ర‌ష్యా నుంచి అమెరికాపై సైబ‌ర్ దాడులు: ఎఫ్‌బీఐ డైరెక్ట‌ర్‌

రష్యాలో కూర్చున్న హ్యాకర్లు అమెరికాలో సైబర్ దాడులు జరిపినట్లు అమెరికా ఇంటెలిజెన్స్ ఏజెన్సీ ఫెడరల్ బ్యూరో ఆఫ్ ఇన్వెస్టిగేషన్ (ఎఫ్‌బీఐ) తెలిపింది

June 4, 2021 / 10:00 PM IST

ర‌ష్యా నుంచి అమెరికాపై సైబ‌ర్ దాడులు: ఎఫ్‌బీఐ డైరెక్ట‌ర్‌

వాషింగ్టన్: రష్యాలో కూర్చున్న హ్యాకర్లు అమెరికాలో సైబర్ దాడులు జరిపినట్లు అమెరికా ఇంటెలిజెన్స్ ఏజెన్సీ ఫెడరల్ బ్యూరో ఆఫ్ ఇన్వెస్టిగేషన్ (ఎఫ్‌బీఐ) తెలిపింది. దాడులకు వందకు పైగా వివిధ రకాల రాన్స‌మ్‌వేర్‌ను ఉపయోగించార‌ని పేర్కొన్న‌ది. వాల్ స్ట్రీట్ జనరల్‌కు ఎఫ్‌బీఐ డైరెక్టర్ క్రిస్టోఫర్ వ్రే ఇచ్చిన ఇంటర్వ్యూలో ఈ విష‌యాల‌ను వెల్ల‌డించారు. ఇప్పటివరకు జరిపిన దర్యాప్తులో చాలావరకు రాన్స‌మ్‌వేర్‌ను రష్యన్ హ్యాకర్లు సృష్టించార‌ని చెప్పారు.

గత నెలలో సైబర్ క్రైమినల్స్ అమెరికాకు చెందిన‌ అతిపెద్ద గ్యాసోలిన్ పైప్‌లైన్‌ పంపిణీ నెట్‌వ‌ర్క్‌ను హ్యాక్ చేసి పెద్ద‌ దెబ్బ తీశారు. ఈ పైప్‌లైన్ యూఎస్‌లోని ఆగ్నేయ ప్రాంతానికి ఇంధనాన్ని అందించే ప్ర‌ముఖ సంస్థ‌. యూఎస్ డిపార్ట్మెంట్ ఆఫ్ జస్టిస్ పర్యవేక్షణలో ఇప్పటివరకు వివిధ ఏజెన్సీలు సైబర్ దాడులపై దర్యాప్తు చేస్తున్నాయి. ఎఫ్‌బీఐ డైరెక్ట‌ర్ క్రిస్టోఫ‌ర్ వ్రే ఇంట‌ర్వ్యూ అంశాల‌ను భావోద్వేగ ప్రకటన అని రష్యా తెలిపింది. హానికరమైన ప్రయోజనాల కోసం సైబర్ క్రైమినల్స్ రాన్సమ్‌వేర్‌ను సృష్టిస్తున్నారు. ఇది ఒక రకమైన సాఫ్ట్‌వేర్. ఈ-మెయిల్ లేదా ఇతర మార్గాల ద్వారా కంప్యూటర్‌లో చొప్పించ‌డం ద్వారా త‌మ ఆధీనంలోకి తీసుకుని త‌మ డిమాండ్ల‌ను సాధించుకుంటారు.