18 నుంచి ఎస్సెస్సీ పరీక్షలు

విద్యార్థుల భవిష్యత్తుకు బాటలు వేసేది పదో తరగతి వార్షిక పరీక్షలు. సంవత్సరమంతా కష్టపడి చదివి పరీక్షలు దగ్గర పడుతున్న కొద్దీ ఆందోళనకు గురవుతూ ఉంటారు.

• ఆత్మ విశ్వాసంతో ఒత్తిడి దూరం
• ఒత్తిడి సహజం… అధిగమిస్తే విజయం
• ఆత్మవిశ్వాసంతో పరీక్షలకు సిద్ధం కావాలి
• ఉపాధ్యాయులు, తల్లిదండ్రులు ఆసరాగా నిలవాలి

విద్యార్థుల భవిష్యత్తుకు బాటలు వేసేది పదో తరగతి వార్షిక పరీక్షలు. సంవత్సరమంతా కష్టపడి చదివి పరీక్షలు దగ్గర పడుతున్న కొద్దీ ఆందోళనకు గురవుతూ ఉంటారు. ఒత్తిడిని ఆదిగమించి, ఆత్మ విశ్వాసంతో ముందుకెళ్తే ఉత్తమ ఫలితాలు సాధించవచ్చు. ప్రశాంత వాతావరణంలో చదువుకోవడంతో పాటు రోజు తీసుకునే ఆహారపు అలవాట్లలోనూ కొద్దిపాటి మార్పులు చేసుకుంటే సరి. విద్యార్థుల్లో ఆత్మవిశ్వాసం నింపేందుకు తల్లిదండ్రుల తోడ్పాటు ఎంతో కీలకం. నచ్చిన ప్రదేశాలు, ఇష్టమైన వ్యక్తుల సమక్షంలో ఏకాగ్రతతో చదువుకోవడం ఎంతో మేలు. పరీక్షలకు సిద్ధమయ్యే విద్యార్థుల కోసం కొన్ని సలహాలు, సూచనలపై ‘నమస్తే తెలంగాణ’ ప్రత్యేక కథనం..

– షాబాద్‌, మార్చి 16

పదో తరగతి పరీక్షలు ఈ నెల 18వ తేదీ నుంచి ప్రారంభం కానున్నాయి. విద్యార్థులు పరీక్షలు బాగా రాయాలంటే తల్లిదండ్రుల పాత్ర కీలకం. పిల్లలకు చదువురాదని, మార్కులు తక్కువగా వస్తాయని, ఫెయిల్‌ అవుతారని, వారి స్నేహితుల కన్నా వెనుకపడ్డావంటూ నెగెటివ్‌ ధోరణితో కించపర్చొద్దు. ఈ ఒత్తిడి విద్యార్థి మనుసుపై దాడి చేస్తుంది. ప్రతి విద్యార్థి ఒత్తిడిని ఎదుర్కోవడానికి ప్రయత్నించి ఆత్మవిశ్వాసంతో ముందుకు సాగితే విజయానికి చేరువ కావచ్చు.

సందేహాలను నివృత్తి చేయాలి..

పరీక్షల సమయంలో ఏదైనా సందేహం వస్తే అది నివృత్తి కాకపోతే దానిమీదకే ఆలోచనలు పోయి సమయం వృథా అవుతుంది. ఉపాధ్యాయులు అప్పటికప్పుడే నివృత్తి చేసి వారిలో ఆత్మవిశ్వాసాన్ని నింపాలి. ప్రశ్నాపత్రం విషయంలో ఉన్న సందేహాలను నివృత్తి చేస్తూ పరీక్ష సమయాన్ని సద్వినియోగం చేసుకునేలా సూచనలివ్వాలి.

విద్యార్థులు ఆత్మ పరిశీలన చేసుకోవాలి..

ముందుగా ప్రతి విద్యార్థి ఆత్మ పరిశీలన చేసుకోవాలి. ఇదివరకే కొన్ని పరీక్షలు రాసి ఉంటారు.. ఆ పరీక్షల్లో తమ పెర్‌ఫార్మెన్స్‌ ఎలా ఉందో బేరీజు వేసుకోవాలి. ఎక్కడ మిస్టేక్స్‌ చేస్తున్నామనే విషయాన్ని ఎవరికి వారు గ్రహించుకోవాలి. ఏ పాఠ్యాంశాలలో పొరపాట్లు చేస్తున్నది పాయింట్ల వారిగా నోట్‌ చేసుకుని అవసరమైనంత మేరకు అభ్యసించాలి.

తల్లిదండ్రులు ఏం చేయాలంటే..

పదో తరగతి పరీక్షలకు సిద్దమవుతున్న విద్యార్థుల విషయంలో తల్లిదండ్రులు జాగ్రత్తలు తీసుకోవాలి. ఇంట్లో ప్రశాంత వాతావరణం ఉండేలా చూడాలి. పిల్లల్లో మరింత ఒత్తిడిని పెంచే వ్యాఖ్యలు చేయకూడదు. అంతేకాక పిల్లలు ఎక్కువ సమయం చదువుకే కేటాయిస్తారు. కాబట్టి వారి ఆరోగ్యం గురించి శ్రద్ధ తీసుకోవాలి. సమయానుకూలంగా తగిన ఆహారం అందిస్తూ ఉండాలి. అవసరమైనంత నిద్ర లేకపోతే ఆరోగ్యం దెబ్బతింటుంది.

మిత్రులే మార్గదర్శకులు..

విద్యార్థిలో ఉన్న ఒత్తిడి అతడి మిత్రుడికి కచ్చితంగా తెలుస్తుంది. ఒత్తిడిని అధిగమించేలా ఆత్మవిశ్వాసం నింపేది స్నేహితులే. అధ్యాపకులు, తల్లిదండ్రుల మాటల కంటే మిత్రుల మాటలే విద్యార్థిపై అధిక ప్రభావం చూపిస్తాయి. మంచి మిత్రుడెపుడూ ఒత్తిడికి గురయ్యే ప్రతిక్షణాన్ని పసిగడుతూ ఉంటాడు. ఒత్తిడి చీకటిలా పరుచుకుంటున్న సమయంలో చిరుదివ్వెలా మనుసులో వెలుగు నింపే మార్గదర్శి అతడే. చిరునవ్వుతో ఒత్తిడిని అధిగమిస్తూ పరీక్షలు రాస్తే మంచి ఫలితాలు సాధించేందుకు అవకాశం ఉన్నదని నిపుణులు సూచిస్తున్నారు.

ఆరు గంటల నిద్ర అవసరం..

బాగా తినాలి.. బాగా చదవాలి.. బాగా పరీక్షలు రాయాలి. ఈ మూడు అంశాలను విద్యార్థులు దృష్టిలో పెట్టుకోవాలి. పరీక్షల్లో బాగా రాయాలనే ఆత్రుతతో సమయపాలన లేకుండా చదవడం మంచిది కాదు. నిద్రలేమితో మానసిక ప్రశాంతత దెబ్బతింటుంది. పరీక్షా కేంద్రాల్లో కండ్లు మూతపడుతుంటాయి. కునుకు తీయాల్సి వస్తుంది. ఏకాగ్రత కోల్పోతుంది. చదివినవి గుర్తుకురావు. సమాధానాలు సరిగా రాయలేరు. అందుకే పరిపూర్ణంగా నిద్ర పోవాలి. విద్యార్థులు రోజుకు ఆరు గంటలకు తగ్గకుండా నిద్రపోవడం తప్పనిసరి.

రాత బాగుంటే మంచి మార్కులు..

• పరీక్షల్లో చదవడంతోపాటు రాత కూడా ముఖ్యం. చేతిరాత బాగుంటే 10 నుంచి 15 శాతం మార్కులు అదనంగా పొందవచ్చని ఉపాధ్యాయులు సూచిస్తున్నారు.

రాసేటప్పుడు ఇవి గుర్తుంచుకోవాలి..

•  పెన్ను, పెన్సిల్‌ పట్టుకునే విధానం తగిన విధంగా ఉండాలి.
• ఎట్టి పరిస్థితుల్లో రెడ్‌, గ్రీన్‌ పెన్నులు వాడకూ డదు. బ్లూ లేదా బ్లాక్‌ పెన్నులు వాడాలి.
• పదాలు, వాక్యాలు, పేరాల మధ్య తగిన స్థలం వదలాలి.
• అక్షరాలు సైజు స్పష్టంగా కనిపించేలా ఒకే తీరు ఉండాలి.
• గొలుసుకట్టు రాత, అక్షరం, భాషా దోషాలు ఉండకూడదు.
• వేగంగా రాయడం ప్రాక్టీస్‌ చేయాలి.

ఇవి పాటించాలి..

• సమాధానం రాసేముందు ప్రశ్నల నంబర్లు సరిగ్గా వేయాలి
• సమాధాన పత్రాలు ఇవ్వగానే స్కేల్‌ సాయంతో తగిన మార్జిన్‌ పెట్టుకోవాలి.
• జవాబు పత్రంపై ఒక్కో పేజీకి 16 నుంచి 18 లైన్లకు మించకుండా చూసుకోవాలి.
• ఆన్సర్‌ షీట్‌పై ప్రతి వాక్యం స్ట్రెయిట్‌గా ఉండేలా రాయాలి.
• ముఖ్యమైన అంశాల కింద అండర్‌లైన్‌ ఉండేలా చూసుకోవాలి.
• కామా, ఫుల్‌స్టాప్‌లు పాటిస్తూ రాయాలి.
• తెలుగులో అక్షరాలు గుండ్రంగా, తలకట్టు, దీర్ఘాలు, ఒత్తులు కనిపించేలా ఉండాలి.
• ఇంగ్లిష్‌లో పదాలను స్లాంట్‌గా, స్ట్రోక్స్‌ పాటిస్తూ రాయాలి.
• స్పెల్లింగ్‌ మిస్టేక్స్‌ లేకుండా చూసుకోవాలి. ఓవర్‌ రైటింగ్‌ ఉండకూడదు.
• క్యాపిటల్‌, స్మాల్‌ లెటర్స్‌ వ్యత్యాసం గమనిస్తూ రాయాలి.
• సైన్స్‌, సోషల్‌లో బొమ్మలు గీయడం లేదా పటాల్లో స్థలాలను స్పష్టంగా గుర్తించాలి.

మానసిక సన్నద్ధత ఇలా…

• కేంద్రాన్ని ముందుగానే చూసుకుంటే చివరి నిమిషంలో హైరానా ఉండదు.
• పరీక్ష ముందురోజు హాయిగా నిద్రపోవాలి. నిద్ర మెదడు పనితీరును ప్రభావితం చేస్తుంది.
• పరీక్షలకు వెళ్లే ముందు పెన్ను, పెన్సిల్‌, ప్యాడ్‌, హాల్‌టికెట్‌ను సరి చూసుకోవాలి.
• ఎగ్జామ్‌ సమయానికి అరగంట ముందే కేంద్రానికి చేరుకునేలా ప్లాన్‌ చేసుకోవాలి.
• కొత్త వాతావరణంలో ఉన్నామనే భయాన్ని వదిలేయాలి.
• ప్రశ్నలన్నింటినీ క్షుణ్ణంగా చదివి, బాగా రాయగలననుకున్న ఆరేడు ప్రశ్నలకు సమాధానాలు రాయాలి. చివరగా ఎంపిక చేసుకున్న ప్రశ్నలకు జవాబులు రాయడం మంచిది.

ఆహారం ప్రధానం..

ఏడాది పొడవునా బాగా చదివి మంచి మార్కులు తెచ్చుకున్న విద్యార్థుల్లో కొందరు వార్షిక పరీక్షల సమయంలో అనారోగ్యానికి గురై ఫలితాల సాధనలో వెనుకబడిన సందర్భాలు అనేకం. పిల్లలు తమ ఆర్యోగాన్ని కాపాడుకోవడంతోపాటు ఒత్తిడిని దూరం చేసుకునేందుకు రోజువారీగా తీసుకునే ఆహారంలో కొద్దిపాటి జాగ్రత్తలు తీసుకోవాలి.

పరీక్షల సమయంలో మాంసాహారానికి దూరంగా ఉండడం మేలు. సాత్విక ఆహారంతో శరీరానికి కావాల్సిన పోషకాలు లభించడంతోపాటు ఉత్సాహం చేకూరుతుంది. పండు,్ల కూరగాయలు తీసుకుంటే మెదడు చురుగ్గా పని చేస్తుంది. పరీక్షకు వెళ్లే సమయానికి మూడు గంటల ముందే తేలికపాటి అల్పాహారం తీసుకోవాలి. మధ్యాహ్నం, రాత్రి బలవర్ధకమైన ఆహారం తక్కువ మోతాదులో తీసుకుంటే మంచిది.