మహాకుంభ సంప్రోక్షణ పర్వం సాగిందిలా..

యాదాద్రి, మార్చి 28 : ఉదయం 11.55 గంటలకు దివ్య విమానగోపురంపై ప్రతిష్ఠించిన మహా సుదర్శన చక్రానికి సీఎం కేసీఆర్‌ సంప్రోక్షణ చేసి ఆలయాన్ని ప్రారంభించారు. హైదరాబాద్‌ ప్రగతిభవన్‌ నుంచి కుటుంబ సమేతంగా చాపర్‌పై బయల్దేరిన సీఎం కేసీఆర్‌ 9.20 గంటలకు యాదాద్రికి చేరుకొని ఏరియల్‌ సర్వే నిర్వహించారు.

• 9.23 గంటలకు టెంపుల్‌ సిటీపైన గల హెలిప్యాడ్‌ వద్దకు, అక్కడి నుంచి వీవీఐపీ అతిథిగృహానికి చేరుకున్నారు.
• యాదాద్రి బాలాయంలో ప్రతిష్ఠించిన సువర్ణమూర్తులు, ఉత్సవమూర్తులను ప్రధానాలయానికి చేరవేసే మహాశోభాయాత్ర ఉదయం 9.58 గంటలకు ప్రారంభమైంది.
• 10.05 గంటలకు బాలాలయం తూర్పు ద్వారం గుండా శోభాయాత్ర బయటికి రాగా సీఎం కేసీఆర్‌ సతీమణి శోభ, ఎమ్మెల్సీ కవిత దంపతులు, ఎంపీ సంతోశ్‌కుమార్‌, మంత్రులు, ఎమ్మెల్సీలు, ఎంపీలు, ఎమ్మెల్యేలు, జిల్లా పరిషత్‌ చైర్మన్లు పాల్గొన్నారు.
• 10.21 గంటలకు కవచమూర్తుల పల్లకీని మంత్రులు ఎర్రబెల్లి దయాకర్‌రావు, నిరంజన్‌రెడ్డి మోశారు.
• 10.34 గంటల సమయంలో సువర్ణమూర్తులు, ఉత్సవమూర్తుల శోభాయాత్రలో సీఎం కేసీఆర్‌ పాల్గొని పల్లకీని మోశారు. ఆలయం చుట్టూ ప్రదక్షిణ చేశారు.
• 10.48 గంటలకు గర్భాలయంపై ప్రతిష్ఠించిన దివ్యవిమానగోపురంపైకి సీఎం కేసీఆర్‌ ఎక్కారు.
• 10. 52 గంటలకు రాష్ట్ర మంత్రులు, ప్రభుత్వ విప్‌లు వారికి కేటాయించిన గోపురాలు, ఉపాలయాల వద్దకు చేరుకున్నారు.
• 10.53 గంటలకు సువర్ణమూర్తులు, ఉత్సవమూర్తులను గర్భాలయంలోకి తీసుకెళ్లారు.
• 11.06 గంటలకు విమానగోపురం వద్ద కలశసంప్రోక్షణ పూజలు ప్రారంభమయ్యాయి.
• 11.17కు ప్రధానార్చకులు సంకల్ప పూజలు చేపట్టారు.
• 11.18 గంటలకు పవిత్రమైన మంత్రజలాలో స్థలశుద్ధి చేశారు.
• 11.32 గంటలకు ప్రధానార్చకులు సీఎం కేసీఆర్‌కు కంకణధారణ చేశారు.
• 11.35 గంటలకు ప్రధానార్చకులు మహా సుదర్శన చక్రానికి ప్రాణ ప్రతిష్ఠ చేశారు.
• 11.39 గంటలకు సీఎం కేసీఆర్‌ సుదర్శన చక్రానికి పూలమాల వేశారు.
• 11.55 గంటలకు సీఎం పవిత్ర మంత్ర జలాలతో మహాసుదర్శన చక్రానికి సంప్రోక్షణ చేశారు. అనంతరం సాష్టాంగ నమస్కారం చేశా రు. సుదర్శన చక్రం చుట్టూ ప్రదక్షిణలు చేశారు.
• మధ్యాహ్నం 12.04 గంటలకు సీఎం కేసీఆర్‌ ప్రధానాలయంలోకి చేరుకున్నారు. ధ్వజస్తంభం, బలిపీఠం, ఆళ్వారులకు నమస్కరించారు.
• 12.20 గంటలకు కుటుంబ సమేతంగా గర్భాలయంలోకి ప్రవేశించి స్వయంభువులను దర్శించుకున్నారు. అనంతరం అర్చకులు వేదాశీర్వచనం చేశారు.
• 12.38 గంటలకు సీఎం కేసీఆర్‌ బయటికి వచ్చారు. అనంతరం ప్రధానాలయ మాఢవీధుల్లో రథశాల వద్ద ఆలయ నిర్మాణంలో భాగస్వాములైన వారిని సన్మానించారు. అనంతరం ప్రెసిడెన్షియల్‌ సూట్‌కు వెళ్లి భోజనం చేశారు.
• 2.34 గంటలకు ప్రగతిభవన్‌కు తిరుగు పయనమయ్యారు.

సీఎం కేసీఆర్‌ ధన్యజీవి

యాదాద్రి దివ్యక్షేత్రాన్ని అద్భుతమైన రీతిలో పునఃనిర్మాణం చేసిన సీఎం కేసీఆర్‌ ధన్యుడు. ఇంత గొప్ప ఆలయ నిర్మాణ బాధ్యతలు తన భుజస్కందాలపై వేసుకొని పూర్తి చేసిన ఆయన అసమాన్యుడు. యాదాద్రి ఆలయ చరిత్రలో సీఎం కేసీఆర్‌ సార్‌ నిలిచిపోతారు. మహాకుంభ సంప్రోక్షణ పర్వాలు మహాద్భుతంగా ముగిశాయి. కనీవినీ ఎరుగని రీతిలో ఆలయ నిర్మాణం జరిగింది. తెలంగాణలో మరెక్కడాలేని విధంగా నిర్మాణాలు పూర్తయి స్వయంభువు నారసింహుడి దర్శనం భక్తులకు కలిగింది.
-ప్రభుత్వవిప్‌ గొంగిడి సునీతామహేందర్‌రెడ్డి