75 వేల దిగువకు సెన్సెక్స్‌

దేశీయ స్టాక్‌ మార్కెట్లు కుదేలయ్యాయి. అంతర్జాతీయ మార్కెట్లు తీవ్ర ఒడిదుడుకులకు లోనుకావడంతోపాటు మదుపరులు లాభాల స్వీకరణకు మొగ్గుచూడటంతో వరుసగా నాలుగోరోజూ సూచీలు నష్టాల్లోకి జారుకున్నాయి.

• భారీ నష్టాల్లో స్టాక్‌ మార్కెట్లు
• నాలుగు రోజుల్లో 5 లక్షల కోట్లు ఆవిరి

ముంబై, మే 29: దేశీయ స్టాక్‌ మార్కెట్లు కుదేలయ్యాయి. అంతర్జాతీయ మార్కెట్లు తీవ్ర ఒడిదుడుకులకు లోనుకావడంతోపాటు మదుపరులు లాభాల స్వీకరణకు మొగ్గుచూడటంతో వరుసగా నాలుగోరోజూ సూచీలు నష్టాల్లోకి జారుకున్నాయి. వచ్చేవారం సార్వత్రిక ఎన్నికల ఫలితాలు విడుదలకానుండటం, అమెరికా ఫెడరల్‌ రిజర్వు ఇప్పట్లో వడ్డీరేట్లు తగ్గించే అవకాశాలు లేకపోవడంతో మదుపరులు ప్రాఫిట్‌ బుకింగ్‌కు మొగ్గుచూపారు. నష్టాల్లో ప్రారంభమైన సూచీలు చివరి వరకు ఇదే ట్రెండ్‌ను కొనసాగించాయి. ఒక దశలో 700 పాయింట్లకు పైగా నష్టపోయిన 30 షేర్ల ఇండెక్స్‌ సూచీ సెన్సెక్స్‌ చివరకు 667.55 పాయింట్ల నష్టంతో 75 వేల పాయింట్ల దిగువకు పడిపోయింది. చివరకు 74,502.90 వద్ద స్థిరపడింది. ఈ నెల 27న సెన్సెక్స్‌ రికార్డు స్థాయి 76 వేలను అధిగమించిన విషయం తెలిసిందే. అటు ఎన్‌ఎస్‌ఈ నిఫ్టీ కూడా 183.45 పాయింట్లు కోల్పోయి 22,704.70 వద్ద నిలిచింది. దీంతో లక్షల కోట్ల మదుపరుల సంపద హారతి కర్పూరంలా కరిగిపోయింది. గత నాలుగు సెషన్లలో మదుపరులు రూ.5.12 లక్షల కోట్ల సంపదను కోల్పోయారు. దీంతో బీఎస్‌ఈలో లిైస్టెన కంపెనీల విలువ రూ.5,12,921.96 కోట్లు కోల్పోయి రూ.4,15,09,713.94 కోట్ల(4.98 ట్రిలియన్‌ డాలర్లు) వద్ద నిలిచింది.

• టెక్‌ మహీంద్రా, ఐసీఐసీఐ బ్యాంక్‌, బజాజ్‌ ఫిన్‌సర్వ్‌, హెచ్‌డీఎఫ్‌సీ బ్యాంక్‌, అల్ట్రాటెక్‌ సిమెంట్‌, యాక్సిస్‌ బ్యాంక్‌, రిలయన్స్‌, ఇన్ఫోసిస్‌ షేర్లు నష్టపోయాయి.
• కానీ, పవర్‌ గ్రిడ్‌, సన్‌ఫార్మా, నెస్లె, ఐటీసీ, భారతీ ఎయిర్‌టెల్‌ షేర్లు లాభాల్లో ముగిశాయి.
• రంగాలవారీగా చూస్తే బ్యాంకెక్స్‌ 1.37 శాతం, ఫైనాన్షియల్‌ సర్వీసులు 1.32 శాతం, ఆయిల్‌ అండ్‌ గ్యాస్‌, రియల్టీ రంగ షేర్లు నష్టాల్లోకి జారుకున్నాయి.
• ఈ నెల 24 నుంచి ఇప్పటి వరకు సెన్సెక్స్‌ 915.14 పాయింట్లు లేదా 1.21 శాతం, నిఫ్టీ 183.45 పాయింట్లు నష్టపోయాయి.