Chandrayaan-3 | భారత అంతరిక్ష పరిశోధన సంస్థ (ISRO) ప్రతిష్టాత్మకంగా చేపట్టిన చంద్రయాన్-3 (Chandrayaan-3) ప్రయోగం కీలక దశకు చేరువైంది. అంతా సాఫీగా సాగితే బుధవారం సాయంత్రం చంద్రుడిపై అడుగుపెట్టనుంది. చంద్రయాన్-3 సేఫ్ ల్యాండింగ్కు (Safe landing) ఇస్రో సర్వం సిద్ధంచేసింది. దీనికోసం యావత్ భారతమేకాదు ప్రపంచ దేశాలు కూడా ఉత్కంఠగా ఎదురుచూస్తున్నాయి. ప్రస్తుతం చంద్రుడి దక్షిణ ధ్రువంపై సాఫ్ట్ ల్యాండింగ్కు అనువైన ప్రదేశం కోసం విక్రమ్ ల్యాండర్ అన్వేషణ కొనసాగిస్తోంది.
కాగా, 70 కిలోమీటర్ల దూరం నుంచి జాబిల్లి ఫొటోలను ల్యాండర్ తన కెమెరాలో బంధించింది. ఈ ఫొటోలను భారత అంతరిక్ష పరిశోధనా కేంద్రం ట్విట్టర్ (ఎక్స్)లో పోస్టు చేసింది. విక్రమ్ ల్యాండర్కు అమర్చిన ల్యాండర్ హజార్డ్ డిటెక్షన్ అండ్ అవైడెన్స్ కెమెరా (Lander Hazard Detection and Avoidance Camera) ఈ ఫొటోలను తీసినట్లు తెలిపింది. మిషన్ షెడ్యూల్లో ఉందని.. సిస్టమ్లు క్రమం తప్పకుండా తనిఖీలు జరుగుతున్నట్లు పేర్కొంది. సున్నితమైన సెయిలింగ్ కొనసాగుతోందని తెలిపింది. చంద్రయాన్-3 సేఫ్ ల్యాండింగ్ ప్రత్యక్ష ప్రసారం రేపు సాయంత్రం 5:20 గంటలకు ప్రారంభమవుతుందని వెల్లడించింది.
ఈ నెల 23న సాయంత్రం 6.04 గంటలకు విక్రమ్ ల్యాండర్ (Vikram lander) చంద్రుడిపై అడుగుపెట్టనున్న విషయం తెలిసిందే. తొలుత ఈ నెల 23న సాయంత్రం 5.47 గంటలకు సాఫ్ట్ల్యాండింగ్ చేయాలని ఇస్రో నిర్ణయించింది. అయితే ఈ సమయంలో మార్పు చేశారు. 17 నిమిషాలు ఆలస్యంగా సాయంత్రం 6.04 గంటలకు ల్యాండర్ను చంద్రుడిపై దించాలని నిర్ణయించారు. ఈ మేరకు ఇస్రో (Indian Space Research Organisation) ట్విట్టర్ ద్వారా ఇప్పటికే వెల్లడించింది. మరోవైపు చంద్రయాన్-3కి పోటీగా రష్యా ప్రయోగించిన లూనా-25 ప్రయోగం విఫలమవడంతో ఇప్పుడు అందరి కళ్లూ చంద్రయాన్-3పైనే ఉన్నాయి. చారిత్రక ఘట్టం కోసం ఉత్కంఠగా ఎదురుచూస్తున్నారు.
Chandrayaan-3 Mission:
The mission is on schedule.
Systems are undergoing regular checks.
Smooth sailing is continuing.The Mission Operations Complex (MOX) is buzzed with energy & excitement!
The live telecast of the landing operations at MOX/ISTRAC begins at 17:20 Hrs. IST… pic.twitter.com/Ucfg9HAvrY
— ISRO (@isro) August 22, 2023
ల్యాండింగ్ సైట్ను వెతుకుతున్న విక్రమ్
చంద్రయాన్-3 జాబిల్లిపై అడుగు పెట్టేందుకు మరొక్క రోజు మాత్రమే మిగిలి ఉంది. చంద్రుడికి మరింత చేరువైన ల్యాండర్ సురక్షితమైన ల్యాండింగ్ సైట్ను వెదికే పనిలో నిమగ్నమైంది. అందులో భాగంగా చంద్రుడి ఉపరితలాన్ని ఫొటోలు తీసి ల్యాండింగ్కు అనువైన ప్రాంతా న్ని విక్రమ్ వెతుక్కుంటోంది. ల్యాండర్ హజార్డ్ డిటెక్షన్ అండ్ అవాడెన్స్ కెమెరా (ఎల్హెచ్డీఏసీ) సాయంతో భూమికి కనిపించని చంద్రుడి దక్షిణ భాగం చిత్రాలను ల్యాండర్ చిత్రీకరించింది. వీటిని ఇస్రో సోమవారం ఎక్స్ వేదికగా పంచుకుంది.
పొరపాట్లు జరిగినా సాఫ్ట్ ల్యాండింగ్
చంద్రయాన్-3 ల్యాండర్లో అంతర్గతంగా పొరపాట్లు జరిగినా.. సాఫ్ట్ ల్యాండింగ్ జరిగి తీరుతుందని బెంగళూరులోని ఇండియన్ ఇన్స్టిట్యూట్ ఆఫ్ సైన్స్కు చెందిన ఏరోస్పేస్ సైంటిస్ట్, ప్రొఫెసర్ రాధాకాంత్ పాధి ధీమా వ్యక్తం చేశారు. ప్రొఫెసర్ రాధాకాంత్ చంద్రయాన్-2, 3 ప్రయోగాల్లో ముఖ్య పాత్ర పోషించారు. ప్రస్తుత చంద్రయాన్-3 విక్రమ్ ల్యాండర్లో అంతర్గతంగా సాల్వేజ్ మోడ్ ఉంది. అంతర్గతంగా ఏదైనా సమస్య తలెత్తినా.. ఈ టెక్నాలజీ కారణంగా దానంతట అదే సరిచేసుకుంటుంది. తద్వారా సాఫ్ట్ల్యాండింగ్ సులువవుతుంది. ల్యాండర్ హార్డ్ ల్యాండ్ అయిన తట్టుకునేలా దాన్ని రూపొందించారు. ఆరు సిగ్మా బౌండ్లతో చంద్రయాన్-3 ల్యాండర్ మరింత పటిష్ఠంగా ఉంది.
ప్రతికూల పరిస్థితి ఎదురైతే 27కు వాయిదా!
ప్రతికూల పరిస్థితులు ఎదురైతే విక్రమ్ ల్యాండింగ్ ప్రక్రియను ఈ నెల 27కు వాయిదా వేస్తామని ఇస్రో, స్పేస్ అప్లికేషన్ సెంటర్(అహ్మదాబాద్) డైరెక్టర్ నీలేశ్ ఎం దేశాయ్ చెప్పారు. చంద్రయాన్-3 సాఫ్ట్ ల్యాండింగ్ కోసం దేశం యావత్తు ఉత్కంఠతో ఎదురుచూస్తున్న వేళ.. ఆయన వ్యాఖ్యలు ప్రాధాన్యం సంతరించుకున్నాయి. ‘ఆగస్టు 23న చంద్రుడిపై అడుగుపెట్టడానికి రెండు గంటల ముందు పరిశీలన జరుగుతుంది. చంద్రుడి ఉపరితలంలో పరిస్థితులు, విక్రమ్ ల్యాండర్ పనితీరును పరిగణనలోకి తీసుకుంటాం. సవ్యంగా లేదనిపిస్తే సాఫ్ట్ ల్యాండింగ్ను 27కు వాయిదా వేస్తాం’ అని దేశాయ్ వివరించారు.
Also Read..
Prakash Raj: చంద్రయాన్-3పై కామెంట్.. నటుడు ప్రకాశ్ రాజ్పై కేసు
Samantha | 14 ఏళ్ల తర్వాత మళ్లీ అక్కడికి.. ఆ సినిమాని గుర్తు చేసుకుంటూ ఎమోషనల్ అయిన సామ్