మూడోరోజూ నిలదీతల పర్వం

ఎల్లారెడ్డి మండలం భిక్‌నూర్‌లో నిర్వహించిన గ్రామసభ రసాభాసగా మారింది. అర్హులకు కాకుండా కాంగ్రెస్‌ పార్టీ అనుయాయుల పేర్లను చదవడంతో గ్రామస్తులు ఆందోళన చేపట్టారు. దీంతో ఆర్డీవో మన్నె ప్రభాకర్‌ కల్పించుకొని సముదాయించడంతో గొడవ సద్దుమణిగింది. లింగంపేట గ్రామసభలో రేషన్‌ కార్డులపై గ్రామస్తులు ఆందోళన చేపట్టారు.

• రచ్చరచ్చగా గ్రామసభలు
• తప్పుల తడకగా అర్హుల జాబితాలు
• అధికారులపై గ్రామస్తుల ఆగ్రహావేశాలు
• అర్హులకు అన్యాయం చేశారంటూ నిరసనలు
• సభా వేదికలపై దూసుకొచ్చిన దరఖాస్తుదారులు
• జనం ప్రశ్నలకు సమాధానాలు చెప్పలేక నీళ్లు నమిలిన ఆఫీసర్లు
• పలు గ్రామాల్లో అర్ధాంతరంగా ముగిసిన సభలు

ఎల్లారెడ్డి మండలం భిక్‌నూర్‌లో నిర్వహించిన గ్రామసభ రసాభాసగా మారింది. అర్హులకు కాకుండా కాంగ్రెస్‌ పార్టీ అనుయాయుల పేర్లను చదవడంతో గ్రామస్తులు ఆందోళన చేపట్టారు. దీంతో ఆర్డీవో మన్నె ప్రభాకర్‌ కల్పించుకొని సముదాయించడంతో గొడవ సద్దుమణిగింది. లింగంపేట గ్రామసభలో రేషన్‌ కార్డులపై గ్రామస్తులు ఆందోళన చేపట్టారు. లింగంపేట మేజర్‌ పంచాయతీకి కేవలం 79 రేషన్‌ కార్డులు మంజూరుచేయడంపై నిరసన వ్యక్తంచేశారు. గతంలోనే దరఖాస్తు చేసుకున్నా తమకు ఎందు కు రాలేదని మహిళలు అధికారులను నిలదీశారు.

ఇందిరమ్మ ఇండ్లు కూడా అర్హులకు రాలేదన్నారు. కూలి పనులు చేసుకుంటూ జీవించే తాము పను లు వదులుకొని దరఖాస్తు చేసుకుంటూ కార్యాలయాల చుట్టూ తిరగాలా అని ప్రశ్నించారు. గ్రామస్తులకు సమాధానాలు చెప్పేవారే కరువయ్యారు. ఎల్లారెడ్డి ఏడీఏ ప్రయత్నించగా, గ్రామస్తులు అధికారులను చుట్టుముట్టడంతో ఏడీఏ మాట్లాడకుండానే సభ నుంచి వెళ్లిపోయారు.

గంటకు పైగా గందరగోళ వాతావరణం ఏర్పడడంతో అధికారులు గ్రామసభను అర్థాంతరంగా ముగించి వెళ్లిపోయారు. అర్హులకు మద్దతుగా మాజీ ఎంపీపీ ముదాం సాయిలు అధికారులను ప్రశ్నించగా కాంగ్రెస్‌ పార్టీ నాయకులు జోక్యం చేసుకున్నారు. దీంతో ఇరువర్గాల మధ్య మాటల యు ద్ధం సాగింది. మండల కేంద్రానికి చెందిన ఒడ్డె సావిత్రికి ఇందిరమ్మ గృహం మంజూరు కాలేదని గ్రామసభలో రోదించింది.
బీబీపేట మండలంఇస్సానగర్‌, మాందాపూర్‌, యాడారం గ్రామ సభల్లో అర్హులైన వారి పేర్లు జాబితాలో రాకపోవడంతో గ్రామస్తులు అధికారులను నిలదీశారు. బాన్సువాడ మండలంలోని పలు గ్రామాల్లో ఏర్పాటు చేసిన గ్రామసభల్లో రేషన్‌ కార్డుల లబ్ధిదారుల జాబితాలో తమ పేర్లు రాలేవంటూ గ్రామస్తులు ఆందోళన వ్యక్తంచేశారు.

నీళ్లు నమిలిన అధికారులు

సదాశివనగర్‌ మండలం ఉత్తూనూర్‌లో నిర్వహించిన గ్రామసభలో అధికారులను నిలదీశారు. ఇందిరమ్మ ఇండ్లు, రైతుభరోసా, తలం బంగారం, రుణమాఫీపై ప్రశ్నల వర్షం కురిపించారు. ఇంకా ఎన్నిసార్లు దరఖాస్తులు తీసుకుంటారని మండిపడ్డారు. రామారెడ్డి మండలం రెడ్డిపేట్‌ గ్రామంలోనూ హామీ అమలుపై అధికారులను గ్రామస్తులు నిలదీశారు. నస్రుల్లాబాద్‌,బీర్కూర్‌ మండలాల్లోని గ్రామాల్లో నిర్వహించిన గ్రామ సభలు వాడివేడిగా కొనసాగాయి. నస్రుల్లాబాద్‌ మండలం అంకోల్‌ తండా సభలో ఇందిరమ్మ ఇండ్లపై అధికారులను నిలదీశారు. దోమకొండ మండలంలోని సంగమేశ్వర్‌, అంబారీపేట, ముత్యంపేట గ్రామాల్లో లబ్ధిదారుల ఎంపిక జాబితాల్లో పేర్లు రాకపోవడంతో
అధికారులను గ్రామస్తులు నిలదీశారు.

బిచ్కుందలో నిర్వహించిన గ్రామసభలో రేషన్‌కార్డులపై అధికారులను నిలదీశారు. దీంతో సభలో గందరగోళ పరిస్థితి ఏర్పడింది. ప్రజా పాలనలో 2600 మంది రేషన్‌ కార్డుల కోసం దరఖాస్తు చేసుకుంటే 240 మంది పేర్లు జాబితాలో ఎలా వస్తాయని గ్రామస్తులు ప్రశ్నించడంతో అధికారులు సమాధానాలు చెప్పలేక నీళ్లు నమిలారు. అర్హులకు అన్యాయం చేశారని, ఎన్నిదరఖాస్తు చేసుకోవాలంటూ ఆగ్రహం వ్యక్తంచేశారు. మరోసారి దరఖాస్తు చేసుకోవాలని అధికారులు సూచించడంతో గతంలో ఇచ్చిన వాటి గురించి చెప్పాలంటూ పట్టుబట్టారు. ఈ క్రమంలో బీఆర్‌ఎస్‌, కాంగ్రెస్‌ నేతల మధ్య తోపులాట జరుగగా, ఎస్సై మోహన్‌ రెడ్డి సముదాయించారు.దీంతో గ్రామస్తులు ఇది గ్రామ సభనా..రాజకీయ నాయకుల సమావేశమా అంటూ మండిపడ్డారు.

నిజామాబాద్‌ జిల్లాలో..

డిచ్‌పల్లి మండలం ఘన్‌పూర్‌ గ్రామసభలో యుద్ధవాతారణం నెలకొన్నది. ఇందిరమ్మ ఇండ్ల లబ్ధిదారుల జాబితాలో తమ పేర్లు రాలేవంటూ అధికారులపై మహిళలు ఆగ్రహం వ్యక్తంచేశారు. ఇంటింటికీ వచ్చి అధికారులు తమ ఖాళీ ప్లాట్ల వద్ద ఫొటోలు తీసుకుని వెళ్లారని, ఇప్పుడు ఎంపిక జాబితాలో తమ పేర్లు ఎందుకు రాలేదని మహిళలు ప్రశ్నించారు. ఇప్పటికే ఇండ్లు ఉన్న వారి పేర్లే మళ్లీ ఎంపిక జాబితాలో ఉండడంపై పేర్లు రాని పేదలు అసహనం వ్యక్తం చేశారు. ఒకదశలో గ్రామసభ వేదికపై కి దూసుకువచ్చి అధికారులతో వాగ్వాదానికి దిగారు.దీంతో సభలో కొద్దిసేపు ఉద్రిక్త వాతావరణం ఏర్పడింది.

డిచ్‌పల్లి సీఐ మల్లేశ్‌, ఎస్సై సత్యం, ఏఎస్సై హమీద్‌ మహిళలను సముదాయించేందుకు యత్నించారు. తమ సమస్యలను అధికారులకు చెప్పుకుంటుంటే పోలీసులు అడ్డుకోవడంపై ఆగ్రహం వ్యక్తంచేశారు. నవీపేట మండలంలోని పలు గ్రామాల్లో పథకాల జాబితాలోఅర్హుల పేర్లు గల్లంతవడంపై గ్రామస్తులు అధికారుల పై తీవ్ర స్థాయిలో మండి పడుతూ అడుగుగడునా నిలదీశారు. గుంట భూమిలేని ఉపాధిహామీ కూలీలకు ఇవ్వకుండా భూములు ఉన్న వారికే ఆత్మీయ భరోసా పథకంలో పేర్లు వచ్చాయని ఎంపీడీవో నాగనాథ్‌పై ఆగ్రహం వ్యక్తం చేస్తూ నిలదీశారు. సొంతంగా ఇండు ఉన్నవారికి ఇందిరమ్మ ఇండ్లు ఎలా మంజూరుచేశారంటూ ప్రశ్నించారు.

రూరల్‌ ఎమ్మెల్యే స్వగ్రామంలో గందరగోళం

• అధికారులపై ఉపాధి కూలీల ఆగ్రహం

రూరల్‌ ఎమ్మెల్యే భూపతిరెడ్డి సొంతగ్రామ జలాల్‌పూర్‌లో ఏర్పాటు చేసిన గ్రామసభలో అధికారులను ప్రజలు నిలదీశారు. ఇందిరమ్మ ఆత్మీయ భరోసా పథకం కింద భూమి ఉన్న వారికే మంజూరైన పేర్లు చదివారంటూ అధికారులపై ఉపాధిహామీ కూలీలు ఆగ్రహం వ్యక్తం చేశారు. భూమి లేని తాము ఉపాధి పనులు చేసినా కూడా తమకెందుకు మంజూరు చేయలేదని మండిపడ్డారు. అర్హులైన కూలీలందరూ ఒక్కసారిగా లేచి అధికారులపై ప్రశ్నల వర్షం కురిపించడంతో సభలో కొద్దిసేపు గందరగోళం పరిస్థితి ఏర్పడింది. ఎవరు ఏం మాట్లాడుతున్నారో అర్థం కానీ పరిస్థితి నెలకొన్నది.

సమాధానాలు చెప్పలేక.. అర్థాంతరంగా ముగించిన గ్రామసభలు

ప్కాల్‌ గ్రామసభలో పథకాల జాబితాల్లో అర్హుల పేర్లు లేకపోవడంతో అధికారులను గ్రామస్తులు నిలదీశారు. అర్హులైన వారికి పథకాలు అందిస్తామని చెప్పి, ఆఖరికి నిరాశకు గురిచేశారంటూ ఆగ్రహం వ్యక్తంచేశారు. జాబితాపై గ్రామస్తులు అడిగిన ప్రశ్నలకు అధికారులు సమాధానం చెప్పలేక గ్రామసభ అర్ధాంతరంగా ముగించి జారుకున్నారు. వేల్పూర్‌ మండలంలోని జాన్కంపేట్‌ గ్రామసభలో రసాభాస చోటుచేసుకున్నది. సంక్షేమ పథకాలను అనర్హులకు కేటాయించడంపై గ్రామస్తులు ఎంపీడీవో బాలకిషన్‌ను నిలదీశారు. అధికారులు రూపొందించిన జాబితాను వెంటనే రద్దుచేసి, మళ్లీ సర్వే చేపట్టి అర్హులను ఎంపిక చేయాలని డిమాండ్‌ చేశారు. దీంతో అధికారులు అర్ధాంతరంగా సభను ముగించుకొని వెళ్లిపోయారు.

సమాచారం లేకుండా ఎందుకు వచ్చారు?

• బోధన్‌ పట్టణంలోని 24వ వార్డులో ఏర్పాటు చేసిన గ్రామ సభలో అర్హుల జాబితాలో అందరి పేర్లు లేవని ప్రశ్నించిన ఓ వ్యక్తికి సదరు వార్డుసభ అధికారి శ్రీనివాస్‌ నిర్లక్ష్యంగా సమాధానం ఇచ్చారు. తమదగ్గర ఉన్న సమాచారం మాత్రమే తమకు తెలుసని, మిగతా వివరాలకు కమిషనర్‌ను అడగాలని చెప్పడంతో సమాచారం లేకుండా ఎందుకు వచ్చావంటూ సదరు అధికారిని స్థానికులు నిలదీశారు.
• బాల్కొండలో నిర్వహించిన గ్రామసభలో గందరగోళం ఏర్పడింది. రేషన్‌కార్డు, ఇందిరమ్మ ఇండ్లు పేదలకు కాకుండా కాంగ్రెస్‌ పార్టీ నాయకులకు అనుకూలంగా ఉన్నవారికి ఇచ్చారంటూ అధికారులను గ్రామస్తులు నిలదీశారు. ఎక్కువగా విదేశాల్లో ఉన్నవారికి, ప్రభుత్వ ఉద్యోగ కుటుంబాలకు, ఎక్కువ భూమి ఉన్న వారికి వచ్చాయంటూ ఆందోళన చేశారు.
• రుద్రూర్‌ మండల కేంద్రంతోపాటు రాణంపల్లి, రాయకూర్‌ క్యాంపు, అక్బర్‌నగర్‌ గ్రామసభల్లో ఇందిరమ్మ ఇండ్ల జాబితాపై గ్రామస్తులు తీవ్ర అభ్యంతరాలు వ్యక్తంచేశారు. ఇల్లుకు దరఖాస్తు చేసుకోకుండానే ప్లాట్‌ లేదని, ఇల్లు కట్టుకుంటానని దరఖాస్తు చేసినట్లు జాబితాలో రావడంపై ఆగ్రహం వ్యక్తం చేశారు. అనర్హుల పేర్లతో కూడిన జాబితాతో గ్రామ సభకు హాజరయ్యారని అధికారులపై మండిపడ్డారు.
• ఏర్గట్ల మండలంలోని తొర్తి గ్రామంలో నిర్వహించిన గ్రామ సభ రచ్చరచ్చగా మారింది. అర్హుల జాబితాల్లో అర్హుల పేర్లు లేవంటూ అధికారులను నిలదీశారు. అర్హులను ఎంపిక చేయకపోతే పెద్ద ఎత్తున ఆందోళనలు చేస్తామని హెచ్చరించారు.
• మోర్తాడ్‌ మండలంలోని దోన్‌పాల్‌, శెట్‌పల్లి గ్రామాల్లో జరిగిన గ్రామసభల్లో ప్రజలు ఇందిరమ్మ ఇండ్లు, రేషన్‌కార్డుల విషయంలో అధికారులను నిలదీశారు.
• బోధన్‌ మండలంలోని అమ్దాపూర్‌, భవానిపేట్‌, బండర్‌పల్లి, పెంటాకలాన్‌, సిద్దపూర్‌ గ్రామాల్లో గ్రామసభలు గరంగరంగా కొనసాగాయి. ఇంటింటి సర్వేలో రేషన్‌కార్డులు, ఇందిరమ్మ ఇండ్ల కోసం దరఖాస్తు చేసుకుంటే జాబితాలో తమ పేర్లు రాలేదని అధికారులను నిలదీశారు.
• భీమ్‌గల్‌ మండలంలోని పలు గ్రామాల్లో నిర్వహించిన గ్రామసభల్లో అధికారులను గ్రామస్తులు నిలదీశారు. దాబా ఇండ్లు ఉన్నవారికి మరోసారి ఇండ్లు మంజూరుచేశారంటూ మండిపడ్డారు. బడా భీమ్‌గల్‌లో బుధవారం గ్రామసభ ముగిసిన తరువాత గురువారం మరోసారి ఇందిరమ్మ ఆత్మీయ భరోసా అంటూ సర్వేలు నిర్వహించడం విడ్డూరం.