విద్యుత్‌ ఆదా మీ చేతుల్లోనే..

ఒకప్పుడు ఇంట్లో విద్యుత్‌ వాడకం చాలా తక్కువగా ఉండేది. పొద్దంతా కరెంట్‌ ఉందో.. లేదో కూడా పెద్దగా పట్టించుకునే అవసరమే ఉండేది కాదు. వాడకం అంతంత మాత్రంగానే ఉండడంతో బిల్లు కూడా తక్కువగానే వచ్చేది.

• పెరిగిపోయిన గృహావసరాల విద్యుత్‌ డిమాండ్‌
• వేసవిలో మరింత లోడ్‌..
• నెలాఖరుకు తడిసిమోపెడవుతున్న బిల్లు
• అవగాహన లేని వాడకమే కారణం
• పొదుపునకు విద్యుత్‌శాఖ సరికొత్త సూచనలు
• కొన్ని టెక్నిక్స్‌ పాటిస్తే భారం నుంచి బయటపడే అవకాశం

న్యూస్‌ నెట్‌వర్క్‌, మే 29: ఒకప్పుడు ఇంట్లో విద్యుత్‌ వాడకం చాలా తక్కువగా ఉండేది. పొద్దంతా కరెంట్‌ ఉందో.. లేదో కూడా పెద్దగా పట్టించుకునే అవసరమే ఉండేది కాదు. వాడకం అంతంత మాత్రంగానే ఉండడంతో బిల్లు కూడా తక్కువగానే వచ్చేది. బిల్లు గురించి అస్సలు టెన్షనే ఉండేది కాదు. కానీ ప్రస్తుతం కరెంట్‌ వినియోగం పెరిగిపోయింది. ఇక ఎండాకాలంలో అయితే వాడకం గురించి మాట్లాడుకోవాల్సిన అవసరమే లేదు. అంతలా డిమాండ్‌ ఏర్పడింది. ఐదుపది నిమిషాలు కరెంట్‌ పోతేనే ప్రజలు నానా హైరానా పడుతున్నారు. ఒకప్పుడు కూలర్‌ ఉంటే విలాసవంతమైన కుటుంబంగా పరిగణించేవారు. ఇప్పుడు కూలర్‌ సంగతి దేవుడెరుగు చాలా ఇండ్లలో ఏసీలే పెట్టేస్తున్నారు. ఫలితంగా రీడింగ్‌ మీటర్‌ జెట్‌స్పీడ్‌ కన్నా వేగంగా తిరుగుంతుండగా, నెలాఖరుకు బిల్‌ చూస్తే వినియోగదారులకు పట్టపగలే చుక్కలు కనిపిస్తున్నాయి. అయితే ఇలాంటి పరిస్థితుల్లో పవర్‌ సేవింగ్‌ ఎలా చేయాలి.. బిల్లును 25శాతం మేర ఎలా తగ్గించుకోవాలి..? అనే సందేహాలకు విద్యుత్‌ శాఖ చక్కటి పరిష్కారాలను చూపుతున్నది.

ఇంట్లో గదుల్లో ఫిలమెంట్‌ బల్బు వాడితే 60 వాట్లు, ఫ్లోరోసెంటు ల్యాంపులు (సీఎస్‌ఎల్‌) వాడితే 40 వాట్లు కరెంటు కాలుతుంది. వాటికి బదులు ఎల్‌ఈడీ బల్బులు వాడితే కేవలం 9 వాట్లు మాత్రమే కరెంటు కాలుతుంది. బిల్‌ తక్కువ వస్తుంది.

ఏసీ వాడకం వల్ల కరెంటు బిల్లు రూ.వేలల్లో వస్తుంది. ఒక 1.5 టన్నుల సామర్థ్యం ఉన్న ఏసీ వినియోగిస్తే గంటకు 2యూనిట్లు కరెంటు కాలుతుంది. గదిలో కిటికీలు, తలుపులు మూసి వేసి ఏసీ స్విచ్‌ వేసి 15 నిమిషాల పాటు ఫ్యాన్‌ కూడా వేయడం వల్ల గది ఉష్ణోగ్రత వేగంగా చల్లబడుతుంది. తర్వాత ఫ్యాన్‌ బంద్‌ చేయాలి. ఏసీలు వినియోగిస్తున్నప్పుడు 25 డిగ్రీల ఉష్ణోగ్రతలో వినియోగించాలి. కొందరు అవగాహన లేక 15 లేదా 17 డిగ్రీల ఉష్ణోగ్రతతో వాడడం వల్ల కరెంటు అధికంగా కాలుతుంది. ఏసీ ఫిల్టర్లు శుభ్రంగా ఉంచడం, బయట ఉండే కంప్రెషర్‌ నీడ ఉండే చోట ఉంచాలి. ఏళ్ల తరబడి ఉన్న పాత ఏసీలు, రిఫ్రిజిరేటర్లు వినియోగించకపోవడం మంచిది.

వాషింగ్‌ మెషిన్లు వినియోగిస్తున్నప్పుడు దుస్తులు ఉతకడంతో పాటు ఆరబెట్టే యంత్రాలున్నాయి. ఆరబెట్టే ఆప్షన్‌ కాకుండా శుభ్రపరిచిన వెంటనే ఆరుబయట బట్టలు ఆరవేసుకుంటే బట్టలు యంత్రం వినియోగించే సమయం తగ్గుతుంది. తద్వారా కరెంటు వినియోగం తగ్గుతుంది. వాషింగ్‌ మెషిన్‌ పని అయిపోయిన వెంటనే స్విచ్ఛాఫ్‌ చేయడం మరిచిపోవద్దు.

ఒక నెలలో దేనికెంత విద్యుత్‌..

• 40 వాట్ల్లు కలిగిన ట్యూబ్‌లైట్‌ రోజుకు 10 గంటలు వాడితే ఒక్క యూనిట్‌ కరెంట్‌ కాలుతుంది.
• 450 వాట్లు కలిగిన మిక్సీగ్రైండర్‌ గంట వాడితే 13.25 యూనిట్లు
• 3వేల వాట్ల కలిగిన హీటర్‌ రోజుకు గంట వాడితే 12యూనిట్లు
• 300వాట్ల కలిగిన వాషింగ్‌ మిషన్‌ రోజుకు గంట వాడితే 9యూనిట్లు
• 300వాట్ల కలిగిన బోరుమోటర్‌ రోజుకు గంట వాడితే 22.5యూనిట్లు
• 100వాట్ల కలిగిన టీవీ రోజుకు 10 గంటలు వాడితే 30యూనిట్లు
• 1500వాట్ల కలిగిన ఏసీ రోజుకు 6 గంటలు వాడితే 270 యూనిట్లు
• 40వాట్ల కలిగిన లైట్‌ రోజుకు 6గంటలు వాడితే 7యూనిట్లు
• 60వాట్ల కలిగిన ఫ్యాన్‌ రోజుకు 15 గంటలు వాడితే 27 యూనిట్లు
• 175 వాట్ల కలిగిన ట్యూబ్‌లైట్‌ రోజుకు 8 గంటలు వాడితే 4.2యూనిట్లు కరెంట్‌ వినియోగమవుతుంది.

ఈ టెక్నిక్స్‌ పాటిస్తే మేలు

• సాధారణంగా ఇంట్లో వినియోగించే ఫ్యాన్లు రెగ్యులేటర్‌ లేకుండా తిరుగుతుంటాయి. రెగ్యులేటర్లు ఏర్పాటు చేసుకొని ఫ్యాన్‌ వేగాన్ని నియంత్రించడం ద్వారా విద్యుత్‌ను ఆదా చేసుకోవచ్చు.
• సాధ్యమైనంత వరకు ఏండ్ల తరబడిగా వినియోగిస్తున్న స్విచ్‌ బోర్డులు, వైరింగ్‌ వంటి విద్యుత్‌ పరికరాలు కొత్తవి అమర్చుకోవడం ద్వారా ఆర్థికంగా కొంత భారమైనా కరెంటు వినియోగం తగ్గి బిల్లు ఆదా అవుతుంది.
• కూలర్లను గది బయట కిటికీకి అనుసంధానంగా పెట్టుకొని గదిలోకి చల్లని గాలి వచ్చేలా ఏర్పాటు చేసుకుంటే మంచిగా ఉంటుంది. కరెంట్‌ బిల్‌ కూడా ఆదా అవుతుంది.
• గదిలో ఎవరూ లేనప్పుడు పంకాలు, బల్బులను ఆర్పివేయాలి. అవసరమైన ప్రాంతాల్లో మాత్రమే వినియోగించాలి. ఇది చిన్న విషయంగా కనబడవచ్చు. కానీ పాటిస్తే అద్భుత ఫలితం ఉంటుంది.
• గృహాల్లో ఐఎస్‌ఐ గుర్తింపు కలిగిన స్టార్‌ రేటెడ్‌ విద్యుత్‌ ఉపకరణాలు వాడడం వల్ల కరెంటు వినియోగం తకువగా ఉంటుంది.
  టీవీలు, కంప్యూటర్లు రిమోటుతో ఆఫ్‌ చేసి స్విచ్‌లు బంద్‌ చేయకుండా వదిలేస్తారు. ఇలా చేయడం వల్ల విద్యుత్తు ప్రసారమై బిల్లు పెరుగుతుంది.
• గ్రామాల్లో పలుచోట్ల ఎలక్ట్రిక్‌ వాటర్‌ హీటర్లు, ఎలక్ట్రిక్‌ పొయ్యిలు వినియోగిస్తున్నారు. సరైన విద్యుత్‌ వినియోగ పొదుపుపై అవగాహన లేకపోవడం వల్ల బిల్లులు అధికంగా వస్తున్నాయి. వేసవిలో అధికంగా కరెంటు వినియోగించే పరికరాల వినియోగం తగ్గించడం, నియంత్రించడం ద్వారా బిల్లును అదుపులో ఉంచుకోవచ్చు.
• గ్రైండర్‌ వినియోగిస్తున్నప్పుడు నైలాన్‌ బెల్టును ఉపయోగించాలి. దీనితో యంత్రం మన్నిక చెదరదు. కరెంటు వినియోగం తకువ అవుతుంది.
• రిఫ్రిజిరేటర్‌ను గాలి దారాళంగా ఉండే చోట అమర్చుకోవాలి. తలుపు ఎకువ సమయం తీసిఉంచితే విద్యుత్‌ ఎకువ ఖర్చు అవుతుంది.

అవగాహన అవసరం..
కరెంటు వినియోగంపై అవగాహన పెంచుకొని పొదుపు పాటిస్తే బిల్లు అదుపులో ఉంటుంది. ఎలక్ట్రిక్‌ పరికరాలు వినియోగిస్తునప్పుడు వాటి సామర్థ్యంపై అవగాహన ఉండాలి. ఏసీ,మోటరు, గీజర్‌, ఫ్రిజ్‌ ఏకకాలంలో వాడితే వినియోగం పెరిగి ఆర్‌ఎండీ (రికార్డెడ్‌ మాగ్జిమం డిమాండ్‌ పెరుగడంతో అదనంగా లోడ్‌ నమోదై ప్రతి కిలోవాటుకు అదనపు చార్జీలు పడే అవకాశం ఉంది. ఇలా అదనపు చార్జీలు పడకుండా ఉండాలంటే వినియోగంపై అవగాహన తప్పనిసరి. ఒకేసారి అన్ని విద్యుత్‌ పరికరాలు వాడొద్దు. రెండు లేదా అంతకంటే ఎకువ ఏసీలు ఉన్నప్పుడు 30 నిమిషాలకు మించకుండా చూడాలి. అలా వాడితే ఆర్‌ఎండీ నియంత్రణలో ఉంటుంది. అదనపు చార్జీలు పడవు.
– సంపత్‌ రెడ్డి, ఏఈ