జిల్లాలో 358 మందికి దళిత బంధు

రాష్ట్ర ప్రభుత్వం ప్రతిష్టాత్మకంగా అమలు చేస్తున్న ‘దళితబంధు’తో వాహనాలు, వ్యవసాయ పని ముట్లు, ట్రాక్టర్లు తదితర యూనిట్లు అందించి వారి ఆర్థికాభివృద్ధికి తోడ్పాటునందించడం జరుగుతున్నదని వికారాబాద్‌ కలెక్టర్‌ నిఖిల అన్నారు.

•  ‘మన ఊరు-మన బడి’ కింద 371 పాఠశాలలను ఎంపిక చేయగా, రూ.6.45 కోట్లతో పనులు
• కేసీఆర్‌ కిట్‌ పథకంతో ఏడాదిలో జిల్లాలో 6,284 కిట్లు అందజేత
• అనంతగిరి అడవిలో 750 ఎకరాల విస్తీర్ణంలో ఔషధ మొక్కలు
• వికారాబాద్‌ కలెక్టర్‌ నిఖిల
• కలెక్టరేట్‌లో ఘనంగా గణతంత్ర దినోత్సవం

రాష్ట్ర ప్రభుత్వం ప్రతిష్టాత్మకంగా అమలు చేస్తున్న ‘దళితబంధు’తో వాహనాలు, వ్యవసాయ పని ముట్లు, ట్రాక్టర్లు తదితర యూనిట్లు అందించి వారి ఆర్థికాభివృద్ధికి తోడ్పాటునందించడం జరుగుతున్నదని వికారాబాద్‌ కలెక్టర్‌ నిఖిల అన్నారు. గణతంత్ర దినోత్సవం సందర్భంగా గురువారం కలెక్టరేట్‌లో జాతీయ జెండాను ఆవిష్కరించి కలెక్టర్‌ మాట్లాడారు. ‘మన ఊరు-మన బడి’ మొదటి విడుతలో 371 పాఠశాలలను ఎంపిక చేయగా, రూ.6.45కోట్లతో పనులు జరుగుతున్నాయన్నారు. 2022-23 సంవత్సరానికి గాను జిల్లాలో 6,284 కేసీఆర్‌ కిట్లను అందజేసినట్లు తెలిపారు. అనంతగిరి అడవిలో 750 ఎకరాల విస్తీర్ణంలో ఉన్న సహజ సిద్ధ ఔషధ మొక్కలను కాపాడేందుకు తగు చర్యలు తీసుకుంటున్నామన్నారు. అనంతరం జిల్లాలో వివిధ శాఖల్లో ఉత్తమ ప్రతిభను కనబర్చిన 187 మంది అధికారులు, సిబ్బందికి కలెక్టర్‌ ప్రశంసాపత్రాలను అందజేశారు.

వికారాబాద్‌, జనవరి 26 : అభివృద్ధి, సంక్షేమ పథకాలతో జిల్లా ముందంజలో దూసుకుపోతున్నదని వికారాబాద్‌ కలెక్టర్‌ నిఖిల తెలిపారు. వికారాబాద్‌ కలెక్టర్‌ కార్యాలయంలో 74వ గణతంత్ర వేడుకలు ఘనంగా జరిగాయి. ఈ సందర్భంగా కలెక్టర్‌ నిఖిల మాట్లాడారు.

• వికారాబాద్‌ జిల్లాలో దళిత బంధు పథకం ద్వారా 5 నియోజకవర్గాల్లో 358 మంది లబ్ధి పొందినట్లు కలెక్టర్‌ తెలిపారు. ఈ పథకంతో వాహనాలు, వ్యవసాయ పనిముట్లు, ట్రాక్టర్లు తదితర సాధనాలు ఇప్పించి వారి ఆర్థికాభివృద్ధికి తోడ్పాటునందిస్తున్నాం.
• మన ఊరు మన బడి కార్యక్రమంలో భాగంగా కనీస వసతులైన గదులు, మరమ్మతులు, నూతన గదుల నిర్మాణం, ఫర్నిచర్లు, మూత్రశాలల నిర్మాణాల కోసం పాఠశాలలను ఎంపిక చేశారు. మొదటి విడుతలో 371 పాఠశాలలను ఎంపిక చేయగా, రూ.6.45కోట్లతో పనులు జరుగుతున్నాయి. 265 పాఠశాలల్లో పనులు వివిధ దశల్లో ఉన్నాయని ఆమె తెలిపారు.
• కేసీఆర్‌ కిట్‌ పథకంతో జిల్లాలో 2022-23 సంవత్సరానికి 6,284 కేసీఆర్‌ కిట్లు అందజేసినట్లు తెలిపారు.
• 14,099 మంది గర్భిణులకు సేవలందించగా.. అందులో 12,853 మంది ప్రసవాలు ప్రభుత్వ దవాఖానల్లో జరిగాయని వివరించారు. తెలంగాణ డయాగ్నోస్టిక్‌ సెంటర్‌ ద్వారా ఇప్పటివరకు జిల్లాలో 79,103 మందికి వివిధ రకాల ఆరోగ్య పరీక్షలను నిర్వహించినట్లు చెప్పారు. ఆరోగ్యశ్రీ పథకం కింద ఇప్పటివరకు 9,720 మందికి రూ.2.14 కోట్ల విలువగల వైద్య సేవలను అందించినట్లు పేర్కొన్నారు. కంటి వెలుగులో భాగంగా ఇప్పటివరకు 42 పరీక్ష కేంద్రాల ద్వారా 28,287 మందికి కంటి పరీక్షలు జరుపగా.. వారిలో 5,040 మందికి కంటి అద్దాలు అందజేసినట్లు కలెక్టర్‌ పేర్కొన్నారు.
• సమగ్ర అభివృద్ధి, మెరుగైన సేవలే లక్ష్యంగా చేపట్టిన పల్లె, పట్టణ ప్రగతి కార్యక్రమాల్లో భాగంగా వైకుంధామాలు, స్మృతి వనాలు, పిల్లలు, పెద్దలకు ఆహ్లాదకరమైన పార్కులు, పచ్చదనం కోసం నర్సరీల ఏర్పాటు, మొక్కల పెంపకం, డంపింగ్‌యార్డులు, ప్రభుత్వ భవనాలకు మరమ్మతులు చేయించినట్లు వివరించారు.
• 2022-23లో హరితహారం కార్యక్రమంలో భాగంగా అటవీ శాఖ ఆధ్వర్యంలో జిల్లాలో ఇప్పటివరకు 37,55 లక్షల మొక్కలను వివిధ శాఖల ద్వారా 292.70 ఎకరాల్లో నాటామన్నారు. అనంతగిరి అడవిలో 750 ఎకరాల విస్తీర్ణంలో ఉన్న సహజ సిద్ధ ఔషధ మొక్కలను కాపాడుటకు తగు చర్యలు తీసుకుంటున్నామని పేర్కొన్నారు.
• మిషన్‌ భగీరథ పథకం ద్వారా ఇంటింటికీ మంచినీటిని అందిస్తున్నట్లు తెలిపారు.
• 97 రైతు వేదికలను రూ.19.89కోట్లతో నిర్మించి అందుబాటులోకి తీసుకువచ్చామన్నారు. యాసంగి 2022లో రైతు బంధు పథకం కింద 2,39,183 మంది రైతులకు రూ.268.55 కోట్లను రైతుల బ్యాంకుల ఖాతాల్లో జమ చేసినట్లు తెలిపారు. రైతు బీమా పథకం కింద 256 మంది నామినీలకు రూ.12.80 కోట్లను అందించామన్నారు. 2022-23 యాసంగి సీజన్‌లో 126 ధాన్యం కొనుగోలు కేంద్రాల ద్వారా 17,616 మంది రైతుల నుంచి 96,701 మెట్రిక్‌ టన్నుల వరి ధాన్యం కొనుగోలు చేసి, రూ.195 కోట్లను వారి బ్యాంకు ఖాతాల్లో జమ చేసినట్లు పేర్కొన్నారు.
• రెండో విడుత గొర్రెల పంపిణీ కార్యక్రమంలో భాగంగా 11,866 మంది లబ్ధిదారులకు ఒక యూనిట్‌కు రూ.1,31,250 చొప్పున 75 శాతం సబ్సిడీతో పంపిణీ చేయుటకు ప్రణాళికలను సిద్ధం చేసిందన్నారు.
• మత్స్యకారుల అభివృద్ధి కోసం 681 చెరువుల్లో నీటి లభ్యతను బట్టి 1.18కోట్ల చేప పిల్లలను పంపిణీ చేసినట్లు తెలిపారు.
• 2022-23 సంవత్సరానికి 1,14,570 మంది వివిధ పింఛన్‌దారులకు రూ.268.76 కోట్ల విలువ గల పింఛన్లను పంపిణీ జరిగినట్లు కలెక్టర్‌ పేర్కొన్నారు.
• కల్యాణలక్ష్మి పథకం కింద 2022-23 సంవత్సరానికి వివిధ వర్గాలకు చెందిన 3,067 మంది లబ్ధిదారులకు రూ.31,25,25,000 అందించినట్లు తెలిపారు.
• జిల్లాలో వివిధ శాఖల్లో ఉత్తమ ప్రతిభ కనబర్చిన 187 మంది అధికారులు, సిబ్బందికి కలెక్టర్‌ ప్రశంసాపత్రాలు అందజేశారు. అనంతరం పలు పాఠశాలల విద్యార్థులు నృత్య ప్రదర్శనలు నిర్వహించారు. కార్యక్రమంలో జిల్లా అదనపు కలెక్టర్‌ రాహుల్‌శర్మ, డీఆర్‌వో అశోక్‌కుమార్‌, డీఈవో రేణుకాదేవి, డీఎంహెచ్‌వో పాల్వన్‌కుమార్‌, జిల్లా అదనపు ఎస్పీ ఎం.ఏ రషీద్‌, ఆయా శాఖల జిల్లా అధికారులు, మండలస్థాయి అధికారులు, సిబ్బంది పాల్గొన్నారు.