భవన నిర్మాణాలు సాగాలిలా..

అక్రమ, అనధికార నిర్మాణాలకు అడ్డుకట్ట వేసేందుకు సుప్రీంకోర్టు కీలక మార్గదర్శకాలను జారీ చేసింది. బిల్డర్లు, నిర్మాణదారులు, అధికారులు పాటించాల్సిన చర్యలపై మంగళవారం కీలక సూచనలు చేసింది.

• మార్గదర్శకాలు జారీ చేసిన సుప్రీంకోర్టు
• అక్రమ, అనధికార నిర్మాణాలకు అడ్డుకట్ట
• కీలకం కానున్న కంప్లీషన్‌ సర్టిఫికెట్‌

న్యూఢిల్లీ, డిసెంబర్‌ 17: అక్రమ, అనధికార నిర్మాణాలకు అడ్డుకట్ట వేసేందుకు సుప్రీంకోర్టు కీలక మార్గదర్శకాలను జారీ చేసింది. బిల్డర్లు, నిర్మాణదారులు, అధికారులు పాటించాల్సిన చర్యలపై మంగళవారం కీలక సూచనలు చేసింది. నిబంధనలను ఉల్లంఘించి చేపట్టిన నిర్మాణాలపై చట్ట ప్రకారం చర్యలు తీసుకోవాలని స్పష్టం చేసింది.

మీరట్‌లో అనుమతిలేని వాణిజ్య భవనాన్ని కూల్చివేయాలని అలహాబాద్‌ హైకోర్టు 2014లో ఇచ్చిన తీర్పును సవాల్‌ చేస్తూ రాజేంద్ర కుమార్‌ బర్జాత్య అనే వ్యక్తి సుప్రీంకోర్టును ఆశ్రయించారు. ఈ కేసును విచారించిన జస్టిస్‌ జేబీ పార్దివాలా, జస్టిస్‌ ఆర్‌ మహదేవన్‌ ధర్మాసనం.. అలహాబాద్‌ హైకోర్టు తీర్పును సమర్థించింది. అక్రమ నిర్మాణాలపై చేపట్టాల్సిన చర్యలపై మార్గదర్శకాలు జారీ చేస్తూ 36 పేజీల తీర్పు ఇచ్చింది.

అక్రమ నిర్మాణాలపై కీలక మార్గదర్శకాలు

• భవన నిర్మాణం పూర్తయ్యాక సంబంధిత అధికారులు బిల్డర్‌ లేదా నిర్మాణదారుడికి కంప్లీషన్‌/ఆక్యుపేషన్‌ సర్టిఫికెట్‌ జారీ చేయాలి.
• ఈ సర్టిఫికెట్‌ వచ్చిన తర్వాతే భవనాన్ని బిల్డర్‌ వినియోగదారులకు అప్పగించాలి.
• ఈ మేరకు భవన నిర్మాణానికి అనుమతి ఇచ్చేటప్పుడే బిల్డర్‌ నుంచి అధికారులు హామీ(అండర్‌టేకింగ్‌) పొందాలి.
• నిర్మాణం కొనసాగినన్ని రోజులు భవన నిర్మాణ ప్రణాళిక కాపీని నిర్మాణ స్థలం వద్ద ప్రదర్శించాలి.
• నిర్మాణ స్థలాన్ని అధికారులు పలుమార్లు తనిఖీ చేపట్టి, వివరాలను అధికారిక రికార్డుల్లో నమోదు చేయాలి.
• నిర్మాణం పూర్తయిన తర్వాత అధికారులు పరిశీలించాలి. నిబంధనలు, ఆమోదించిన ప్రణాళిక మేరకే నిర్మాణం జరిగిందని సంతృప్తి చెందిన తర్వాతే కంప్లీషన్‌/ఆక్యుపేషన్‌ సర్టిఫికెట్‌ జారీ చేయాలి.
• ఏదైనా అతిక్రమణను గుర్తిస్తే చట్టప్రకారం చర్యలు తీసుకోవడంతో పాటు డీవియేషన్లను సరి చేసే వరకు కంప్లీషన్‌/ఆక్యుపేషన్‌ సర్టిఫికెట్‌ జారీ చేయొద్దు.
• కంప్లీషన్‌/ఆక్యుపేషన్‌ సర్టిఫికెట్‌ను సమర్పించాకే భవనానికి విద్యుత్తు, నీటి సరఫరా, మురుగు కనెక్షన్లను ఇవ్వాలి.
• ప్రణాళికను ఉల్లంఘించి నిర్మాణం జరిగినట్టు కంప్లీషన్‌ సర్టిఫికెట్‌ ఇచ్చాక అధికారులకు తెలిసినా వెంటనే చట్టప్రకారం యాజమానిపై చర్యలు తీసుకోవాలి.
• కంప్లీషన్‌ సర్టిఫికెట్‌ ఇవ్వలేదని బిల్డర్‌ చేసే దరఖాస్తులు, అనధికార నిర్మాణాల క్రమబద్ధీకరణ కోసం వచ్చే దరఖాస్తులను అధికారులు 90 రోజుల లోపు వీలైనంత త్వరగా పరిష్కరించాలి.
• కంప్లీషన్‌ సర్టిఫికెట్‌ను పరిశీలించిన తర్వాతే భవనంపై బ్యాంకులు, రుణ సంస్థలు రుణాన్ని జారీ చేయాలి.