అడుగడుగునా అడ్డగింత..

జిల్లాలోని గ్రీన్‌ఫీల్డ్‌ ప్రతిపాదిత గ్రామాల్లోకి రోడ్డు సర్వేకోసం వస్తున్న అధికారులను రైతులు ఎక్కడికక్కడ అడ్డుకుంటున్నారు. రెండోవిడత రోడ్డు సర్వేకోసం ప్రతిపాదిత గ్రామాల్లోకి అధికారులు వెళ్తే.. తమ గ్రామాల్లోకి రానే రావొద్దు అంటూ అన్నదాతలు మూకుమ్మడిగా అడ్డుకుని సర్వేను చేయ నీవ్వడం లేదు.

• రోడ్డు సర్వేను అడ్డుకుంటున్న గ్రీన్‌ఫీల్డ్‌ ప్రతిపాదిత గ్రామాల్లోని రైతులు
• తమ గ్రామాల్లోకి రానే రావొద్దంటూ సూచన
• అధికారులు భారీ పోలీసు బలగాలతో వచ్చినా సమష్టిగా ఎదుర్కొంటున్న అన్నదాతలు
• ఇప్పటి వరకు సర్వేను అడ్డుకున్న గ్రామాలు

జిల్లాలోని గ్రీన్‌ఫీల్డ్‌ ప్రతిపాదిత గ్రామాల్లోకి రోడ్డు సర్వేకోసం వస్తున్న అధికారులను రైతులు ఎక్కడికక్కడ అడ్డుకుంటున్నారు. రెండోవిడత రోడ్డు సర్వేకోసం ప్రతిపాదిత గ్రామాల్లోకి అధికారులు వెళ్తే.. తమ గ్రామాల్లోకి రానే రావొద్దు అంటూ అన్నదాతలు మూకుమ్మడిగా అడ్డుకుని సర్వేను చేయ నీవ్వడం లేదు. రెండోవిడతలో కందుకూరు మండలంలోని పంజాగూడ నుంచి కుర్మిద్ద, కడ్తాల్‌, ఆమనగల్లు మండలాల మీదుగా ఆకుతోటపల్లి వరకు సుమారు 21 కిలోమీటర్ల దూరం 330 అడుగుల రోడ్డు వెడల్పు కు 554 ఎకరాల భూమిని రైతుల నుంచి సేకరించాలని ప్రభుత్వం నిర్ణయించింది.

-రంగారెడ్డి, జనవరి 9 (నమస్తే తెలంగాణ)

• ముద్విన్‌ గ్రామంలో ఈనెల 6న గ్రీన్‌ఫీల్డ్‌ రోడ్డు సర్వే చేసేందుకు వెళ్లిన అధికారులను స్థానిక రైతులు అడ్డుకున్నారు. తమ గ్రామంలో సర్వే చేయొద్దని భీష్మించుకుని కూర్చోవడంతో అధికారులు వెనుతిరిగారు.
• ఈనెల 7న కడ్తాల్‌ మండలంలోని ఎక్వాయిపల్లిలో గ్రీన్‌ఫీల్డ్‌ రోడ్డు సర్వేకు అధికారులు వెళ్లగా.. ఈ విషయం తెలుసుకున్న భూములు కోల్పోతున్న రైతులు.. గ్రామస్తులు, రాజకీయ పార్టీల నాయకులతో కలిసి సర్వే ను అడ్డుకున్నారు. అధికారులు రైతులకు ఎంత నచ్చజెప్పినా వినిపించు కోకపోవడంతో ఆఫీసర్లు వెనుతిరిగారు.
• ఈనెల 8న ఆమనగల్లు మండలంలోని సాకిబండాతండాలో రోడ్డు సర్వే కోసం అధికారులు వస్తున్నట్లు సమాచారం అందుకున్న బాధిత రైతులు వివిధ పార్టీలకు చెందిన నాయకులతో కలిసి సర్వే చేయాలనుకున్న పంట పొలాల్లో బైఠాయించారు. ఎట్టి పరిస్థితుల్లో సర్వే చేయనివ్వమని.. తమను చంపి.. తమ మృత దేహాలపై సర్వే చేసుకోవాలని తేగేసి చెప్పడంతో అధికారులు అక్కడి నుంచి వెనుదిరిగారు.
• అలాగే, ఈనెల 9( గురువారం)వ తేదీ యాచారం మండలంలోని కుర్మిద్ద అనుబంధ గ్రామమైన మంగలిగడ్డతండాలో అధికారులు సర్వే చేసేందుకు వెళ్లగా తండావాసులు అడ్డుకున్నాయి. ఇప్పటికే తమ గ్రామంలో ఫార్మాసిటీ కోసం అసైన్డ్‌భూములను తీసుకున్నారని, పట్టా భూములనూ బలవంతంగా తీసుకునే ప్రయత్నంలో వాటిని నిషేధిత జాబితాలో చేర్చి తమకు రైతుబంధు, పంట రుణాలు రాకుండా చేశారని ఆగ్రహం వ్యక్తం చేశారు. ఇక తమ వద్ద ఉన్న ఎకరం, అర ఎకరం భూమిని రోడ్డు కోసం తీసుకుంటే ఎలా బతకాలని ప్రశ్నించారు. ఒక్క గ్రామంలోనే మూడు విడతలుగా భూసేకరణ చేయటమేమిటని మండిపడ్డారు. ఆర్డీవో అనంతరెడ్డి, పోలీసులు నచ్చజెప్పినా వారు వినిపించుకోకపోవడంతో చేసేదేమీలేక అధికారులు వెనుతిరిగారు.

నిర్బంధాన్ని లెక్కచేయని రైతులు..

గ్రీన్‌ఫీల్డ్‌ రోడ్డు సర్వే కోసం అధికారులు గ్రామాల్లోకి భారీ పోలీసు బలగా లతో వెళ్తున్నారు. అయినా రైతులంతా సమష్టిగా ఉండి పోలీసులను అడ్డుకుని సర్వేను ముందుకు సాగనివ్వడం లేదు. సర్వేను అడ్డుకుంటే కేసులు కూడా పెడతామని పోలీసులు బెదిరిస్తున్నా వారు లెక్క చేయడం లేదు. రైతులంతా సమష్టిగా ఉండి సర్వేను అడ్డుకుంటుండడంతో అధికారులు లగచర్ల ఘటనను దృష్టిలో ఉంచుకుని వెను తిరుగుతున్నారు.