రికార్డ్‌ స్థాయిలో పోలింగ్‌!

పశ్చిమ బెంగాల్‌, తమిళనాడు అసెంబ్లీలకు గురువారం జరిగిన ఎన్నికల్లో ఓటర్లు పోటెత్తారు. గతంలో ఎన్నడూ లేనంతగా ఈ రెండు రాష్ర్టాల్లో అత్యధిక ఓటింగ్‌ శాతం నమోదైంది. పశ్చిమ బెంగాల్‌లో మొదటి విడతలో 152 సీట్లకు, తమిళనాడులోని మొత్తం 234 సీట్లకు జరిగిన ఒకే విడత ఎన్నికల్లో ఓటర్లు ఎంతో ఉత్సాహంతో తమ ఓటు హక్కు వినియోగించుకున్నారు.

• పశ్చిమ బెంగాల్‌లో 92.7 శాతం,
• తమిళనాడులో 85.14% ఓటింగ్‌
• స్వాతంత్య్రానంతరం ఇదే అత్యధికం
• పలుచోట్ల హింసాత్మక ఘటనలు

చెన్నై/ కోల్‌కతా, ఏప్రిల్‌ 23: పశ్చిమ బెంగాల్‌, తమిళనాడు అసెంబ్లీలకు గురువారం జరిగిన ఎన్నికల్లో ఓటర్లు పోటెత్తారు. గతంలో ఎన్నడూ లేనంతగా ఈ రెండు రాష్ర్టాల్లో అత్యధిక ఓటింగ్‌ శాతం నమోదైంది. పశ్చిమ బెంగాల్‌లో మొదటి విడతలో 152 సీట్లకు, తమిళనాడులోని మొత్తం 234 సీట్లకు జరిగిన ఒకే విడత ఎన్నికల్లో ఓటర్లు ఎంతో ఉత్సాహంతో తమ ఓటు హక్కు వినియోగించుకున్నారు. బెంగాల్‌లో 92.72 శాతం, తమిళనాడులో 85.14 శాతం పోలింగ్‌ నమోదైనట్టు ప్రధాన ఎన్నికల కమిషనర్‌ జ్ఞానేశ్‌ కుమార్‌ వెల్లడించారు.

స్వాతంత్య్రం వచ్చిన తర్వాత ఆయా రాష్ర్టాల్లో ఈ స్థాయిలో ఓటింగ్‌ నమోదు కావడం ఇదే తొలిసారి. పశ్చిమ బెంగాల్‌లోని ముర్షిదాబాద్‌ సహా పలు చోట్ల చెదురుమదురుగా హింసాత్మక ఘటనలు చోటుచేసుకున్నాయి. పలు చోట్ల అధికార తృణమూల్‌ కాంగ్రెస్‌, బీజేపీ కార్యకర్తలకు మధ్య ఘర్షణలు చోటుచేసుకున్నాయి. ముర్షిదాబాద్‌లో ఏజేయూపీకి చెందిన హుమాయున్‌ కబీర్‌ అనుచరులు, టీఎంసీ కార్యకర్తల మధ్య ఘర్షణలు జరిగాయి. అలాగే దక్షిణ దినాజ్‌పూర్‌లో బీజేపీ అభ్యర్థిపై దాడి జరిగినట్టు ఆరోపణలు వచ్చాయి.

• 5.67 కోట్ల ఓటర్లున్న తమిళనాడులో గురువారం సాయంత్రం 7 గంటలకు 85.14 శాతం ఓటింగ్‌ నమోదైంది. ఉదయం స్థిరంగా ప్రారంభమైన పోలింగ్‌ రానురాను పుంజుకుంది. ఇక్కడ స్టాలిన్‌ నేతృత్వంలోని డీఎంకే కూటమి, ఏఐఏడీఎంకే-బీజేపీ కూటమి, నటుడు విజయ్‌కు చెందిన టీవీకే పార్టీల మధ్య త్రిముఖ పోటీ నెలకొంది.
• దేశ చరిత్రలోనే తొలిసారిగా పశ్చిమ బెంగాల్‌, తమిళనాడు రాష్ర్టాల్లో అత్యధిక ఓటింగ్‌ శాతాన్ని నమోదు చేసిన ప్రతి ఓటరుకు వందనం చేస్తున్నట్టు సీఈసీ జ్ఞానేశ్‌ కుమార్‌ తెలిపారు.
• పశ్చిమ బెంగాల్‌లో ఘర్షణలు, ఓటర్లను బెదిరిస్తున్నారన్న ఆరోపణలతో పాటు ఇద్దరు బీజేపీ అభ్యర్థులపై దాడులు జరిగినట్టు ఆరోపణలు వచ్చాయి.
• మొదటి విడత పోలింగ్‌ తర్వాత తృణమూల్‌ కాంగ్రెస్‌ పార్టీ అధికారం దిశగా పయనిస్తున్నట్టు తేటతెల్లమైందని ముఖ్యమంత్రి మమతా బెనర్జీ ప్రకటించారు.
• ముర్షిదాబాద్‌లో ఏజేయూపీకి చెందిన హుమాయున్‌ కబీర్‌ వర్గీయులకు, టీఎంసీ కార్యకర్తలకు ఘర్షణలు జరిగాయి. కార్యకర్తలపై పోలీసులు లాఠీచార్జి చేసి పరిస్థితిని అదుపులోకి తెచ్చారు. ఈ సందర్భంగా పలు వాహనాలు ధ్వంసమయ్యాయి.
• తమిళనాడులో చెదురుమదురు హింసాత్మక ఘటనలు చోటుచేసుకున్నాయి. మధురైలోని కీజావాసల్‌, తిరువణమలైలోని కలశపక్కంలలో బూత్‌ ఏజెంట్ల మధ్య స్వల్ప ఘర్షణ చోటుచేసుకుంది. చెన్నై, కాంచీపురం, నమక్కల్‌, కృష్ణగిరి తదితర ప్రాంతాల్లో కొత్తగా పెండ్లయిన జంటలు పెండ్లి బట్టలతో వచ్చి మరీ ఓటు వేయడం కన్పించింది.