Jharkhand | జార్ఖండ్‌లో జయం ఎవరిది? బీజేపీకి ప్రజలు పట్టం కట్టేనా?

జార్ఖండ్‌లోని 81 అసెంబ్లీ స్థానాలకు జరుగనున్న ఎన్నికల్లో బీజేపీ నేతృత్వంలోని ఎన్డీఏ కూటమి, జేఎంఎం నేతృత్వంలోని అధికార కూటమి మధ్య హోరాహోరీ పోరు నెలకొన్నది. గత ఎన్నికల్లో అధికారం కోల్పోయిన బీజేపీ ఈసారి ఎలాగైనా తిరిగి కైవసం చేసుకోవాలని పట్టుదలగా ఉంది.

Jharkhand | రాంచి, అక్టోబర్‌ 15: జార్ఖండ్‌లోని 81 అసెంబ్లీ స్థానాలకు జరుగనున్న ఎన్నికల్లో బీజేపీ నేతృత్వంలోని ఎన్డీఏ కూటమి, జేఎంఎం నేతృత్వంలోని అధికార కూటమి మధ్య హోరాహోరీ పోరు నెలకొన్నది. గత ఎన్నికల్లో అధికారం కోల్పోయిన బీజేపీ ఈసారి ఎలాగైనా తిరిగి కైవసం చేసుకోవాలని పట్టుదలగా ఉంది. జేఎంఎం సైతం మరోసారి అధికారాన్ని దక్కించుకునేందుకు తీవ్రంగా ప్రయత్నిస్తున్నది. విజయంపై రెండు పక్షాలూ ధీమాగా ఉన్నాయి.

ఎన్డీఏ బలాలు – బలహీనతలు

• సీఎం హేమంత్‌ సొరేన్‌ సహా జేఎంఎం, కాంగ్రెస్‌ నేతలపై అవినీతి ఆరోపణలను ప్రధాన ప్రచారాస్త్రంగా బీజేపీ మార్చుకుంది.
• ఆల్‌ జార్ఖండ్‌ స్టూడెంట్‌ యూనియన్‌ పార్టీతో పొత్తు, గిరిజనుల్లో పట్టున్న మాజీ సీఎం చంపయీ సొరేన్‌తో పాటు మాజీ ఎంపీ మధు కోడా, మరో ముగ్గురు ఎమ్మెల్యేల చేరిక కలిసొస్తుందని బీజేపీ ఆశలు పెట్టుకుంది.
• జేఎంఎం సర్కారు వైఫల్యం వల్ల రాష్ట్రంలో శాంతిభద్రతల సమస్యలు పెరిగాయని, బంగ్లాదేశ్‌ నుంచి అక్రమ చొరబాటుదారులు పెద్ద సంఖ్యలో వస్తున్నారనే ఆరోపణలను బీజేపీ బలంగా చేస్తున్నది.
• పార్టీ నేతల మధ్య అంతర్గత పోరు బీజేపీకి నష్టం చేసే అవకాశం ఉంది.

జేఎంఎం కూటమి బలాలు – బలహీనతలు

• సీఎం హేమంత్‌ సొరేన్‌ అరెస్టుకు, రాష్ట్రంలో ఇటీవలి రాజకీయ అస్థిరతకు బీజేపీనే కారణమని జేఎంఎం ఆరోపిస్తున్నది. ప్రజల ద్వారా ఎన్నికైన తమ ప్రభుత్వాన్ని పని చేయకుండా బీజేపీ కుట్రలు చేసిందనే ప్రచారాన్ని ప్రజల్లోకి తీసుకెళ్తున్నది.
• రాష్ట్రంలోని 81 నియోజకవర్గాల్లో 28 ఎస్టీ రిజర్వుడ్‌ స్థానాలు ఉన్నాయి. గిరిజనుల్లో సొరేన్‌పై ఉన్న సానుభూతి ఈ నియోజకవర్గాల్లో కలిసొస్తుందని జేఎంఎం ఆశిస్తున్నది.
• ప్రజలకు నేరుగా లబ్ధి కలిగించిన సొరేన్‌ సర్కారు అమలు చేసిన అనేక సంక్షేమ పథకాలు ఓట్లు కురిపిస్తాయని భావిస్తున్నది.
• కీలక నేతలు బీజేపీలో చేరడం, కూటమి పార్టీల మధ్య సీట్ల పంపకాల్లో విభేదాలు ఎన్నికల్లో దెబ్బ తీసే అవకాశం ఉంది.