సీఈవో పే: టిమ్ కుక్‌కు 171వ ర్యాంక్‌.. ఎలాగంటే..!!

సీఈవో పే: టిమ్ కుక్‌కు 171వ ర్యాంక్‌.. ఎలాగంటే..!! టాప్-500 కంపెనీల సీఈవోల వేత‌నాల‌తో పోలిస్తే టిమ్ కుక్ 171 ర్యాంక్ పొందారు. పేకామ్ సీఈవో చాద్...

June 2, 2021 / 02:12 PM IST

న్యూయార్క్‌: ఒక కార్పొరేట్ సంస్థ‌కు సీఈవో అంటే.. వేత‌న భ‌త్యాలు.. ఇత‌ర ఖ‌ర్చులు అన్నీ సంస్థ యాజ‌మాన్యానివే.. హోదా కూడా బాగానే ఉంటుంది. అదే టెక్ దిగ్గ‌జం ఆపిల్ సీఈవో అంటే ఇక మాట‌ల్లో చెప్పేదేముంది.. ఇదంతా ఆపిల్ సీఈవో టిమ్ కుక్ తీసుకునే వేత‌నం గురించే.. కానీ ప్ర‌పంచంలోని టాప్-500 కంపెనీల సీఈవోల వేత‌నాల‌తో పోలిస్తే టిమ్ కుక్ 171 ర్యాంక్ పొందారు.

స్టాండ‌ర్డ్ అండ్ పూర్ (ఎస్ అండ్ పీ) -500 కంపెనీల‌ మార్కెట్ క్యాపిట‌ల్ ప్ర‌కారం ఆపిల్ టాప్‌లోనే ఉంది. కానీ ఆ సంస్థ సీఈవో టిమ్ కుక్ నేరుగా తీసుకునే వేత‌నం ఇత‌ర సంస్థల కంటే చాలా త‌క్కువ అని వాల్ స్ట్రీట్ జ‌ర్న‌ల్ ఓ వార్తా క‌థ‌నం ప్ర‌చురించింది.

ప్ర‌పంచంలోనే భ‌త్యాలతోపాటు మొత్తం వేత‌నం 211 మిలియ‌న్ల డాల‌ర్లు తీసుకుంటున్న పేకామ్ సీఈవో చాద్ ఆర్‌.రిచిస‌న్ కంటే టిమ్ కుక్ చాలా వెనుక బ‌డి ఉన్నారు. అడోబ్ సీఈవో శంత‌ను నారాయ‌ణ్ 45 మిలియ‌న్ల డాల‌ర్ల‌తో మూడో స్థానంలో ఉన్నారు.

23 మిలియ‌న్ల డాల‌ర్ల‌తో పేపాల్ సీఈవో 49వ స్థానంలో, ఐబీఎం సీఈవో అర‌వింద్ కృష్ణ 17 మిలియ‌న్ల డాల‌ర్ల వేత‌నంతో 122వ స్థానంలో నిలిచారు.

వారెన్ బ‌ఫెట్ 3,80,328 డాల‌ర్ల‌తో 413వ ర్యాంక్‌, ట్విట్ట‌ర్ అధినేత జాక్ డోర్సీ కేవ‌లం ఒక డాల‌ర్తో 414వ ర్యాంక్‌, వేత‌నం లేని సీఈవోగా టెస్లా సీఈవో ఎల‌న్ మ‌స్క్ త‌ర్వాతీ స్థానంలో ఉన్నారు.

టాప్‌-500 కంపెనీల సీఈవోల డేటా ప్ర‌కారం ఆపిల్ సీఈవోగా టిమ్ కుక్ తీసుకుంటున్న కాంపెన్సేష‌న్ పే గ‌తేడాది 1,47,69,259 డాల‌ర్లు మాత్ర‌మే. చూడ‌టానికి ఎక్కువ మొత్తంలో క‌నిపిస్తున్న 2019 కాంపెన్సేష‌న్ పేతో పోలిస్తే 28 శాతం పెరిగింది. అందువ‌ల్లే టిమ్‌కుక్ 171వ ర్యాంక్‌తో స‌రిపెట్టుకుంటున్నారు.

మిగ‌తా ప్ర‌ధాన సంస్థ‌ల సీఈవోల మాదిరిగానే టిమ్ కుక్ వేత‌నాన్ని తీసుకుంటున్నార‌ని ర్యాంకులు చెబుతున్నాయి. కానీ టిమ్ కుక్‌తోపాటు ప‌లు సంస్థ‌ల సీఈవోలు.. ఆయా కంపెనీల వాటాదారుల‌కు సార‌ధ్యం వ‌హిస్తారు. దీంతో వారి మొత్తం ఆదాయంలో వేత‌నం చాలా త‌క్కువ‌గా ఉంటుంది.