న్యూఢిల్లీ: ఒక చిన్నారి తల్లితో కలిసి పాడిన పాట, హావాభావాలు నవ్వులు పూయించాయి. ఈ వీడియో సామాజిక మాధ్యమాల్లో వైరల్ అయ్యింది. 2015లో విడుదలైన బాలీవుడ్ చిత్రం తమాషాలో అరిజిత్ సింగ్, అల్కా యాగ్నిక్ పాడిన అగర్ తుమ్ సాత్ హో.. ఎంతో పాపులర్ అయింది. అంజనా మదతిల్ అనే మహిళ ఉకులేలే అనే చిన్న గిటార్ను వాయిస్తూ ఈ పాట పాడారు. తల్లి పక్కనే కూర్చొన్న బాలిక కూడా పెదాలు కలుపుతూ ఈ పాట పాడింది. అంతేగాక ఆ చిట్టితల్లి ఈ పాటకు అనుగుణంగా చేతులు, తల వూపుతూ ప్రదర్శించిన హావాభావాలు నవ్వులు పూయించాయి.
49 సెకండ్లు ఉన్న ఈ వీడియోను గత వారం అంజన తన ఫేస్బుక్ ఖాతాలో పోస్ట్ చేశారు. ఉకులేలేపై పాటను సాధన చేయడం ఇదే తొలిసారని, దీనికి ఆరు నెలల సమయం పట్టిందని ఆమె పేర్కొన్నారు. మరోవైపు ఈ వీడియో సోషల్ మీడియాలో వైరల్ అయ్యింది. ఇప్పటికే 2.7 లక్షల మంది దీనిని చూశారు. చాలా మంది సామాజిక మాధ్యమాల్లో షేర్ చేశారు.
ఈ వీడియోపై పలువురు నెటిజన్లు కామెంట్ చేశారు. ఆ చిన్నారి పాటకు, హావాభావాలకు మంత్ర ముగ్ధులయ్యారు. చిట్టి తల్లి చాలా బాగా పాడిందని పలువురు మెచ్చుకున్నారు. కరోనా కష్టకాలంలో ఇలాంటివి కొంత ఊరటనిస్తాయని కొందరు పేర్కొన్నారు.