Nirmala Sitharaman | యూపీఏ పాలనలో దేశ ఆర్థిక వ్యవస్థ ఛిన్నాభిన్నం.. పెచ్చరిల్లిన అవినీతి: నిర్మలాసీతారామన్‌

యూపీఏ పదేండ్ల పాలనలో దేశ ఆర్థిక వ్యవస్థ ఛిన్నాభిన్నమైందని, అవినీతి పెచ్చరిల్లిపోయిందని కేంద్రంలోని బీజేపీ ప్రభుత్వం తీవ్ర ఆరోపణలు చేసింది. దీర్ఘకాలిక ఆర్థిక పరిపుష్టికి యూపీఏ ప్రభుత్వం ఏమాత్రం చర్యలు తీసుకోలేదని, స్వల్పకాలిక ప్రయోజనాల కోసమే నిర్ణయాలు తీసుకొన్నదని ఆరోపించింది.

• దేశ ఆర్థికం హస్తవ్యస్తం
• యూపీఏ పాలనలో ఆర్థిక వ్యవస్థ నాశనం
• సంస్కరణలు చేపట్టడంలో ప్రభుత్వం విఫలం
• స్వల్పకాలిక ప్రయోజనాలపైనే దృష్టి పెట్టారు
• దేశ ఆర్థిక పునాదుల బలోపేతానికి చర్యలు శూన్యం
• ఆర్థిక క్రమశిక్షణ ఏమాత్రం పాటించలేదు
• యూపీఏ పదేండ్ల పాలనలో పెచ్చరిల్లిన అవినీతి
• పార్లమెంటుకు సమర్పించిన శ్వేతపత్రంలో కేంద్రం

Nirmala Sitharaman | న్యూఢిల్లీ, ఫిబ్రవరి 8: యూపీఏ పదేండ్ల పాలనలో దేశ ఆర్థిక వ్యవస్థ ఛిన్నాభిన్నమైందని, అవినీతి పెచ్చరిల్లిపోయిందని కేంద్రంలోని బీజేపీ ప్రభుత్వం తీవ్ర ఆరోపణలు చేసింది. దీర్ఘకాలిక ఆర్థిక పరిపుష్టికి యూపీఏ ప్రభుత్వం ఏమాత్రం చర్యలు తీసుకోలేదని, స్వల్పకాలిక ప్రయోజనాల కోసమే నిర్ణయాలు తీసుకొన్నదని ఆరోపించింది. 2004 నుంచి 2014 వరకు సాగిన యూపీఏ పాలనపై మోదీ సర్కారు రూపొందించిన శ్వేతపత్రాన్ని గురువారం పార్లమెంటులో ప్రవేశపెట్టారు. పత్రాన్ని చదివి వినిపించిన కేంద్ర ఆర్థికమంత్రి నిర్మలాసీతారామన్‌, ఎన్డీయే పదేండ్ల పాలనలో దేశం ఎంతో గొప్పగా ఆర్థిక ప్రగతి సాధించిందని చెప్పుకొచ్చారు. యూపీఏ పాలనలో ఆర్థిక క్రమశిక్షణ కొరవడటంతో ద్రవ్యలోటు భారీగా పెరిగిపోయిందని విమర్శించారు. మౌలిక వసతుల అభివృద్ధిని నిర్లక్ష్యం చేశారని, సామాజికాభివృద్ధి పథకాలకు నిధులను సక్రమంగా ఇవ్వలేదని దుయ్యబట్టారు. యూపీఏ పదేండ్ల పాలనలో సగటు ద్రవ్యోల్బణం 8.2 శాతంగా ఉండేదని, దానిని తగ్గించేందుకు ప్రభుత్వం ఏమీ చేయలేదని ఆరోపించారు. 2004లో యూపీఏ ప్రభుత్వం అధికారంలోకి వచ్చేవరకు ఎంతో ఆరోగ్యంగా, 7 శాతం వృద్ధితో దూసుకుపోయిన ఆర్థిక వ్యవస్థను.. ఆ తర్వాత పదేండ్లలో తిరోగమనంలోకి తీసుకెళ్లారని విమర్శించారు. 2004 నుంచి 2014 వరకు ప్రధానమంత్రిగా ఉన్న మన్మోహన్‌సింగ్‌ రాజ్యసభ పదవీకాలం గురువారమే ముగిసింది. అదేరోజు ఆయన ప్రభుత్వాన్ని తీవ్రంగా విమర్శిస్తూ మోదీ సర్కారు పార్లమెంటులో శ్వేతపత్రం ప్రవేశపెట్టడం గమనార్హం. మన్మోహన్‌సింగ్‌కు వీడ్కోలు పలుకుతూ ప్రధాని మోదీ పార్లమెంటులో మాట్లాడారు. మన్మోహన్‌సింగ్‌ ఆరోగ్యం సహకరించకపోయినా వీల్‌చైర్‌లో ఉంటూ కూడా కష్టపడి పనిచేశారని కీర్తించటం విశేషం.

యూపీఏ పదేండ్ల పాలనంతా తప్పుడు విధాన సాహసాలు, కుంభకోణాలే. 2014లో బొగ్గు కుంభకోణం దేశాన్ని దిగ్భ్రాంతికి గురిచేసింది. 2జీ కుంభకోణం వల్ల భారత టెలికం రంగం ఎంతో విలువైన ఒక దశాబ్ద కాలాన్ని కోల్పోయింది.

శ్వేతపత్రంలోని వివరాలు

• ఎంతో ఆరోగ్యంగా, మరిన్ని సంస్కరణలకు సిద్ధంగా, వృద్ధిపథంలో ఉన్న ఆర్థిక వ్యవస్థను యూపీఏ ప్రభుత్వం నిష్క్రియాపరత్వంగా మార్చేసింది.
• 1991లో ఆర్థిక సంస్కరణలు తెచ్చిన కాంగ్రెస్‌ పార్టీనే 2004లో మళ్లీ అధికారంలోకి వచ్చాక ఆ ఘనతను కొనసాగించలేకపోవటంలో వైఫల్యం చెందటం విషాదం.
• 2008లో ప్రపంచ ఆర్థిక సంక్షోభం ముగిసిన తర్వాత యూపీఏ ప్రభుత్వం ఏ దశలోనూ దేశ ఆర్థిక వృద్ధిని మళ్లీ పెంచలేకపోయింది. స్థూల ఆర్థిక పునాదులను బలహీనపర్చింది. అందులో ఒకటి ధరల స్థిరత్వం.
• బ్యాంకింగ్‌ సంక్షోభం యూపీఏ ప్రభుత్వ అపకీర్తుల్లో ప్రధానమైనది. ఈ సంక్షోభం వల్ల భారీ సంపద దోపిడీకి గురైంది.
• విదేశీ వాణిజ్య అప్పులపైనే ఆధారపడటంతో ఆర్థికవ్యవస్థ ప్రమాదంలో పడింది.
• 2008లో వచ్చిన ఆర్థిక మాంద్యానికి విరుగుడుగా యూపీఏ ప్రభుత్వం ప్రకటించిన ఉద్దీపనలు అసలు సమస్యకు మించి దుష్ప్రభావాలు చూపాయి.
• పబ్లిక్‌ ఫైనాన్స్‌ నిర్వహణ ప్రమాదకర స్థితిలోకి వెళ్లింది. ద్రవ్యలోటు ఆర్థికవ్యవస్థకు శరాఘాతంగా మారింది.
• ఆర్థిక వ్యవస్థ అస్తవ్యస్త నిర్వహణ వల్ల ద్రవ్యలోటు అంచనాలను మించిపోయి, అప్పులు నిర్ణయించినదానికంటే 27 శాతం అధికం అయ్యాయి.
• ఆర్థిక వ్యవస్థకు ద్రవ్యలోటు మోయలేని భారంగా మారింది.
• యూపీఏ ప్రభుత్వం మార్కెట్‌ నుంచి అప్పులు అడ్డగోలుగా తీసుకోవటమే కాకుండా.. వాటిని అధికంగా అనుత్పాదక రంగాల్లోనే ఖర్చుచేసింది.
• మౌలిక వసతుల అభివృద్ధిలో కుట్రపూరిత నిర్లక్ష్యం, లాజిస్టికల్‌ రంగంలోని సవాళ్లను పరిష్కరించకపోవటంతో పారిశ్రామికరంగ వృద్ధి తీవ్రంగా ప్రభావితమైంది. యూపీఏ ప్రభుత్వం అతిగా రెవెన్యూ వ్యయం చేసిందని ఆర్బీఐ కూడా తేల్చింది.
• ప్రణాళికా రచన, అమలులో లోపాలవల్ల సామాజికాభివృద్ధి పథకాలకు కేటాయించిన నిధుల్లో చాలావరకు ఖర్చు కాకుండా మిగిలిపోయాయి.
• వైద్యరంగంలో మౌలిక వసతుల కల్పనలో జరిగిన నిర్లక్ష్యం భారతీయ కుటుంబాలకు తీవ్ర వేదనను మిగిల్చింది.
• నిధుల్లో అత్యధికం ఉత్పాదకత రంగాలకు కాకుండా, అనుత్పాదక రంగాలకే కేటాయించటానికే ప్రభుత్వం ప్రాధాన్యం ఇచ్చింది.
• దేశానికి అత్యంత కీలకమైన రక్షణ సన్నద్ధతతోపాటు దేశ దీర్ఘకాలిక అభివృద్ధిపై యూపీఏ ప్రభుత్వం ఏనాడూ ఎవరి అభిప్రాయాలను పరిగణనలోకి తీసుకోకపోవటంతో విధానాలు నిస్తేజం అయిపోయాయి.
• సముద్రతీర జిల్లాల్లో పారిశ్రామిక అభివృద్ధిని యూపీఏ నిషేధించింది.
• దేశంలో అతిపెద్ద విద్యుత్తు సంక్షోభం యూపీఏ హయాంలోనే ఏర్పడిందన్న విషయం గుర్తుంచుకోవాలి. 2012లో 62 కోట్లమంది అంధకారంలోకి వెళ్లిపోయారు. దేశ భద్రత ప్రమాదంలో పడింది. నాడు విద్యుత్తు సమస్యలపై అంతర్జాతీయ సంస్థలు పదేపదే గుర్తుచేశాయి.
• ప్రభుత్వ వ్యవస్థ, విధానాలు అక్రమ సంపాదనకు ఎలా ఆలవాలం అయ్యాయో చెప్పేందుకు బంగారం ఎగుమతి-దిగుమతిపై 80:20 నిష్పత్తి పథకమే ఉదాహరణ. యూపీఏ హయాంలో నిర్ణయాల్లో స్తబ్దతకు ఉదాహరణలు కోకొల్లలు.
• దేశంలో డిజిటల్‌ రంగం స్వయంసమృద్ధికి గుర్తుగా నిలిచిన ఆధార్‌ కూడా యూపీఏ పాలనలో ఇబ్బందులపాలైంది.
• దేశ రక్షణ సన్నద్ధత విషయంలో యూపీఏ ప్రభుత్వం రాజీపడింది. రక్షణ రంగంలో అనేక కుంభకోణాలు వెలుగుచూశాయి. అనేక అభివృద్ధి పథకాలు కుంటుపడ్డాయి.
• ప్రపంచవ్యాప్తంగా పెట్టుబడిదారులు ఈజ్‌ ఆఫ్‌ డూయింగ్‌ బిజినెస్‌ కోరుతుండగా, యూపీఏ ప్రభుత్వం అస్థిర విధానాలను దేశానికి అందించింది.
• యూపీఏ పారిశ్రామిక నిరుత్సాహ విధానాలతో చాలామంది దేశీయ పెట్టుబడిదారులు విదేశాలకు వెళ్లిపోయారు.
• వాజ్‌పేయి ప్రభుత్వం ఆర్థిక వ్యవస్థకు బలమైన పునాదులు వేసి, అద్భుత సంస్కరణలు ప్రవేశపెట్టినా ఆ తర్వాత వచ్చిన యూపీఏ ప్రభుత్వం వాటిని కొనసాగించలేకపోయింది.
• భారత ఆర్థిక వృద్ధి మందగమనానికి అంతర్జాతీయ కారణాలతోపాటు దేశీయ కారణాలు కూడా ప్రధాన కారణమేనని 2012-13 ఆర్థిక సర్వేనే స్పష్టంచేసింది.

2008లో వచ్చిన ఆర్థిక మాంద్యాన్ని (2008 ఆర్థిక మాంద్యానికి భారత్‌ గురికాలేదు) చూసి కూడా యూపీఏ ప్రభుత్వం తన విధానాలపట్ల పశ్చాత్తాపపడలేదు. అప్పులు చేస్తూనే పోయింది.

ఆర్థిక వ్యవస్థకు చికిత్స చేశాం..

• మా (ఎన్డీయే) ప్రభుత్వం అధికారంలోకి వచ్చేనాటికి ఆర్థిక వ్యవస్థ తీవ్ర ఒత్తిడిలో ఉన్నది. మేం రాగానే అత్యవసరంగా చేపట్టాల్సిన చర్యలను గుర్తించి ఆర్థిక వ్యవస్థకు చికిత్స చేశాం. దీంతో దేశం అసాధారణ లక్ష్యాలను చేరుకొన్నది. నల్లధనాన్ని అరికట్టేందుకు నిరంతర చర్యలు చేపట్టాం. అదే సమయంలో ఆరోగ్యకరమైన వ్యాపార వాతావరణాన్ని సృష్టించాం.
• స్థూలంగా ఆర్థిక వ్యవస్థకు బలమైన పునాదులు వేసేందుకు 2014 నుంచి అనేక సాహసోపేత సంస్కరణలు చేపట్టాం. దీంతో ఆర్థిక వ్యవస్థ పెళుదనం నుంచి ప్రపంచంలోనే 5వ అతిపెద్ద ఆర్థిక వ్యవస్థగా మారింది.
• నేషన్‌ ఫస్ట్‌ అనే మా విధానంలో భాగంగా దేశంలో నాణ్యమైన మౌలిక సదుపాయాలు కల్పించాం. ఇవి దేశానికి ఎంతో కీలకం. అంతర్జాతీయ వాణిజ్య గొళుసుతో అనుసంధానమయ్యేందుకు కూడా ఎంతో ముఖ్యం.
• మేం అధికారంలోకి వచ్చినప్పుడు దేశంలో జాతీయ రహదారుల నిర్మాణం రోజుకు 12 కిలోమీటర్ల చొప్పున ఉండగా, 2023 నాటికి రోజుకు 28 కిలోమీటర్లకు పెంచాం.
• 2014లో విదేశీ మారక నిల్వలు 303 బిలియన్‌ డాలర్లు ఉండగా, 2024 జనవరి నాటికి 617 బిలియన్‌ డాలర్లకు పెంచాం. నిర్మాణాత్మక జీఎస్టీ వ్యవస్థను తెచ్చాం.
• నిజమైన సహకార సమాఖ్య స్ఫూర్తితో అభివృద్ధిలో అందరికీ సమభాగస్వామ్యం కల్పించాం.

యూపీఏ ప్రభుత్వ అస్తవ్యస్త ఆర్థిక, ద్రవ్య విధానాల వల్ల ఆ ప్రభుత్వ చివరి రోజుల నాటికి దేశ వృద్ధి సామర్థ్యం తీవ్రంగా పడిపోయింది. దీంతో ఆర్థిక వ్యవస్థ పెళుసుగా తయారైంది.

2004 కంటే ముందు ఉన్న ప్రభుత్వాలు చేపట్టిన ఆర్థిక సంస్కరణల వల్ల యూపీఏ ప్రభుత్వం లాభపడింది. కానీ, ఆ విధానాలను కొనసాగించటంలో విఫలమైంది.