కామారెడ్డిలో పెరిగిన నేరాలు

కామారెడ్డి జిల్లాలో గతేడాది కన్నా ఈసారి నేరాల సంఖ్య పెరిగింది. మహిళా సంబంధిత నేరాల్లోనూ పెరుగుదల నమోదైంది. కామారెడ్డి జిల్లాలో ఏడాది వ్యవధిలో నమోదైన కేసుల వివరాలను ఎస్పీ సింధూశర్మ వెల్లడించారు.

• మహిళల సంబంధిత నేరాల్లోనూ పెరుగుదల
• గతేడాది కన్నా ఎక్కువగా కేసుల నమోదు
• వివరాలు వెల్లడించిన ఎస్పీ సింధూశర్మ
• వార్షిక నేర నివేదిక విడుదల

కామారెడ్డి,డిసెంబర్‌ 30: కామారెడ్డి జిల్లాలో గతేడాది కన్నా ఈసారి నేరాల సంఖ్య పెరిగింది. మహిళా సంబంధిత నేరాల్లోనూ పెరుగుదల నమోదైంది. కామారెడ్డి జిల్లాలో ఏడాది వ్యవధిలో నమోదైన కేసుల వివరాలను ఎస్పీ సింధూశర్మ వెల్లడించారు. సోమవారం తన కార్యాలయంలో నిర్వహించిన విలేకరుల సమావేశంలో అడిషనల్‌ ఎస్పీ నరసింహారెడ్డితో కలిసి వార్షిక నేర నివేదికను విడుదల చేశారు. 2023లో జిల్లావ్యాప్తంగా మొత్తం 5,578 కేసులు నమోదు కాగా, ఈసారి 6,006 కేసులు నమోదయ్యాయని ఎస్పీ తెలిపారు. ఇందులో 708 ఆస్తి సంబంధిత నేరాలు, 38 హత్యలు, 35 కిడ్నాప్‌లు, 60 అత్యాచారాలు, 513 రోడ్డు ప్రమాద కేసులు, 1,441 ఇతర కేసులు, 561 స్పెషల్‌ లోకల్‌ చట్టాలు కేసులుగా, 535 మిస్సింగ్‌ కేసులు నమోదయ్యాయని వివరించారు.

• 2023లో 28 హత్య కేసులు నమోదు కాగా, ఈసారి ఆ సంఖ్య 37కు పెరిగింది. 35 హత్య కేసుల్లో నిందితులను అరెస్టు చేశామని, త్వరలోనే వారికి శిక్ష పడేలా చర్యలు తీసుకుంటామని సింధూశర్మ తెలిపారు. ఆస్తి సంబంధిత నేరాల్లో 65 శాతం కేసులను ఛేదించామని, 53 శాతం సొత్తును స్వాధీనం చేసుకుని బాధితులకు అందించామన్నారు.
• ఇక, మహిళా సంబంధిత నేరాల్లోనూ పెరుగదల నమోదైంది. నిరుడు 361 కేసులు నమోదు కాగా, ఈసారి 517 కేసులు నమోదు కావడం గమనార్హం. 12 హత్యలు, 60 అత్యాచార ఘటనలు చోటు చేసుకున్నాయి. 304 గృహ హింస, 103 లైంగిక వేధింపులు, 25 కిడ్నాప్‌ కేసులు నమోదయ్యాయని ఎస్పీ తెలిపారు. షీ టీమ్‌లు చురుగ్గా పని చేస్తున్నాయని, ఈ సంవత్సరంలో 712 అవగాహన కార్యక్రమాలు నిర్వహించినట్లు సింధూశర్మ చెప్పారు. 2,094 హాట్‌ స్పాట్‌లను పరిశీలించామని, 72 కేసులు నమోదు చేశామన్నారు. 56 లక్షల విలువైన ఫేక్‌ కరెన్సీని స్వాధీనం చేసుకున్నామని చెప్పారు. ఎవరికైనా సమస్య ఉంటే జిల్లా పోలీసు కార్యాలయంలోని కంప్లెయింట్‌ సెల్‌ (87126 86142)కు ఫిర్యాదు చేయాలని ఎస్పీ సూచించారు. 2025లో నేరాలు తగ్గేలా చర్యలు తీసుకుంటామన్నారు.

అన్ని కోణాల్లో విచారణ..

భిక్కనూరు ఎస్సై సాయికుమార్‌, బీబీపేట కానిస్టేబుల్‌ శ్రుతి, కంప్యూటర్‌ ఆపరేటర్‌ నిఖిల్‌ ఆత్మహత్య కేసులో అన్ని కోణాల్లో విచారణ చేస్తున్నామని ఎస్పీ సింధూశర్మ వెల్లడించారు. ముగ్గురి మృతి కేసుపై విలేకరులు ప్రశ్నించగా ఆమె స్పందించారు. అవి హత్యలా.. ఆత్మహత్యలా? ప్రమాదకరంగా జరిగిందా? కాపాడే క్రమంలో జరిగిందా? అన్న కోణాల్లో దర్యాప్తు కొనసాగుతున్నదని తెలిపారు. ముగ్గురి మొబైల్‌ ఫోన్లు, నీటి నమూనాలు సేకరించి ఫోరెన్సిక్‌ ల్యాబ్‌కు పంపించామని, నివేదిక వచ్చాక వివరాలు వెల్లడిస్తామని చెప్పారు.