ఆంక్షల వేళ.. మద్యం వరద

పోలీసుల ఆంక్షల వేళ మద్యం విక్రయాలు పోటెత్తాయి. బీర్లు, లిక్కర్‌ అమ్మకాలు వెల్లువెత్తాయి. వాస్తవానికి మద్యం విక్రయాలపై పోలీసులు నిషేధం విధిస్తే అసలు అమ్మకాలే చేపట్టొద్దు. కానీ, అందుకు విరుద్ధంగా భారీగా విక్రయాలు చోటు చేసుకోవడం విస్మయానికి గురి చేస్తున్నది.

• నిషేధాజ్ఞలకు నీళ్లు.. విక్రయాలు ఫుళ్లు
• సీపీ ఆదేశాలు బేఖాతరు
• భారీగా సొమ్ము చేసుకున్న వ్యాపారులు
• పూర్తిగా సహకరించిన ఎక్సైజ్‌, పోలీసులు?
• వారంలోనే రూ.27.73 కోట్ల మద్యం విక్రయాలు

నిజామాబాద్‌, సెప్టెంబర్‌ 19 (నమస్తే తెలంగాణ ప్రతినిధి): పోలీసుల ఆంక్షల వేళ మద్యం విక్రయాలు పోటెత్తాయి. బీర్లు, లిక్కర్‌ అమ్మకాలు వెల్లువెత్తాయి. వాస్తవానికి మద్యం విక్రయాలపై పోలీసులు నిషేధం విధిస్తే అసలు అమ్మకాలే చేపట్టొద్దు. కానీ, అందుకు విరుద్ధంగా భారీగా విక్రయాలు చోటు చేసుకోవడం విస్మయానికి గురి చేస్తున్నది. వినాయక నిమజ్జనం సందర్భంగా సీపీ కల్మేశ్వర్‌ సింగేనవార్‌ మద్యం విక్రయాలపై ఆంక్షలు విధించారు. బహిరంగ మద్యపానాన్ని నిషేధిస్తూ సీపీ ఈ నెల 12న ఉత్తర్వులు జారీ చేశారు. శాంతిభద్రతల పరిరక్షణలో భాగంగా వారం వ్యవధిలో రెండు రోజుల పాటు (ఆది, మంగళవారాల్లో) అమ్మకాలను నిలిపి వేయాలని ఆదేశించారు. అదనపు జిల్లా మెజిస్ట్రేట్‌గా తనకున్న విచక్షణాధికారాలను ఉపయోగించి తెలంగాణ రాష్ట్ర ఎక్సైజ్‌ యాక్ట్‌ 1968 ప్రకారం సెక్షన్‌ 20(1)ని అనుసరించి ఆంక్షలు విధించారు. కానీ సీపీ ఆదేశాలకు విరుద్ధంగా భారీగా మద్యం విక్రయాలు జరగడం గమనార్హం. మద్యం వ్యాపారుల దురాశకు తోడు కొందరు ఎక్సైజ్‌, పోలీసు శాఖ సిబ్బంది వారికి సహకరించడం వల్లే నిషేధ కాలంలోనూ విచ్చలవిడిగా అమ్మకాలు జరిగాయి.

కాసుల కక్కుర్తి..

• వినాయక ఉత్సవాల సందర్భంగా జిల్లాలో 9వ రోజు, 11వ రోజు నిమజ్జన కార్యక్రమాలు భారీగా జరుగుతుంటాయి. నిమజ్జన ప్రక్రియ ప్రశాంతంగా ముగియడానికి గాను ఈ రెండు రోజుల్లో మద్యం విక్రయాలపై సీపీ ఆంక్షలు విధించారు. కానీ ఆయన ఆదేశాలకు విరుద్ధంగా క్షేత్ర స్థాయిలో వ్యవహారం జరిగింది. పోలీసుల చర్యలు సత్ఫలితాలను ఇవ్వకపోగా, సామాన్య జనాల జేబులకు చిల్లులు తెచ్చి పెట్టింది. ఆంక్షలను అడ్డం పెట్టుకుని మద్యం వ్యాపారులు దొంగచాటుగా అధిక ధరకు విక్రయించి సొమ్ము చేసుకున్నారు. రూ.150 ఉండే లైట్‌ బీర్‌ను రూ.180-200 వరకు విక్రయించారు. లిక్కర్‌ రేట్లు సైతం పెంచేసి దండుకున్నారు. వైన్స్‌ దుకాణాల మూత అన్నది కేవలం సాంకేతికంగానే కనిపించినా, విక్రయాల నిలిపివేత ఎక్కడా జరుగలేదు. నిషేధాజ్ఞలు అమల్లో ఉన్న రోజే నిజామాబాద్‌ జిల్లా కేంద్రంలో బీర్‌ సీసాలతో యువకులు దాడి చేసుకోవడమే అందుకు నిదర్శనం.
• నిజామాబాద్‌ నగరంలోని బైపాస్‌ రోడ్డు వెంట ఓ మద్యం దుకాణం, బార్‌ షాపుల నిర్వాహకులు గుట్టుగా పెద్ద ఎత్తున ఈవిక్రయాలు జరిపారు. పులాంగ్‌ రోడ్డు, బైపాస్‌ రోడ్డులో పలు బార్లు, హోటళ్లు, వైన్‌ దుకాణాల్లో తెర వెనుక షటర్లు తీసి మరీ మద్యం అమ్మకాలు చేపట్టారు. పోలీసులకు తెలిసినా పట్టించుకోలేదన్న ఆరోపణలు ఉన్నాయి.
• రెంజల్‌ మండలంలోనూ ఇదే తీరు కనిపించింది. నిర్మానుష్య ప్రాంతాలు, వాహనాల్లో తిరుగుతూ విక్రయాలు జరిపారు. నవీపేట మీదుగా బాసరకు 8ఫీట్లలోపు వినాయక ప్రతిమలు బయలుదేరాయి. ఈ మార్గంలోనూ అక్రమార్కులు స్థానిక మద్యం వ్యాపారులతో చేతులు కలిపి అధిక ధరలకు మద్యం అమ్మారు. ఇక ఉమ్మెడకు వెళ్లే మార్గంలో మాక్లూర్‌, నందిపేట మండలాల్లోనూ దారిపొడవునా విచ్చలవిడిగా అమ్మకాలు జరిగాయి. బెల్టుషాపుల్లో అయితే మద్యం విక్రయాలకు అడ్డే లేకుండా పోయింది. నిమజ్జనంలో నిమగ్నమైన పోలీసులు నిద్రలేని రాత్రులు గడిపారు. కానీ నిఘా వ్యవస్థ మాత్రం నిద్దుర పోయింది. అక్రమ విక్రయాలపై స్పెషల్‌ బ్రాంచ్‌ పోలీసులకు సమాచారం ఉన్నప్పటికీ సీపీని అప్రమత్తం చేయడంలో విఫలమైంది. అటు టాస్క్‌ఫోర్స్‌ విభాగం కూడా వైఫల్యం చెందింది. ఎక్సైజ్‌ శాఖ అధికారులైతే ఈ వ్యవహారంలో కళ్లు మూసుకున్నారు. తమ టార్గెట్లు పూర్తి చేసుకోవడమే ఏకైక లక్ష్యంగా బెల్టు షాపుల్లో మద్యం విక్రయాలను ప్రోత్సహించినట్లు తెలిసింది.

వారంలో కోట్లల్లో వ్యాపారం..

మాక్లూర్‌ మండలం మాదాపూర్‌లోని ఐఎంఎల్‌ డిపో గణాంకాల ప్రకారం.. గత వారం రోజుల్లో ఉమ్మడి నిజామాబాద్‌ జిల్లావ్యాప్తంగా రూ.27.73 కోట్లు మద్యం అమ్మకాలు జరిగాయి. సెప్టెంబర్‌ 11న ఉమ్మడి జిల్లాలో కేవలం రూ.62 లక్షల విలువ చేసే 456 లిక్కర్‌ కేసులు, 1831 బీర్‌ కేసులు విక్రయించగా, 12వ తేదీన ఏకంగా రూ.6.25కోట్లు, 13వ తేదీన కూడా రూ.5.10కోట్లు, 14న రూ.4.82 కోట్ల మద్యాన్ని వైన్‌ షాపుల యజమానులు కొనుగోలు చేశారు. ఆంక్షలు అమలు అవుతాయనే ముందుచూపుతోనే నిల్వ చేసుకుని, ఆ తర్వాత పక్కదారి పట్టించారు. సెప్టెంబర్‌ 18న (బుధవారం) రికార్డు స్థాయిలో రూ.10.30 కోట్లు విలువ చేసే 8,650 లిక్కర్‌ కేసులు, 27,421 బీర్‌ కేసులు అమ్ముడయ్యాయి. పోలీసుల ఆంక్షలు నిక్కచ్చిగా అమలై ఉంటే రూ.కోట్ల విలువ చేసే మద్యం ఎక్కడికక్కడే ఉండిపోవాలి. అలా కాకుండా రికార్డు స్థాయిలో లిక్కర్‌ బాటిళ్లు, బీర్‌ సీసాలకు వైన్‌ షాపుల నుంచి ఇండెంట్‌ రావడం మద్యం వ్యాపారుల గిమ్మిక్కును, పోలీసులు, ఎక్సైజ్‌ శాఖ తీరును తేటతెల్లం చేస్తున్నది.