నగరంలో ఫ్రెష్‌ రూమ్స్‌

గ్రేటర్‌ హైదరాబాద్‌లో 23 చోట్ల బహుళ వినియోగ మరుగుదొడ్లు అందుబాటులోకి రానున్నాయి. సీఎస్‌ఆర్‌ పద్ధతిలో 14 సంవత్సరాల కాల వ్యవధితో మల్టీపర్పస్‌ పబ్లిక్‌ ఫ్రెష్‌ రూమ్స్‌ (టాయిలెట్లు) ఏర్పాటుకు స్టాండింగ్‌ కమిటీ ఆమోదం తెలిపింది. ‘ ది అర్బన్‌ లూ కంపెనీ సొంత నిధులతో టాయిలెట్లను నిర్మించి, నిర్వహణ చేపట్టనుంది. పే అండ్‌ యూజ్‌ పద్ధతిలో వినియోగదారుల నుంచి రుసుం వసూలు చేయనుంది.

• రహదారుల అభివృద్ధికి ఆస్తుల సేకరణ
• మేయర్‌ గద్వాల్‌ విజయలక్ష్మి
• స్టాండింగ్‌ కమిటీ సమావేశంలో 18 అంశాలకు ఆమోదం

సిటీబ్యూరో, జూన్‌ 28 (నమస్తే తెలంగాణ) : గ్రేటర్‌ హైదరాబాద్‌లో 23 చోట్ల బహుళ వినియోగ మరుగుదొడ్లు అందుబాటులోకి రానున్నాయి. సీఎస్‌ఆర్‌ పద్ధతిలో 14 సంవత్సరాల కాల వ్యవధితో మల్టీపర్పస్‌ పబ్లిక్‌ ఫ్రెష్‌ రూమ్స్‌ (టాయిలెట్లు) ఏర్పాటుకు స్టాండింగ్‌ కమిటీ ఆమోదం తెలిపింది. ‘ ది అర్బన్‌ లూ కంపెనీ సొంత నిధులతో టాయిలెట్లను నిర్మించి, నిర్వహణ చేపట్టనుంది. పే అండ్‌ యూజ్‌ పద్ధతిలో వినియోగదారుల నుంచి రుసుం వసూలు చేయనుంది. ఈ టాయిలెట్లలో శానిటరీ నాప్‌కిన్ల డిస్పెన్సరీ, బేబీ చేజింగ్‌ స్పేస్‌, వాటర్‌ లెస్‌ టాయిలెట్‌, వాసనలేని యూరినల్స్‌ తదితర ప్రత్యేకతలు ఉంటాయి. జీహెచ్‌ఎంసీ ప్రధాన కార్యాలయంలో బుధవారం మేయర్‌ గద్వాల్‌ విజయలక్ష్మి అధ్యక్షతన నిర్వహించిన స్టాండింగ్‌ కమిటీ సమావేశంలో 18 అంశాలకు కమిటీ సభ్యులు ఆమోదం తెలిపారు.

బక్రీద్‌ను ముస్లిం సోదరులు భక్తి శ్రద్ధలతో జరుపుకోవాలని మేయర్‌ సూచించారు. బక్రీద్‌ సందర్భంగా నగరంలోని రోడ్లు, మజీద్‌లను శుభ్రం చేయాలని, రోడ్లపై పేరుకుపోయిన చెత్తను వెనువెంటనే తొలగించేందుకు అన్ని చర్యలు చేపట్టాలని జోనల్‌ కమిషనర్‌లను ఆదేశించారు. కొత్తగా ఏర్పాటైన వార్డు ఆఫీస్‌ కార్యాలయాల అధికారులు పబ్లిక్‌ గ్రీవెన్స్‌ను స్వీకరించి నిర్ణీత కాలంలో పరిష్కరించేలా జోనల్‌ కమిషనర్లు పర్యవేక్షించాలని తెలిపారు. వార్డు కార్యాలయాలపై కార్పొరేటర్లు స్థానిక ప్రజలకు అవగాహన కల్పించాలని సూచించారు. స్టాండింగ్‌ కమిటీ సభ్యులు శాంతి సాయిజెన్‌ శేఖర్‌, సయ్యద్‌ సోహెల్‌ఖాద్రీ, సమీనా బేగం, అబ్దుల్‌ వాహెబ్‌, మహమ్మద్‌ అబ్దుల్‌ ముక్తర్‌, మహమ్మద్‌ రషీద్‌, ఫరాజుద్దీన్‌, ఆర్‌ సునీత, టి. మహేశ్వరీ తదితరులు పాల్గొన్నారు.

స్టాండింగ్‌ కమిటీ సమావేశంలో ఆమోదం పొందిన అంశాలివే..

• సనత్‌నగర్‌ సర్కిల్‌ దాసారం బస్తీలో రూ.6 కోట్లతో చేపట్టాల్సిన మల్టీపర్పస్‌ ఫంక్షన్‌ హాల్‌ను రాంగోపాల్‌పేటలో జీహెచ్‌ఎంసీకి చెందిన ఓపెన్‌ప్లేస్‌లో స్థలం మార్పు చేసి 450 గజాల్లో రూ.4.90కోట్ల రివైజ్డ్‌ అంచనా వ్యయంతో చేపట్టేందుకు ఆమోదం తెలిపింది.
• కల్పతరు రెసిడెన్సీ నుంచి తిరుమల కాన్వెంట్‌ స్కూల్‌ వరకు 30 మీటర్ల వెడల్పుతో మిస్సింగ్‌ రోడ్డు నిర్మాణానికి 306 చోట్ల ఆస్తుల సేకరణ
• ఎయిర్‌పోర్టు రోడ్‌ వయా దివ్యశక్తి ప్రై.లి వరకు 12 మీటర్లతో నూతన రహదారికి 15 చోట్ల ఆస్తుల సేకరణకు ఆమోదం
• బొల్లారం కల్వరీ స్టేషన్‌ వద్ద ఆర్వోబీ, రహదారి విస్తరణకు 106 చోట్ల ఆస్తుల సేకరణ, బల్కంపేట నుంచి లాల్‌బంగ్లా అమీర్‌పేట రోడ్‌ వయా నేచర్‌క్యూర్‌ హాస్పిటల్‌ , శ్యామ్‌ కరణ్‌ రోడ్‌ వరకు 18 మీటర్ల రహదారి అభివృద్ధికి 136 చోట్ల ఆస్తుల సేకరణకు ఆమోదం.
• మదీనాగూడ ఈర్ల చెరువు వద్ద మురుగునీటి మళ్లింపు చర్యలు, బాక్స్‌ డ్రైయిన్‌ల నిర్మాణం, పైపులైన్‌ పనులను రూ. 2.63కోట్లతో చేపట్టేందుకు ప్రతిపాదనలు
• ఖైరతాబాద్‌ మోడల్‌ వార్డు ఆఫీస్‌ నిర్మాణానికి రూ.4.35కోట్ల పనులు
• ఎల్లారెడ్డిగూడలో రూ.5.50కోట్లతో పీజేఆర్‌ కమ్యూనిటీ హాల్‌ పునరుద్ధరణ, హైటెక్స్‌ రోడ్‌ నుంచి హైటెక్‌ సిటీ ఫ్లై ఓవర్‌ వయా ఎన్‌ కన్వెన్షన్‌ రహదారి విస్తరణకు 30 ప్రాంతాల్లో ఆస్తుల సేకరణ
• బండ్లగూడ నుంచి ఎలక్ట్రికల్‌ సబ్‌ స్టేషన్‌, శ్రీశైలం హైవే వరకు రహదారి అభివృద్ధి పనులకు 137 చోట్ల ఆస్తుల సేకరణ
• హబీబ్‌నగర్‌ నుంచి రియాసత్‌ నగర్‌ జంక్షన్‌ వరకు ప్రతిపాదిత 40 ఫీట్ల రహదారి వెడల్పునకు రూ.2.70 కోట్ల వ్యయంతో పరిపాలన అనుమతి