దర్శనమిచ్చిన నెలవంక

నెలవంక మెరిసింది. రంజాన్‌ పండుగ వచ్చేసింది. పుణ్యఫలాల పవిత్ర రంజాన్‌ మాసం ఉపవాస దీక్షలు షవ్వాల్‌ మాసం నెలవంక కనిపించడంతో ముగిశాయి.

• ముగిసిన రంజాన్‌ ఉపవాస దీక్షలు
• నేడు ఈద్‌-ఉల్‌-ఫితర్‌
• ప్రత్యేక ప్రార్థనలకు ఈద్గాల వద్ద ఏర్పాట్లు

కామారెడ్డి/సుభాష్‌నగర్‌, ఏప్రిల్‌ 10: నెలవంక మెరిసింది. రంజాన్‌ పండుగ వచ్చేసింది. పుణ్యఫలాల పవిత్ర రంజాన్‌ మాసం ఉపవాస దీక్షలు షవ్వాల్‌ మాసం నెలవంక కనిపించడంతో ముగిశాయి. నెల రోజులపాటు కఠోర ఉపవాసం చేసిన ముస్లింలు బుధవారం సాయంత్రం దీక్షలు విరమించి గురువారం ఈద్‌-ఉల్‌-ఫితర్‌ జరుపుకొనేందుకు సిద్ధమయ్యారు. ఈ మేరకు ఉమ్మడి జిల్లాలోని మసీదులు, ఈద్గాలను ముస్లిముల సామూహిక ప్రార్థనల కోసం ముస్తాబు చేశారు.

సామూహిక ప్రార్థనలకు ఏర్పాట్లు..

రంజాన్‌ సందర్భంగా సామూహిక ప్రార్థనలకు మసీదులు, ఈద్గాల వద్ద మున్సిపల్‌ అధికారులు ఏర్పాట్లు చేశారు. నిజామాబాద్‌ నగరంలోని గాంధీచౌక్‌ సమీపంలో ఉన్న కచియా మసీదులో ఉదయం 8 గంటల నుంచి, ఖిల్లా ప్రాంగణంలోని జామా మసీదులో 8.30 నుంచి సామూహిక ప్రార్థనలు ప్రారంభించనున్నట్లు ముస్లిం మతపెద్దలు వెల్లడించారు. కామారెడ్డి పట్టణంలోని కోర్టు వద్ద ఉన్న దర్గా వద్ద మున్సిపల్‌ అధికారులు అన్ని ఏర్పాట్లు పూర్తిచేశారు.