Visit:
Hormone Problems | ఇటీవలి కాలంలో మహిళల్లో హార్మోన్ల అసమతుల్యత (హార్మోనల్ ఇంబ్యాలెన్స్), జీవక్రియ (మెటబాలిక్) సమస్యలు గతంతో పోలిస్తే చాలా చిన్న వయసులోనే కనిపిస్తున్నాయని నిపుణులు చెబుతున్నారు. ఒకప్పుడు 20ల చివరలో లేదా 30 ఏళ్ల తర్వాత ఎక్కువగా కనిపించే ఈ సమస్యలు ఇప్పుడు టీనేజ్ బాలికలు, కళాశాల విద్యార్థినుల్లో కూడా పెరుగుతున్నాయి. మెరుగైన వైద్య పరీక్షలు, అవగాహన పెరగడం ఒక కారణం అయినప్పటికీ, మహిళల ఆరోగ్యంలో ప్రపంచవ్యాప్తంగా ఒక పెద్ద మార్పు జరుగుతోందని నిపుణులు హెచ్చరిస్తున్నారు. చాలా మంది యువతులు నెలసరి సక్రమంగా రాకపోవడం, జీవనశైలిలో పెద్దగా మార్పులు లేకపోయినా బరువు పెరగడం, మొటిమలు, ముఖం లేదా శరీరంపై అవాంఛిత రోమాలు పెరగడం, ఎప్పుడూ అలసటగా ఉండటం, శక్తి తగ్గిపోవడం, తరచూ మూడ్ మార్పులు వంటి సమస్యలతో వైద్యులను సంప్రదిస్తున్నారు. ఇవన్నీ విడివిడిగా కనిపించే సమస్యలు కాదని, చాలా కాలంగా శరీరంలో నెమ్మదిగా ఏర్పడుతున్న జీవక్రియ లోపాలకు సంకేతాలని నిపుణులు చెబుతున్నారు.
ఈ పరిస్థితికి ప్రధాన కారణాల్లో ఒకటి బాలికల్లో యుక్తవయస్సు (ప్యూబర్టీ) గత తరాలతో పోలిస్తే ముందుగానే ప్రారంభమవడం. ఈ దశలోనే అధిక స్క్రీన్ టైమ్, శారీరక శ్రమ తగ్గడం, ప్రాసెస్డ్ ఫుడ్స్ ఎక్కువగా తీసుకోవడం, సమయానికి ఆహారం తీసుకోకపోవడం వంటి ఆధునిక జీవనశైలి అలవాట్లు హార్మోన్ల వ్యవస్థపై అదనపు ఒత్తిడిని కలిగిస్తున్నాయి. దీని ఫలితంగా పాలీఎండోక్రైన్ మెటబాలిక్ ఓవేరియన్ సిండ్రోమ్ (PMOS), థైరాయిడ్ సమస్యలు, ఇన్సులిన్ రెసిస్టెన్స్ వంటి సమస్యలు చిన్న వయసులోనే పెరుగుతున్నాయని పరిశోధనలు సూచిస్తున్నాయి. నిపుణుల అభిప్రాయం ప్రకారం, PMOSను కేవలం పునరుత్పత్తి వ్యవస్థ సమస్యగా చూడడం సరైంది కాదు. ఇది శరీర జీవక్రియ, ఇన్ఫ్లమేషన్, ఇన్సులిన్ రెసిస్టెన్స్, బరువు నియంత్రణ వంటి అనేక అంశాలతో ముడిపడి ఉన్న సమస్య. అందువల్ల కేవలం నెలసరి సమస్యలు లేదా అల్ట్రాసౌండ్లో కనిపించే సిస్టులకే చికిత్స చేయడం కాకుండా, అసలు జీవక్రియ లోపాన్ని కూడా గుర్తించి చికిత్స అందించడం అవసరమని నిపుణులు సూచిస్తున్నారు.
ఇన్సులిన్ రెసిస్టెన్స్ ను ఒకప్పుడు పెద్దవారిలో మాత్రమే కనిపించే సమస్యగా భావించేవారు. ఇప్పుడు అది టీనేజ్ బాలికల్లో కూడా ఎక్కువగా కనిపిస్తోంది. శరీరం ఇన్సులిన్కు సరిగా స్పందించకపోతే ప్యాంక్రియాస్ మరింత ఇన్సులిన్ను ఉత్పత్తి చేస్తుంది. దీనివల్ల ఆండ్రోజెన్ హార్మోన్ల స్థాయిలు పెరిగి అండోత్సర్గం (ఓవ్యులేషన్) దెబ్బతింటుంది. ఈ ప్రక్రియ ఎలాంటి స్పష్టమైన లక్షణాలు లేకుండానే చాలా సంవత్సరాలు కొనసాగుతుందని నిపుణులు చెబుతున్నారు. తగినంత నిద్ర లేకపోవడం కూడా హార్మోన్ల ఆరోగ్యంపై తీవ్ర ప్రభావం చూపుతుంది. చాలా మంది యువతులు రోజుకు ఐదు నుంచి ఆరు గంటలే నిద్రపోతుండగా, పడుకునే ముందు ఎక్కువసేపు మొబైల్ ఫోన్ వినియోగించడం పరిస్థితిని మరింత దిగజారుస్తోంది. రాత్రివేళ బ్లూ లైట్కు ఎక్కువసేపు గురికావడం వల్ల జీవక్రియ, ఆకలి నియంత్రణ, ఒత్తిడి, సంతానోత్పత్తికి సంబంధించిన హార్మోన్ల పనితీరు దెబ్బతింటుందని నిపుణులు హెచ్చరిస్తున్నారు.
నిరంతర మానసిక ఒత్తిడి కూడా మహిళల హార్మోన్ల సమతుల్యతను దెబ్బతీస్తోంది. చదువు, ఉద్యోగ పోటీ, భవిష్యత్తుపై ఆందోళన, సోషల్ మీడియా ప్రభావం వంటి కారణాలతో చాలా మంది యువతులు నిరంతరం ఒత్తిడిలో ఉంటున్నారు. దీంతో శరీరంలో కార్టిసోల్ అనే ఒత్తిడి హార్మోన్ స్థాయులు పెరిగి ఈస్ట్రోజెన్, ప్రొజెస్టెరాన్, థైరాయిడ్ హార్మోన్ల పనితీరుపై ప్రభావం చూపుతుంది. ఫలితంగా నెలసరి చక్రం, శక్తి స్థాయిలు, మానసిక స్థితి, జీవక్రియ దెబ్బతినే ప్రమాదం ఉంటుంది. నెలసరి అకస్మాత్తుగా అసమయానికి రావడం, అధిక అలసట, జుట్టు రాలిపోవడం, మొటిమలు పెరగడం వంటి మార్పులను చిన్న సమస్యలుగా నిర్లక్ష్యం చేయకూడదని నిపుణులు సూచిస్తున్నారు. ఇవి శరీరం నుంచి వచ్చే ముందస్తు హెచ్చరిక సంకేతాలు అవుతాయి. ఒత్తిడి, నిద్రలేమి, పోషకాహార లోపం వంటి అంశాల వల్ల శరీరంపై ఒత్తిడి పెరుగుతోందని హార్మోన్లు ఈ లక్షణాల ద్వారా తెలియజేస్తాయని వారు పేర్కొంటున్నారు. మహిళలు అనారోగ్యానికి గురైన తర్వాత చికిత్స ప్రారంభించడం కంటే చిన్న వయసు నుంచే నెలసరి ఆరోగ్యం, సమతుల్య పోషకాహారం, ఒత్తిడి నియంత్రణ, క్రమం తప్పకుండా వ్యాయామం, తగినంత నిద్ర వంటి ఆరోగ్యకరమైన అలవాట్లపై అవగాహన పెంచడం ఎంతో అవసరమని నిపుణులు సూచిస్తున్నారు. రోజువారీ జీవనశైలి, హార్మోన్ల ఆరోగ్యం, సంతానోత్పత్తి ఆరోగ్యం పరస్పరం ముడిపడి ఉన్నాయని అర్థం చేసుకుని జీవనశైలిలో మార్పులు చేసుకోవడం ద్వారా భవిష్యత్తులో అనేక సమస్యలను నివారించవచ్చని వారు చెబుతున్నారు.
