడి రంగారెడ్డి జిల్లాలో రైతులు ప్రధానంగా పండించే పంట వరి. వరి పండించడంలో రైతులకు పూర్తి అవగాహన ఉన్నప్పటికీ మితిమీరిన తెగులు సోకడంతో నష్టపోవాల్సిన పరిస్థితి వస్తున్నది. నారుమడి వేసిన నాటి నుంచి కోత కోసే వరకు మందులు పిచికారీ చేయాల్సి వస్తున్నది.

• మొక్కకు పోషకాలు అందేలా చూడాలి
• రైతులకు శాస్త్రవేత్తల సూచన

ఉమ్మడి రంగారెడ్డి జిల్లాలో రైతులు ప్రధానంగా పండించే పంట వరి. వరి పండించడంలో రైతులకు పూర్తి అవగాహన ఉన్నప్పటికీ మితిమీరిన తెగులు సోకడంతో నష్టపోవాల్సిన పరిస్థితి వస్తున్నది. నారుమడి వేసిన నాటి నుంచి కోత కోసే వరకు మందులు పిచికారీ చేయాల్సి వస్తున్నది. ముందస్తుగానే రైతులు నారుమడి సాగులో తగు జాగ్రత్తలు తీసుకుంటే తెగుళ్ల బారినుంచి తప్పించుకునే అవకాశం ఉన్నదని వ్యవసాయ శాస్త్రవేత్తలు సూచిస్తున్నారు.

– న్యూస్‌ నెట్‌వర్క్‌

అధికారుల సలహాలు పాటించాలి

ప్రస్తుతం ఉన్న వాతావరణ పరిస్థితులను దృష్టిలో పెట్టుకొని నారుమడుల్లో సాయంత్రం వేసిన నీటిని ఉదయం తొలగించాలి. చలి తీవ్రత నుంచి నారుమడిని కాపాడుకోవడానికి శాస్త్రవేత్తలు, వ్యవసాయ అధికారుల సలహాలు తీసుకుంటే మంచిది. నారుమడికి కావాల్సిన వెచ్చదనం అందించే ఎరువులను వాడుకుంటే ఫలితం ఉంటుంది.

– డా.స్వప్న, కేవీకే శాస్త్రవేత్త

పాటించాల్సిన జాగ్రత్తలు

• ప్రస్తుత వాతావరణ పరిస్థితుల్లో నారుమడిలో చలి తీవ్రతను అధిగమించడానికి సాయంత్రం వేళల్లో నీరు పెట్టి ఉదయం తీసెయ్యాలి.
• నారుమడికి వెచ్చదనాన్ని అందించేందుకు కోళ్ల ఎరువు లేదా గొర్రెల ఎరువు, వర్మి కంపోస్టును వాడితే మంచిది.
• తీవ్రస్థాయిలో చలితీవ్రత నుంచి నారుమడిని రక్షించడానికి ఒక అడుగు ఎత్తులో వెదురు బొంగులు పాతి వాటిపై ప్లాస్టిక్‌ షీట్లను రాత్రి పూట వేసి ఉదయం తొలగించాలి.
• చలికాలంలో పోషకాలు సరిగ్గా అందక కొన్నిసార్లు జింకు లోపంతో ఆకులపై తుప్పు మచ్చలు ఏర్పడుతాయి. జింక్‌ లోపాన్ని నివారించేందుకు జింక్‌ సల్ఫేట్‌ 2గ్రా. లీటరు నీటికి కలిపి వారం వ్యవధిలో రెండుసార్లు పిచికారీ చేయాలి.
• ఎకరానికి సరిపడే రెండు గుంటల నారుమడికి 2కిలోల నత్రజని రెండు దఫాలుగా 6.25కిలోల సింగిల్‌ సూపర్‌ ఫాస్పేట్‌ లేదా 2కిలోల డీఏపీ, 1కిలో పొటాష్‌నిచ్చే ఎరువులను వాడితే చలి తీవ్రత నుంచి నారు మడులను కాపాడుకోవచ్చు.