పరీక్షల సమయం ఆందోళన వద్దు..

పరీక్షల షెడ్యూల్‌ ఇప్పటికే విడుదలైంది. విద్యార్థుల భవిష్యత్తును నిర్దేశించేవి పదో తరగతి, ఇంటర్మీడియట్‌ పరీక్షలు.. పాఠశాలలు, కళాశాలల్లో హడావిడి మొదలైంది. ఉదయం, సాయంత్రం వేళల్లో ప్రత్యేక తరగతులు నిర్వహిస్తున్నారు.

• సబ్జెక్ట్‌పై పట్టు సాధిస్తే ర్యాంకుల పంటే..
• ఒత్తిడికి గురికావద్దు.. ఏకాగ్రత చాలు
• గ్రూప్‌ స్టడీస్‌తో మంచి ఫలితాలు సాధించవచ్చంటున్న నిపుణులు

ఇబ్రహీంపట్నం, డిసెంబర్‌ 15 : పరీక్షల షెడ్యూల్‌ ఇప్పటికే విడుదలైంది. విద్యార్థుల భవిష్యత్తును నిర్దేశించేవి పదో తరగతి, ఇంటర్మీడియట్‌ పరీక్షలు.. పాఠశాలలు, కళాశాలల్లో హడావిడి మొదలైంది. ఉదయం, సాయంత్రం వేళల్లో ప్రత్యేక తరగతులు నిర్వహిస్తున్నారు. అన్నింటిని మించి తల్లిదండ్రులకు మరింత ఒత్తిడి పెంచింది. సిలబస్‌ దాదాపుగా పూర్తికావచ్చింది. మళ్లీ పునశ్చరణ తరగతులు, స్లిప్‌టెస్ట్‌ల నిర్వహణ చేయడానికి సన్నద్ధమవుతున్నారు.

ఉదయం 8 గంటల నుంచి సాయంత్ర ం 7 గంటల వరకు బోధనను కొనసాగిస్తున్నారు. దీంతో విద్యార్థులపై ఒత్తిడి పెరుగుతుంది. ఉత్తమ ఫలితాలు సాధించాలంటే ఈ మాత్రం చదువులు కొనసాగించాల్సిందేనన్న భావనతో ముందుకెళ్తున్నారు. పరీక్షల్లో ప్రతిభను చూపాలనే తపన విద్యార్థుల్లో ఉండాలి. చదువుతున్న సబ్జెక్టుపై పూర్తిస్థాయి పట్టుసాధించాలి. ప్రాథమిక అంశాలపై ఉపాధ్యాయులు అవగాహన కల్పించినట్లయితే విద్యార్థులు ఎక్కువగా ఒత్తిడికి గురికారు. ఆందోళన చెందకుండా ఏకాగ్రతతతో చదువుపై దృష్టి సారించాలి. ముఖ్యంగా బీఆర్‌ఎస్‌ ప్రభుత్వ హయాంలో పాఠశాలలు, కళాశాలల్లో ఉత్తమ ఫలితాల సాధనకు కృషి చేశారు.

సరైన సమయం తెల్లవారుజామునే..

• ప్రతిరోజూ చదువుకు పది గంటల, నిద్రకు ఏడుగంటల సమయం కేటాయించుకోవాలి.
• వేకువజామున 5-7 గంటల మధ్య చదివిన పాఠ్యాంశాలు మామూలు సమయంలో 10గంటలు చదివిన దానితో సమానం.
• ఇప్పటివరకు చదివిన పాఠ్యాంశాలను పునశ్చరణ చేసుకోవాలి.
• పదో తరగతి విద్యార్థులు అధిక మార్కులు సాధించేందుకు ఆబ్జెక్టీవ్‌ ప్రశ్నలు కూడా చాలా ముఖ్యమైనవి.
• పరీక్షలకు ముందు నిర్వహించే ప్రీఫైనల్‌ పరీక్షలను తప్పనిసరిగా రాయాలి. ఫైనల్‌ పరీక్షలకు ఇవి ప్రయోజనం చేస్తాయి.
• సాధ్యమైనంత వరకు సెల్‌ఫోన్‌, టీవీలకు దూరంగా ఉండడం మంచిది.
• ఉపాధ్యాయులు చెప్పిన విషయాలు అర్థం కాకుంటే మళ్లీ అడుగాలి.
• లక్ష్యాన్ని సాధించుకోవాలనే తపన ప్రతి విద్యార్థిలో ఉండాలి. అప్పుడే లక్ష్యం సాధ్యమవుతుంది.
• విద్యార్థులపై తల్లిదండ్రులు జాగ్రత్త వహించాలి. పిల్లలకు ధైర్యం చెప్పి వారిని ఉత్తేజ పర్చాలి.
• గత పరీక్షల నుంచి వస్తున్న ప్రశ్నలను పరిశీలించి వాటికి తగినట్లుగా చదువుకోవాలి.
• ప్రణాళికాబద్ధంగా చదువుతో పాటు గ్రూప్‌స్టడీస్‌ ప్రోత్సహించాలి.
• ర్యాంకులు సాధించాలనే ద్యాసలో పిల్లలు నిద్రకు ఆహారానికి దూరం కాకుండా జాగ్రత్త తీసుకోవాలి.
• విద్యార్థుల మానసిక స్థితిని అంచనా వేసి పాఠ్యాంశాలను బోధించాలి.
• చదువులో వెనుకబడిన విద్యార్థులపై ప్రత్యేక దృష్టి సారించి వారికి తరగతులను నిర్వహించాలి.
• అండగా మేమున్నామనే భరోసా పిల్లలకు ఇవ్వడం ఎంతైనా అవసరం.

ప్రత్యేక తరగతులను నిర్వహిస్తున్నాం..

జిల్లాలోని అన్ని పాఠశాలల్లోని పదో తరగతి విద్యార్థులకు ఇప్పటికే ప్రత్యేక తరగతులను ప్రారంభించాం. ఉదయం. సాయంత్రం వేళల్లో తరగతులు కొనసాగుతున్నాయి. పాఠశాలల ప్రధానోపాధ్యాయులు, ఉపాధ్యాయులు ప్రణాళికాబద్ధంగా సబ్జెక్టుల వారీగా బోధిస్తున్నారు. వంద శాతం ఉత్తీర్ణత, మంచి గ్రేడ్‌లు సాధించేలా విద్యార్థులను సన్నద్ధం చేస్తున్నాం.

– సుశిందర్‌రావు, జిల్లా విద్యాధికారి