జిమ్ చేస్తుండగా గుండెపోటు వచ్చి ఇటీవల కొందరు సెలబ్రిటీలు కన్నుమూశారు. తాజాగా, హాస్యనటుడు రాజు శ్రీవాస్తవ్కు ఢిల్లీలోని జిమ్లో వ్యాయామం చేస్తుండగా గుండెపోటు రావడంతో దవాఖానకు తరలించారు. వైద్యులు అతడిని కాపాడేందుకు శాయశక్తులా ప్రయత్నిస్తున్నప్పటికీ అతని పరిస్థితి విషమంగానే ఉన్నట్లు తెలుస్తున్నది.. ఇటీవల ఇలాంటి కేసుల సంఖ్య పెరగడం తీవ్రమైన వ్యాయామాలు గుండెపోటు ప్రమాదాన్ని పెంచగలవా? అనే చర్చకు దారితీసింది.
వ్యాయామం లేదా భారీ శారీరక శ్రమ సమయంలో అకస్మాత్తుగా గుండె ఆగిపోవడం అనేది ఇప్పటికే ఉన్న అడ్డంకులు, రోగ నిర్ధారణ లేదా రోగనిర్ధారణ చేయని కారణంగా ఎక్కువగా సంభవిస్తుందని వైద్య నిపుణులు అంటున్నారు. గుండె రక్తనాళపు గోడల్లో చీలిక ఏర్పడితే అది గుండెపోటు లాంటి ప్రమాదానికి దారితీయవచ్చని చెబుతున్నారు. గుండెకు రక్తం అందించే రక్తనాళాల్లో చెప్పుకోదగ్గ బ్లాక్స్ లేకపోయినా.. కొవ్వుకణాలతో ఏర్పడిన ‘ప్లాక్’పైన పగుళ్లు ఏర్పడితే రక్తం గడ్డకట్టి, అది రక్తప్రవాహానికి అడ్డంకిగా మారిపోతుందని, ఇదికాస్తా గుండెపోటుకు కారణం కావచ్చని వివరిస్తున్నారు. మరికొందరిలో ఎలాంటి ప్లాక్స్ / బ్లాక్ లేకపోయినా అక్కడ అకస్మాత్తుగా రక్తపు గడ్డలు ఏర్పడటం వల్ల కూడా గుండెపోటు రావచ్చని అంటున్నారు. కొంతమందిలో క్లాట్స్ ఏర్పడే తత్వం సహజంగానే ఉంటుందని నిపుణులు తెలిపారు. వీటితోపాటు జన్యుపరమైన కారణాలతో గుండెపోటు వచ్చే అవకాశాలు ఎక్కువని చెబుతున్నారు. దీనికి ఫిట్నెస్తో సంబంధం లేదని అంటున్నారు.