SMART METER PROGRAMME | ‘స్మార్ట్‌ మీటర్‌’ అట్టర్‌ ఫ్లాప్‌.. యూపీలో లోపాల పుట్టగా 12 లక్షల మీటర్లు.. సీఎం కేసీఆర్‌ ఆందోళనే నిజమైంది

SMART METER PROGRAMME |ఎవుసం బాయికాడ మోటర్లకు మీటర్లు పెట్టొద్దని సీఎం కేసీఆర్‌ కేంద్రంలోని బీజేపీ సర్కారుతో కొట్లాడారు. ‘స్మార్ట్‌ మీటర్‌' ఓ విఫల ప్రాజెక్టు అని, రైతును నష్టపరిచేందుకే తీసుకొచ్చిందని మండిపడ్డారు. ఇప్పుడు ఆయన ఆందోళనే నిజమైంది. బీజేపీ పాలిత ఉత్తరప్రదేశ్‌లో ఆర్భాటంగా తీసుకొచ్చిన ‘స్మార్ట్‌ మీటర్‌' ప్రాజెక్టు అట్టర్‌ ఫ్లాప్‌గా నిలిచింది.

• యూపీలో లోపాల పుట్టగా 12 లక్షల మీటర్లు
• బిల్లింగ్‌, సాఫ్ట్‌వేర్‌ అప్‌డేట్‌ ఇలా అన్నీ సమస్యలే
• వినియోగదారులకు సర్వీసుల్లో తీవ్ర అంతరాయం
• తీసుకొచ్చిన లక్ష్యం నెరవేరలేదన్న కేంద్రప్రభుత్వం

ఎవుసం బాయికాడ మోటర్లకు మీటర్లు పెట్టొద్దని సీఎం కేసీఆర్‌ కేంద్రంలోని బీజేపీ సర్కారుతో కొట్లాడారు. ‘స్మార్ట్‌ మీటర్‌’ ఓ విఫల ప్రాజెక్టు అని, రైతును నష్టపరిచేందుకే తీసుకొచ్చిందని మండిపడ్డారు. ఇప్పుడు ఆయన ఆందోళనే నిజమైంది. బీజేపీ పాలిత ఉత్తరప్రదేశ్‌లో ఆర్భాటంగా తీసుకొచ్చిన ‘స్మార్ట్‌ మీటర్‌’ ప్రాజెక్టు అట్టర్‌ ఫ్లాప్‌గా నిలిచింది.

(స్పెషల్‌ టాస్క్‌ బ్యూరో)హైదరాబాద్‌, అక్టోబర్‌ 10 (నమస్తే తెలంగాణ): యూపీలోని వివిధ ప్రాంతాల్లో బిగించిన దాదాపు 12 లక్షల స్మార్ట్‌ మీటర్లు లోపాలకు నిలయాలుగా మారాయి. ఈ మేరకు గత నెలలో కేంద్ర విద్యుత్తుశాఖ చేపట్టిన పరిశీలనలో తేలింది. ‘ఏ లక్ష్యం కోసం స్మార్ట్‌ మీటర్లను బిగించామో దాన్ని నెరవేర్చడంలో అవి విఫలమయ్యాయి’ అంటూ విద్యుత్తుశాఖ ఒప్పుకొన్నది. ఈ మేరకు పవర్‌ కార్పొరేషన్‌ ఎండీకి ఓ లేఖలో పేర్కొంది. స్మార్ట్‌ మీటర్లలోని సమస్యలను వెంటనే పరిష్కరించాలని ఆదేశించింది.

‘స్మార్ట్‌ మీటర్‌’ ప్రాజెక్టులో విద్యుత్తు శాఖ గుర్తించిన లోపాల్లో కొన్ని:

• స్మార్ట్‌మీటర్లపై వినియోగదారులు పూర్తిగా అసంతృప్తితో ఉన్నారు.
• స్టాండర్డ్‌ ఆపరేటింగ్‌ ప్రొసీజర్‌ (ఎస్‌వోపీ)కి విరుద్ధంగా స్మార్ట్‌ మీటర్లను బిగించారు. చెక్‌ మీటర్‌, మెయిన్‌ మీటర్లు వేర్వేరుగా ఉన్నాయి.
• స్మార్ట్‌ మీటర్‌ ఉన్నప్పటికీ, రీడింగ్‌లను మాన్యువల్‌గా తీసుకొంటున్నారు. మీటర్‌లో లోపాలే దీనికి కారణం.
• కొత్త బిల్లింగ్‌ సాఫ్ట్‌వేర్‌ను తీసుకురాగానే.. వాటంతట అవే పనిచేయగలిగే స్మార్ట్‌ మీటర్లు నిలిచిపోయాయి. వాటిని మ్యాన్యువల్‌గా ఆపరేట్‌ చేయాల్సి వస్తున్నది. గడిచిన ఆరు నెలలుగా ఇది కొనసాగుతున్నది.
• బిల్లును ఆటోమెటిక్‌గా తయారుచేయడంలో, చెల్లింపులు జరుగనప్పుడు కనెక్షన్‌ను తీసేయడంలో, చెల్లింపులు జరిగాక కనెక్షన్‌ను పునరుద్ధరించడంలో సమస్యలు ఉన్నాయి.
• చెక్‌ మీటర్‌ను బిగించినా.. ప్రత్యేక చార్జీలు వసూలు చేశారు. ఇది సరైనది కాదు.
• స్మార్ట్‌మీటర్ల విషయంలో ఎనర్జీ ఎఫిషియంట్‌ సర్వీసెస్‌ లిమిటెడ్‌, ఎల్‌ అండ్‌ టీ, పవర్‌ కార్పొరేషన్‌ మధ్య వివాదాలు నెలకొన్నాయి. దీంతో ఆయా సంస్థల మధ్య సమన్వయం లోపించింది. ఫలితంగా వినియోగదారులకు సర్వీసుల్లో తీవ్ర అంతరాయం ఏర్పడుతున్నది.
• స్మార్ట్‌ మీటర్‌కు ఉద్దేశించిన మొబైల్‌ యాప్‌ ఏ మాత్రం పనిచేయట్లేదు.
• రీచార్జ్‌ తేదీ, రుసుము గురించి వినియోగదారులకు అలర్ట్‌ మెసేజీలు రావట్లేదు.