Hasarga | ఖాళీ స్థలాలకు ఇంటి నంబర్లు.. నిరసనగా హంగర్గ గ్రామ పంచాయతీకి తాళం వేసిన పాలకవర్గం

పోతంగల్ మండలంలోని హంగర్గ గ్రామపంచాయతీ కార్యదర్శి వ్యవహారశైలిపై హంగర్గ సర్పంచ్‌, పాలకవర్గ సభ్యులు ఆగ్రహం వ్యక్తం చేశారు. స్థానిక ప్రజాప్రతినిధులకు సమాచారం ఇవ్వకుండా ఖాళీ స్థలాలకు ఇంటి నంబర్లు జారీ చేస్తున్నారని, ఇందుకోసం డబ్బులు తీసుకుంటున్నారంటూ ఆరోపించారు. ఈ వ్యవహారాన్ని నిరసిస్తూ మంగళవారం కార్యదర్శిని నిర్బంధించి కార్యాలయానికి తాళం వేసి నిరసనకు దిగారు.

Hasarga | పోతంగల్, అక్టోబర్ 13 : పోతంగల్ మండలంలోని హంగర్గ గ్రామపంచాయతీ కార్యదర్శి వ్యవహారశైలిపై హంగర్గ సర్పంచ్‌, పాలకవర్గ సభ్యులు ఆగ్రహం వ్యక్తం చేశారు. స్థానిక ప్రజాప్రతినిధులకు సమాచారం ఇవ్వకుండా ఖాళీ స్థలాలకు ఇంటి నంబర్లు జారీ చేస్తున్నారని, ఇందుకోసం డబ్బులు తీసుకుంటున్నారంటూ ఆరోపించారు. ఈ వ్యవహారాన్ని నిరసిస్తూ మంగళవారం కార్యదర్శిని నిర్బంధించి కార్యాలయానికి తాళం వేసి నిరసనకు దిగారు. సంబంధిత కార్యదర్శికి సోమవారం బదిలీ అయినట్లు తెలిసిందని సర్పంచ్‌, పాలకవర్గ సభ్యులు పేర్కొన్నారు. అయినప్పటికీ మంగళవారం ఉదయాన్నే కార్యాలయానికి వచ్చి, తమకు తెలియకుండా మరికొందరికి ఇంటి నంబర్ల కోసం రసీదులు జారీ చేశారని ఆరోపించారు.

బదిలీ అయిన వ్యక్తి ఏ హోదాలో రసీదులు జారీ చేస్తున్నారని ప్రశ్నించారు. గ్రామంలో ఇంటి నంబర్ల కేటాయింపు వ్యవహారంలో తమకు సమాచారం ఇవ్వకపోవడంపై తీవ్ర అసంతృప్తి వ్యక్తం చేశారు. కార్యదర్శి తీరుపై పలుమార్లు ఉన్నతాధికారుల దృష్టికి తీసుకెళ్లినా తగిన చర్యలు తీసుకోలేదని సర్పంచ్‌, పాలకవర్గ సభ్యులు ఆరోపించారు. గ్రామపంచాయతీ వ్యవహారాల్లో పారదర్శకత పాటించాలని, ఖాళీ స్థలాలకు ఇంటి నంబర్ల జారీపై సమగ్ర విచారణ చేపట్టాలని డిమాండ్‌ చేశారు. సంబంధిత ఉన్నతాధికారులు గ్రామానికి వచ్చి వివరణ ఇచ్చే వరకు కార్యాలయానికి వేసిన తాళం తీయబోమని స్పష్టం చేస్తూ అక్కడే బైఠాయించారు.