మహారాష్ట్రలో హోరాహోరీ

మహారాష్ట్రలోని 288 అసెంబ్లీ స్థానాలకు నవంబర్‌ 20న ఎన్నికలు జరగనున్నాయి. లోక్‌సభ ఎన్నికల తర్వాత ఎన్డీఏ, ఇండియా కూటములు ఎదుర్కొంటున్న అతి పెద్ద సవాల్‌ ఇది.

• అధికారాన్ని నిలుపుకోవాలనే పట్టుదలతో మహాయుతి
• లోక్‌సభ ఫలితాల ఉత్సాహంతో మహా వికాస్‌ అఘాడీ
• శివసేన(ఉద్ధవ్‌), ఎన్సీపీ(శరద్‌ పవార్‌)కి జీవన్మరణ పోరు

ముంబై, అక్టోబర్‌ 15: మహారాష్ట్రలోని 288 అసెంబ్లీ స్థానాలకు నవంబర్‌ 20న ఎన్నికలు జరగనున్నాయి. లోక్‌సభ ఎన్నికల తర్వాత ఎన్డీఏ, ఇండియా కూటములు ఎదుర్కొంటున్న అతి పెద్ద సవాల్‌ ఇది. మహారాష్ట్రలో ఈసారి నేరుగా అధికారాన్ని దక్కించుకొని ప్రజా మద్దతు తమకే ఉందని నిరూపించుకునేందుకు బీజేపీ, శివసేన, ఎన్సీపీతో కూడిన మహాయుతి ప్రయత్నం చేస్తున్నది. మరోవైపు పార్టీల్లో చీలకలతో కోల్పోయిన అధికారాన్ని తిరిగి పొందాలని కాంగ్రెస్‌, శివసేన(ఉద్ధవ్‌), ఎన్సీపీ(శరద్‌ పవార్‌)తో కూడిన మహా వికాస్‌ అఘాడీ పట్టుదలగా ఉంది.

మహాయుతి బలాబలాలు

• కేంద్రంలో అధికారంలో ఉండటం, బీజేపీ నేతృత్వంలో మూడు పార్టీల మధ్య సమన్వయం ఉండటంతో పకడ్బందీగా ఎన్నికలకు సిద్ధం.
• ఇటీవల ప్రారంభించిన కొత్త పథకాలు, కేంద్రం భారీగా కేటాయిస్తున్న నిధులు, చేపట్టిన కొత్త ప్రాజెక్టులు ఓట్లు కురిపిస్తాయని మహాయుతి ఆశలు పెట్టుకున్నది.
• హర్యానాలో ప్రతికూల పరిస్థితులను ఎదుర్కొని ఇటీవల సాధించిన విజయం కూటమిలో జోష్‌ నింపింది. ఇక్కడా హర్యానా ఫలితాలను పునరావృతం చేయాలని ప్రయత్నిస్తున్నది.
• మరాఠాల కోటా ఉద్యమం, శివాజీ భారీ విగ్రహం కూలడంతో ప్రజల మనోభావాలు దెబ్బతినడం వంటి పరిణామాలు వ్యతిరేకంగా మారాయి.

మహావికాస్‌ అఘాడీ బలాబలాలు

• శివసేన, ఎన్సీపీలో చీలికలపై మహారాష్ట్ర ప్రజల్లో సానుభూతి ఉంది. ముఖ్యంగా ఉద్ధవ్‌ ఠాక్రే, శరద్‌ పవార్‌పై ప్రజలు సానుభూతిని కనబరుస్తున్నారని కూటమి అంచనా వేస్తున్నది.
• లోక్‌సభ ఎన్నికల్లో రాష్ట్రంలోని 48 స్థానాల్లో ఏకంగా 30 స్థానాలను గెలుచుకోవడం కూటమిలో ఉత్సాహాన్ని నింపింది. అసెంబ్లీ ఎన్నికల్లోనూ ఈ ఫలితాలను రిపీట్‌ చేయాలని పట్టుదలగా ఉంది.
• సానుభూతి మినహా ఎన్నికల్లో ఓట్లు అడిగేందుకు ఇతర బలమైన అంశాలు ఏమీ చూపించలేకపోవడం కూటమికి మైనస్‌గా మారే అవకాశం ఉంది.
• అధికారంలోకి వస్తే ముఖ్యమంత్రి ఎవరు అవుతారనే స్పష్టత లేకపోవడం నష్టం కలిగించొచ్చు.