సారు.. ఫుల్‌ హుషారు

ప్రస్తుతం ప్రభుత్వ ఉపాధ్యాయుల బదిలీలు, పదోన్నతుల ప్రక్రియ షెడ్యూల్‌ ప్రకారం కొనసాగుతుండగా.. రాష్ట్ర ప్రభుత్వం ఉపాధ్యాయులకు మరొక గుడ్‌ న్యూస్‌ చెప్పింది.

• 317 జీవోతో ఉపాధ్యాయుల బదిలీలకు రాష్ట్ర ప్రభుత్వం గ్రీన్‌ సిగ్నల్‌
• నేటి నుంచి దరఖాస్తుల స్వీకరణ
• హర్షం వ్యక్తంచేస్తున్న ఉమ్మడి జిల్లాలోని టీచర్లు
• కామారెడ్డి జిల్లాలో 550 మందికి ఊరట

కామారెడ్డి, ఫిబ్రవరి 11 : ప్రస్తుతం ప్రభుత్వ ఉపాధ్యాయుల బదిలీలు, పదోన్నతుల ప్రక్రియ షెడ్యూల్‌ ప్రకారం కొనసాగుతుండగా.. రాష్ట్ర ప్రభుత్వం ఉపాధ్యాయులకు మరొక గుడ్‌ న్యూస్‌ చెప్పింది. జిల్లాల విభజన తర్వాత జీవో 317తో వేరే జిల్లాల నుంచి బదిలీపై వచ్చి కుటుంబ సభ్యులకు దూరంగా ఉంటున్న ఉపాధ్యాయులకు ప్రభుత్వ నిర్ణయంతో కొంత ఊరట లభించింది. కొత్త జిల్లాల ఏర్పాటుతో 317 జీవో ప్రకారం ఇతర జిల్లాలకు బదిలీ అయిన ఉపాధ్యాయుల ట్రాన్స్‌ఫర్లకు తాజాగా అవకాశం కల్పించింది. గతంలో వారు పని చేసిన సర్వీసును పరిగణనలోకి తీసుకుంటూ ఈ నెల 12 నుంచి బదిలీ దరఖాస్తులకు జీవో విడుదల చేసింది. 317 జీవోతో కామారెడ్డి జిల్లాలో 550 మందికి, నిజామాబాద్‌ జిల్లాలో పలువురు ఉపాధ్యాయులకు ఊరట లభించనున్నది. ప్రభుత్వ నిర్ణయంపై పలు ఉపాధ్యాయాల సంఘాలతో పాటు ఉపాధ్యాయులు హర్షం వ్యక్తం చేస్తున్నారు. ఇప్పటికే ప్రారంభమైన ఉపాధ్యాయుల బదిలీలు, పదోన్నతుల ప్రక్రియ యథావిధిగా కొనసాగుతుందని విద్యాశాఖ అధికారులు వెల్లడించారు.

జిల్లాలో 550 మంది ఉపాధ్యాయులకు ఊరట…

కామారెడ్డి జిల్లాలో జీవో 317తో వచ్చిన 550 మంది ఉపాధ్యాయులకు ఊరట లభించింది. ఈ ఉపాధ్యాయుల్లో కేటగిరీల వారీగా ఈ నెల 12 నుంచి దరఖాస్తుల స్వీకరణ అనంతరం పూర్తి వివరాలు వెబ్‌సైట్‌లో అందుబాటులో ఉంచనున్నారు. జీవో 317 కింద ఇతర జిల్లాలకు బదిలీ అయిన ఉపాధ్యాయులకు గత సీనియార్టీని పరిగణనలోకి తీసుకోవాలని నిర్ణయించింది. ఈ నెల 12 నుంచి 14వ తేదీ వరకు దరఖాస్తు చేసుకునే అవకాశాన్ని ప్రభుత్వం కల్పించింది. ప్రభుత్వ నిర్ణయంతో ఉపాధ్యాయులు ఆనందం వ్యక్తం చేస్తున్నారు.

కొత్త షెడ్యూల్‌..

• ఈ నెల 12 నుంచి 14 వ తేదీ వరకు జీవో 317 ఉపాధ్యాయుల దరఖాస్తుల స్వీకరణ.
• 14,15వ తేదీల్లో హార్డ్‌కాపీలను ఎంఈవో కాంప్లెక్స్‌ ప్రధానోపాధ్యాయులకు సమర్పించాలి.
• 16,17వ తేదీల్లో డీఈవో,ఆర్‌జేడీ వెబ్‌సైట్‌లో బదిలీ పాయింట్లను ప్రొవిజినల్‌ సీనియార్టీ, ఉద్యోగోన్నతుల సీనియార్టీ జాబితాలను వెల్లడిస్తారు.
• ఈ నెల 18 నుంచి 20 వరకు పరిష్కారానికి అవకాశం.
• 21,22వ తేదీల్లో తుది సీనియార్టీ జాబితా ప్రకటిస్తారు. గ్రేడ్‌ 2 ప్రధానోపాధ్యాయులకు బదిలీల వెబ్‌ ఆప్షన్స్‌ ఎంచుకోవాల్సి ఉంటుంది.
• 22 న మల్టీ జోన్‌ స్థాయిలో ప్రధానోపాధ్యాయులకు వెబ్‌ ఆప్షన్‌, ఎడిటింగ్‌, పునః పరిశీలనకు అవకాశం కల్పిస్తారు.
• 25న గ్రేడ్‌ హెచ్‌ఎంల బదిలీల అనంతరం మిగిలిన ఖాళీలను ప్రకటిస్తారు.
• 26 నుంచి 28 వరకు అర్హత కలిగిన స్కూల్‌ అసిస్టెంట్లకు ప్రధానోపాధ్యాయులుగా ఉద్యోగోన్నతులు కల్పిస్తారు.
• మార్చి ఒకటిన సబ్జెక్ట్‌ వారీగా స్కూల్‌ అసిస్టెంట్‌ ఖాళీల ప్రకటన,
• బదిలీలకు వెబ్‌ ఆప్షన్స్‌ నమోదుకు అవకాశం.
• మార్చి 13న ఎస్జీటీ ఉపాధ్యాయుల బదిలీలు చేపడుతారు.
• మార్చి 16 నుంచి 30 వరకు డీఈవో బదిలీ ఉత్తర్వులపై పదిరోజుల్లో అప్పీళ్లు, అభ్యంతరాలకు అవకాశం కల్పించారు.

ఊరట లభించింది..

ప్రభుత్వం నిర్ణయంతో జిల్లాలో చాలా మంది జీవో 317తో ఉపాధ్యాయులకు ఊరట లభించింది. అంతే కాకుండా గతంలో పనిచేసిన సర్వీసును పరిగణనలోకి తీసుకోవడం చాలా అనందంగా ఉంది.అందరికీ న్యాయం చేయాలనే ప్రభుత్వ నిర్ణయాన్ని స్వాగతిస్తున్నాం.
-అంబీర్‌ మనోహర్‌ రావు (పీఆర్టీయూటీఎస్‌, కామారెడ్డి జిల్లా అధ్యక్షుడు )

రాష్ట్ర ప్రభుత్వానికి కృతజ్ఞతలు..

జీవో 317 ప్రకారం బదిలీపై వచ్చిన వారికి అవకాశం ఇవ్వడం ఆనందంగా ఉంది. వారు ఇతర జిల్లాల నుంచి వచ్చి మారుమూల ప్రాంతాల్లో పని చేస్తున్నారు. వారికి పాత సీనియార్టీ ప్రకారం అవకాశం ఇవ్వడంతో కొంత ఊరట లభించింది. ఈ సందర్భంగా ప్రభుత్వానికి కృతజ్ఞతలు.
-గర్దాస్‌ గోవర్ధన్‌, ఉపాధ్యాయుడు

చాలా ఆనందంగా ఉంది..

నేను జీవో 317తో నిజామాబాద్‌ జిల్లా నుంచి కామారెడ్డి జిల్లాకు బదిలీపై వచ్చాను.తాజాగా ప్రభుత్వం అవకాశం ఇవ్వడంతో నిజామాబాద్‌కు బదిలీపై వెళ్తున్నాను. నాకు చాలా ఆనందంగా ఉంది.ఇంత కాలం కుటుంబ సభ్యులకు దూరంగా ఉండేదాన్ని ప్రభుత్వ నిర్ణయంతో సంతోషంగా ఉన్నాను.
-సృజన ప్రియ, ఉపాధ్యాయురాలు