కరోనా నిబంధనల ఉల్లంఘన : 13 మంది అభ్యర్థులపై ఎఫ్ఐఆర్

కరోనా మహమ్మారికి సంబంధించిన సెక్యూరిటీ ప్రోటోకాల్‌ను ఉల్లంఘించిన ప‌లువురు అభ్య‌ర్థుల‌పై ఎన్నిక‌ల క‌మిష‌న్ క‌న్నెర్ర జేసింది

April 24, 2021 / 06:28 PM IST

కరోనా నిబంధనల ఉల్లంఘన : 13 మంది అభ్యర్థులపై ఎఫ్ఐఆర్

కోల్‌కతా: కరోనా మహమ్మారికి సంబంధించిన సెక్యూరిటీ ప్రోటోకాల్‌ను ఉల్లంఘించిన ప‌లువురు అభ్య‌ర్థుల‌పై ఎన్నిక‌ల క‌మిష‌న్ క‌న్నెర్ర జేసింది. త‌మ ఆదేశాల‌ను ప‌ట్టించుకోకుండా ఎనిమిదవ దశలో పోటీ చేస్తున్న 13 మంది అభ్యర్థులపై ఎన్నికల కమిషన్ ఎఫ్ఐఆర్ దాఖలు చేసింది. మ‌రో 33 మంది అభ్యర్థులకు షో కాజ్ నోటీసులు జారీ చేసింది. అసెంబ్లీ ఎన్నిక‌ల్లో కొవిడ్-19 ప్రోటోకాల్‌ను ఉల్లంఘించిన అభ్యర్థుల విష‌యంలో కఠినంగా వ్యవహరించాలని కమిషన్ పూర్తి బెంచ్ అధికారులను ఆదేశించింది.

ఎఫ్‌ఐఆర్‌లు దాఖలు చేసిన 13 మంది అభ్యర్థుల్లో ఆరుగురు బీరుభం జిల్లాకు చెందినవారని అధికారులు తెలిపారు. ప్రోటోకాల్ అమలు విష‌యంలో కోల్‌కతా హైకోర్టు ఎందుకు జోక్యం చేసుకోవాల్సి వచ్చిందని జిల్లా ఎన్నికల అధికారులను సమావేశంలో ఈసీ ప్రశ్నించినట్లు స‌మాచారం. దీని తర్వాత‌నే కమిషన్ అధికారులు కఠినంగా వ్య‌వ‌హరించ‌డం ప్రారంభించారు. కరోనా మహమ్మారి ఉన్నప్పటికీ.. రాజకీయ పార్టీలు నిబంధనలను ఉల్లంఘించ‌డంపై కోల్‌క‌తా హైకోర్టు ఆగ్ర‌హం వ్య‌క్తం చేసింది. ప్రోటోకాల్ ఉల్లంఘించే వారిపై ఏం చ‌ర్య‌లు తీసుకున్నారో తెలుపాల‌ని అధికారుల‌ను ప్ర‌శ్నించింది. క‌రోనా వ్యాప్తిని నివారించేందుకు చ‌ర్య‌లు తీసుకోకుండా ఇలా కొవిడ్ ప్రోటోకాల్‌ను ఉల్లంఘించ‌డం నేరం కింద‌కే వ‌స్తుంద‌ని హైకోర్టు స్ప‌ష్టం చేసింది. దాంతో ఎన్నిక‌ల క‌మిష‌న్ ఉల్లంఘనుల‌పై చ‌ర్య‌లు తీసుకునేందుకు ఉప‌క్ర‌మించింది. ముందుగా 13 మందిపై ఎఫ్ఐఆర్‌ను న‌మోదు చేసిన ఈసీ.. మ‌రో 33 మంది అభ్య‌ర్థుల‌కు కొవిడ్ ప్రోటోకాల్ ఉల్లంఘించారని ఆరోప‌ణ‌లు ఉన్న‌ మీపై ఎందుకు చర్య‌లు తీసుకోకూడ‌దో వివ‌రించాల‌ని నోటీసులు జారీ చేసింది.