హత్యా..ఆహ్మహత్యా

కలకలం రేపిన మొయినాబాద్‌ యువతి అనుమానాస్పద మృతి కేసును పోలీసులు ఛేదించారు. మృతురాలు పాతబస్తీకి చెందిన యువతిగా గుర్తించారు. ఆమెది హత్య కాదు..ఆత్మహత్యగా తేల్చారు.

• మొయినాబాద్‌ యువతి మృతి కేసులో ప్రశ్నలెన్నో ఎట్టకేలకు మృతురాలిని గుర్తించిన పోలీసులు
• అనుమానాలకు తావిస్తున్న పోలీసుల భిన్న ప్రకటనలు

కలకలం రేపిన మొయినాబాద్‌ యువతి అనుమానాస్పద మృతి కేసును పోలీసులు ఛేదించారు. మృతురాలు పాతబస్తీకి చెందిన యువతిగా గుర్తించారు. ఆమెది హత్య కాదు..ఆత్మహత్యగా తేల్చారు. ఈనెల 8న మొయినాబాద్‌, బాకారం గ్రామం, డ్రీమ్‌ వ్యాలీ రిసార్ట్స్‌ సమీపంలో గుర్తుతెలియని మృతదేహం కాలిపోతున్నట్లు 100 నంబర్‌కు కాల్‌ వచ్చింది.

పోలీసులు అక్కడికి చేరుకునే సరికే మృతదేహం పూర్తిగా కాలిపోయింది. ఘటనా స్థలిలో సిమ్‌ లేని సెల్‌ఫోన్‌ కనిపించింది. క్లూస్‌టీమ్‌, జాగిలాలతో పరిసరాల్లో ఆధారాలను సేకరించారు. తొలుత ఆ యువతిని ఎవరో హత్యచేసి కాల్చివేసినట్లు అనుమానించిన పోలీసులు.. మృతురాలిని గుర్తించే క్రమంలో దర్యాప్తు ప్రారంభించారు. మొయినాబాద్‌ పోలీసులతో పాటు రాజేంద్రనగర్‌ సీసీఎస్‌ పోలీసులు రంగంలోకి దిగి సీసీ కెమెరాలు, టవర్‌ లొకేషన్‌, సిమ్‌కార్డ్‌ ట్రాకింగ్‌తో పాటు రాష్ట్రవ్యాప్తంగా ఉన్న 200 మిస్సింగ్‌ కేసులను విశ్లేషించారు.

– సిటీబ్యూరో, జనవరి 12 (నమస్తే తెలంగాణ):

పోలీసుల కథనం ప్రకారం.. ఈనెల 8న మధ్యాహ్నం 1.30 నుంచి 2 గంటల సమయంలో ఒక ఆటో యెంకపల్లి నుంచి బాకారం వైపు వెళ్లినట్లు సీసీ కెమెరాలో రికార్డు అయింది. ఆ ఫుటేజీ ఆధారంగా ఆటో డ్రైవర్‌ను రాజేంద్రనగర్‌కు చెందిన సయీద్‌ వాసిమ్‌గా గుర్తించారు. అతడిని విచారించగా ఆ రోజు ఉదయం 11.30 గంటల సమయంలో ఓ యువతి మల్లేపల్లిలో తన ఆటో ఎక్కిందని, డ్రీమ్‌ వ్యాలీకి వెళ్లాలని రూ.1100కు మాట్లాడినట్లు వెల్లడించాడు.

తొలుత మురాద్‌నగర్‌లోని తన స్నేహితుల ఇంటికి వెళ్లాక.. హుమాయున్‌నగర్‌లోని రాయల్‌ కాలనీలో ఉన్న మరో స్నేహితురాలి ఇంటికి వెళ్లిందన్నాడు. 15 నిమిషాల తరువాత వచ్చిన యువతి ఐదు లీటర్ల డబ్బా ఉన్న బ్యాగ్‌తో వచ్చి, తిరిగి ఆటోలో ఎక్కి మొయినాబాద్‌ డ్రీమ్‌ వ్యాలీ వెళ్లినట్లు వెల్లడించారు. అక్కడ ఓ ఫామ్‌హౌస్‌ వద్ద ఆటో దిగిన ఆ యువతి.. తనకు ఆటో చార్జ్‌ రూ.1100 ఇచ్చినట్లు డ్రైవర్‌ తమ విచారణలో వెల్లడించాడని పోలీసులు తెలిపారు. ఆ తరువాత మధ్యాహ్నం 1.53

గంటల సమయంలో తన

స్నేహితుడైన రాహిల్‌కు ఫోన్‌ చేసి, ఆ తరువాత తన మొబైల్‌ను స్విచ్ఛాఫ్‌ చేసినట్లు దర్యాప్తులో నిర్ధారించారు. ఈ ఫోన్‌ కాల్‌ ఆధారంగా రాహిల్‌ను విచారించగా సదరు యువతి పాతబస్తీలోని మల్లేపల్లికి చెందిన తహసీన్‌ బేగంగా గుర్తించినట్లు తెలిపారు. తహ్సీమ్‌ బేగం తన క్లాస్‌ మేట్‌ ఒక స్నేహితురాలితో చాలా సన్నిహితంగా ఉండేది.

ఈ క్రమంలో ఇటీవల ఇరువురి మధ్య తలెత్తిన మనస్పర్థలతో కొన్ని రోజులుగా ఇరువురు దూరంగా ఉంటున్నారని, అంతేకాకుండా వీరి సన్నిహిత్యంపై కుటుంబసభ్యులు అభ్యంతరం చెప్పడంతో తహసీన్‌ బేగం డిప్రెషన్‌కు గురై, గతంలో ఓ సారి ఆత్మహత్యాయత్నానికి పాల్పడినట్లు దర్యాప్తులో తేలిందని పోలీసులు వివరించారు. ఈ క్రమంలోనే మానసిక ఒత్తిడికి లోనైన తహసీన్‌ బేగం తన స్నేహితురాలి ఎడబాటును తట్టుకోలేక ఆత్మాహుతికి పాల్పడినట్లు పోలీసులు వెల్లడించారు.

ఈ ప్రశ్నలకు బదులేది

• ఘటనా స్థలిలో యువతి మృతదేహాన్ని పరిశీలించిన మొయినాబాద్‌ పోలీసులు..ఎక్కడో హత్య చేసి..ఇక్కడకు తీసుకొని.. పెట్రోల్‌ పోసి నిప్పంటించినట్లు ఉందని, ఇది ముమ్మాటికీ హత్యేనని జనవరి 8న వెల్లడించారు.
• మృతురాలు హబీబ్‌నగర్‌కు చెందిన యువతిగా గుర్తించి, ఆమెది అనుమానాస్పద మృతి అయిన, జరిగిన పరిణామాలతో ఆత్మహత్యగా భావిస్తున్నామని, పోస్టుమార్టం నివేదిక తరువాత అసలు విషయం వెలుగులోకి వస్తుందంటూ సైబరాబాద్‌ పోలీసులు ఆ తర్వాత ప్రకటించారు.
• ఘటన జరిగిన రోజు, మృతురాలు గుర్తించిన తర్వాత రెండు వేర్వేరు వాదనలు పోలీసులు వెల్లడించడం వెనుక కారణాలేమిటి అనే విషయాలు ఇప్పుడు సర్వత్రా చర్చనీయాంశమయ్యాయి.
• ఆత్మహత్య అయితే ఘటన స్థలంలో మృతురాలు మంటల్లో కాలుతూ.. అటు ఇటూ కదిలిన అనవాళ్లు ఉండాలి. సెల్‌ఫోన్‌లో సిమ్‌కార్డు ఎందుకు తీస్తుందనే సందేహాలు వస్తున్నాయి.
• శరీరంతో పాటు దుస్తులు కూడా పూర్తి కాలిపోయాయని, జీన్స్‌ పాయింట్‌కు ఉండే పౌచ్‌ మాత్రమే దొరికిందని..ఆ యువతి జీన్స్‌ వేసుకుని ఉండవచ్చని లేదా ఏదైనా హ్యాండ్‌ బ్యాగ్‌ ఉండవచ్చని ఘటన జరిగిన రోజు పోలీసులు తెలిపారు. ఇది మినహా మిగిలిన ఆధారాలేవీ లేవని స్పష్టం చేశారు. ఎఫ్‌ఐఆర్‌లో ఓ ప్రత్యక్ష సాక్షి తనకు అక్కడ అగ్గిపెట్టె కనిపించిందని చెప్పారు. కానీ ఇప్పుడు పోలీసులు పెట్రోలు క్యాన్‌ కూడా ఉందని చెబుతున్నారు.
• ఘటన జరిగిన రోజు కాలిన మృతదేహం దగ్గర కేవలం ఫోన్‌ మాత్రమే దొరికిందని, అందులో సిమ్‌లేదని
  పోలీసులు చెప్పారు. కానీ శుక్రవారం మాత్రం ఫోన్‌నంబర్‌ ఆధారంగా ఆమెను గుర్తించినట్లు చెప్పారు. ఇలా పలు అంశాల్లో అస్పష్టత ఉండటంతో ఇది హత్యనా? ఆత్మహత్యనా? అనే అనుమానాలు వ్యక్తమయ్యాయి. ఈ నేపథ్యంలోనే శుక్రవారం మృతురాలిని పాతనగరానికి చెందిన యువతిగా గుర్తించిన పోలీసులు ఆమెది హత్యకాదు, ఆత్మహత్యగా తేల్చేశారు.