గర్భిణులకు 2-డీజీ వద్దు

• పాలిచ్చే తల్లులు, 18 ఏండ్లలోపువారికి కూడా ఇవ్వొద్దు
• ఔషధ వినియోగంపై డీఆర్డీవో మార్గదర్శకాలు జారీ

న్యూఢిల్లీ, జూన్‌ 1: కరోనా రోగుల చికిత్స కోసం తీసుకొచ్చిన 2-డీజీ (2 డీఆక్సీ-డీ-గ్లూకోజ్‌) ఔషధాన్ని గర్భిణులు, పాలిచ్చే తల్లులకు ఇవ్వకూడదని రక్షణ పరిశోధన, అభివృద్ధి సంస్థ (డీఆర్డీవో) తెలిపింది. 18 ఏండ్లలోపువారూ వినియోగించవద్దని సూచించింది. ఈ మేరకు ఔషధ వినియోగంపై మార్గదర్శకాలను మంగళవారం విడుదల చేసింది. వైద్యుల పర్యవేక్షణలోనే ఈ ఔషధాన్ని వాడాలని సూచించింది.ఈ ఔషధ సరఫరా కోసం రోగులు, వైద్య సిబ్బంది డాక్టర్‌ రెడ్డీస్‌ ల్యాబ్స్‌ను సంప్రదించొచ్చని డీఆర్డీవో వెల్లడించింది. పొడి రూపంలో ఉండే ఈ మందును నీళ్లలో కలుపుకుని తాగాలి. ఈ ఔషధం ఒక్కో సాచెట్‌ ధరను డాక్టర్‌ రెడ్డీస్‌ రూ. 990గా నిర్ణయించిన విషయం విదితమే.

తీవ్ర లక్షణాల వారికి 10 రోజుల్లో ఈ డ్రగ్‌ సూచించాలి
2-డీజీ వాడకానికి మార్గదర్శకాలివే..

• దవాఖానలో చికిత్స పొందుతున్న కొవిడ్‌ రోగులకు అనుబంధ చికిత్సగా ఉపయోగించేందుకు 2-డీజీ ఔషధాన్ని ఇవ్వాలి.
• గర్భిణులు, పాలిచ్చే తల్లులు, 18 ఏండ్లలోపు వారికి 2-డీజీ ఔషధాన్ని ఇవ్వకూడదు.
• మధ్యస్తం నుంచి తీవ్ర లక్షణాలతో బాధపడుతున్న కరోనా రోగులకు వీలైనంత త్వరగా అంటే 10 రోజుల్లోపు వైద్యులు ఈ ఔషధాన్ని సూచించాలి.
• అదుపులోలేని మధుమేహం, తీవ్రమైన గుండె సంబంధిత సమస్యలు, అక్యూట్‌ రెస్పిరేటరీ డిస్ట్రెస్‌ సిండ్రోవ్‌ు, కాలేయం, మూత్రపిండాల సంబంధిత వ్యాధులతో బాధపడేవారిపై ఈ ఔషధాన్ని ఇంకా పరీక్షించలేదు. అలాంటి వారి విషయంలో ముందుజాగ్రత్త అవసరం.