Delhi Elections | ఢిల్లీలో ఎన్నికల ఫీవర్‌.. అధికారం కోసం మూడు పార్టీల బాహాబాహీ!

Delhi Elections | దేశ రాజధాని ఢిల్లీలో అసలైన ఎన్నికల ఫీవర్‌ మొదలైంది. ఎన్నికల షెడ్యూల్‌ విడుదల కావడంతో గడ్డకట్టే చలిలోనూ రాజకీయ వాతావరణం సెగలు పుట్టిస్తున్నది. మరోసారి ఢిల్లీ ఎన్నికల్లో విజయం సాధించి అధికారాన్ని దక్కించుకునేందుకు అధికార ఆమ్‌ ఆద్మీ పార్టీ తీవ్రంగా ప్రయత్నిస్తున్నది.

Delhi Elections | న్యూఢిల్లీ, జనవరి 7: దేశ రాజధాని ఢిల్లీలో అసలైన ఎన్నికల ఫీవర్‌ మొదలైంది. ఎన్నికల షెడ్యూల్‌ విడుదల కావడంతో గడ్డకట్టే చలిలోనూ రాజకీయ వాతావరణం సెగలు పుట్టిస్తున్నది. మరోసారి ఢిల్లీ ఎన్నికల్లో విజయం సాధించి అధికారాన్ని దక్కించుకునేందుకు అధికార ఆమ్‌ ఆద్మీ పార్టీ తీవ్రంగా ప్రయత్నిస్తున్నది. మరోవైపు లోక్‌సభ ఎన్నికల ఫలితాలను అసెంబ్లీలో పునరావృతం చేసి, 25 ఏండ్ల తర్వాత హస్తినను కైవసం చేసుకోవాలని బీజేపీ శ్రమిస్తున్నది. ప క్రితం కోల్పోయిన ప్రభను మళ్లి తిరిగి తెచ్చుకునేందుకు హస్తం పార్టీ సైతం కష్టపడుతున్నది. 70 స్థానాలకు జరుగుతున్న ఎన్నికల్లో ప్రధానంగా ఆప్‌, బీజేపీ మధ్య హోరాహోరీ పోరు నెలకొన్నది. కాంగ్రెస్‌ సైతం మంచి ఫలితాలను సాధించి, కింగ్‌మేకర్‌ అవ్వాలని ప్రయత్నిస్తున్నది.

ఆమ్‌ ఆద్మీ పార్టీ భవిష్యత్తుకు కీలక ఎన్నిక

ఢిల్లీలో ఆమ్‌ ఆద్మీ పార్టీకి ఈ ఎన్నికలు కఠిన పరీక్షగా మారాయి. 2015, 2020 ఎన్నికల్లో 70 స్థానాలకు 67, 62 స్థానాలను గెలిచి అసాధారణ ఫలితాలను అందుకున్న ఆప్‌ ఈసారి మాత్రం అవినీతి ఆరోపణలు, నేతల అరెస్టులు, వలసలతో గడ్డు పరిస్థితుల్లో ఎన్నికలను ఎదుర్కొంటున్నది.

బలాలు

స్లమ్‌లు, అనధికార కాలనీలు, మైనారిటీలు మెజారిటీగా ఉన్న, పేద వర్గాలు ఎక్కువగా నివసించే ప్రాంతాల్లో ఆమ్‌ ఆద్మీకి గట్టి పట్టుంది.

కొందరు నేతలు వలస వెళ్లినా పార్టీకి బలమైన క్యాడర్‌ ఉంది.

ముస్లిం, సిక్కు, దళిత, సంక్షేమ పథకాల లబ్ధిదారుల ఓటుబ్యాంకు ఆప్‌ బలం.

బలహీనతలు

• హోరాహోరీ పోరు ఉండటంతో కాంగ్రెస్‌ పార్టీ చీల్చే ఓట్లు ఆప్‌ను దెబ్బతీయొచ్చు.
• అవినీతి ఆరోపణలు, పదేండ్ల పాలనపై సహజంగా ఉండే వ్యతిరేకత, ఎమ్మెల్యేలపై వ్యతిరేకత నష్టం చేయవచ్చు.
• పలువురు కీలక నాయకులు రాజకీయంగా చురుగ్గా లేకపోవడం, ఇంకొందరు బీజేపీలో చేరడం మైనస్‌.

‘మార్పు’ నినాదంపై బీజేపీ ఆశలు

గత రెండు అసెంబ్లీ ఎన్నికల్లో ఆప్‌ చేతిలో బీజేపీ గట్టి ఎదురుదెబ్బ తిన్నది. వరుసగా మూడు లోక్‌సభ ఎన్నికల్లోనూ ఢిల్లీలోని మొత్తం 7 ఎంపీ స్థానాలను క్లీన్‌స్వీప్‌ చేసిన బీజేపీ.. అసెంబ్లీ ఎన్నికల్లో మాత్రం ప్రభావం చూపలేకపోతున్నది. రాజధానిలో తమకు కంట్లో నలుసుగా మారిన ఆప్‌ను ఈసారి ఓడించాలని గట్టి పట్టుదలతో బీజేపీ ఉంది. ‘పరివర్తన్‌(మార్పు)’ నినాదంతో బీజేపీ ఈ ఎన్నికలకు వెళ్తున్నది.

బలాలు

• కేజ్రీవాల్‌, ఆప్‌ నేతలపై అవినీతి ఆరోపణలు, విలాసవంతంగా సీఎం అధికారిక నివాసం నిర్మించారనే విమర్శలు బీజేపీకి కలిసిరావొచ్చు.
• ఆప్‌ ఎమ్మెల్యేలపై వ్యతిరేకత, నగరవాసులు ఎదుర్కొంటున్న సమస్యలు బీజేపీకి ఓట్లను పెంచొచ్చు.
• గత లోక్‌సభ ఎన్నికల్లో మొత్తం ఏడు స్థానాలను గెలవడం, 70 అసెంబ్లీ స్థానాల్లో 52లో మెజారిటీ రావడం బీజేపీ క్యాడర్‌కు జోష్‌ ఇచ్చింది.

బలహీనతలు

• కేజ్రీవాల్‌తో సీఎం అభ్యర్థిగా సరితూగే నాయకుడు కనిపించడం లేదు.
• ఆప్‌ సంక్షేమ పథకాలకు పోటీగా పథకాలను ప్రకటించలేదు. ఆప్‌ పథకాలు కొనసాగిస్తామని మాత్రమే చెప్తున్నది.
• 12 రిజర్వ్‌డ్‌ స్థానాలు, మైనారిటీలు అధికంగా ఉన్న 8 స్థానాల్లో 2015, 2020లో ఒక్కటంటే ఒక్క సీటు కూడా బీజేపీ గెలుచుకోలేకపోయింది. ఈ 20 స్థానాల్లో బీజేపీకి ప్రతికూలత కనిపిస్తున్నది.

పూర్వ వైభవం కోసం కాంగ్రెస్‌ ఆరాటం

పదేండ్ల క్రితం వరకు ఢిల్లీలో 15 ఏండ్లు అధికారంలో ఉన్న కాంగ్రెస్‌ గత రెండు అసెంబ్లీ ఎన్నికలు, మూడు పార్లమెంటు ఎన్నికల్లో ఢిల్లీలో ఒక్కటంటే ఒక్క స్థానాన్నీ గెలుచుకోలేదు. ఈసారి ఎలాగైనా హస్తినలో పూర్వవైభవం సాధించాలని హస్తం పార్టీ గట్టిగానే ప్రయత్నిస్తున్నది.

బలాలు

• షీలా దీక్షిత్‌ కుమారుడు సందీప్‌ దీక్షిత్‌, ఢిల్లీ పీసీసీ చీఫ్‌ దేవేందర్‌ యాదవ్‌, మహిళా కాంగ్రెస్‌ జాతీయ అధ్యక్షురాలు అల్కా లంబా వంటి ప్రముఖ నేతలను బరిలోకి దింపడంతో కొన్ని స్థానాల్లో బలమైన పోటీ ఇస్తున్నది.
• ఆప్‌ పదేండ్ల పాలనపై వ్యతిరేకత కలిసి వస్తుందని కాంగ్రెస్‌ భావిస్తున్నది.
• అధికంగా ఉన్న మైనారిటీ ఓటర్లు, త్రిముఖ పోరులో లాభపడతామనే అంచనాలతో ఉంది.

బలహీనతలు

• షీలా దీక్షిత్‌ మరణం తర్వాత కాంగ్రెస్‌లో నాయకత్వలేమి ఉంది.
• వరుసగా అన్ని ఎన్నికల్లో దారుణ ఓటమితో పార్టీ క్యాడర్‌ నైరాశ్యంలో ఉంది.
• ఆప్‌ ఆవిర్భావంతో కాంగ్రెస్‌ సంప్రదాయ ఓటుబ్యాంకు ఆ పార్టీ వైపు మళ్లింది.