Arvind Kejriwal | ఆర్‌ఎస్‌ఎస్‌ చీఫ్‌ మోహన్‌ భగవత్‌కు ఢిల్లీ మాజీ సీఎం లేఖ.. ఐదు ప్రశ్నలు సంధించిన ఆప్‌ కన్వీనర్‌..!

Arvind Kejriwal | ఆర్‌ఎస్‌ఎస్‌ చీఫ్ మోహన్‌ భగవత్‌కు ఢిల్లీ మాజీ ముఖ్యమంత్రి, ఆమ్‌ ఆద్మీ పార్టీ జాతీయ కన్వీనర్‌ కేజ్రీవాల్‌ లేఖ రాశారు. ఈ సందర్భంగా ఆయన ఐదు ప్రశ్నలు సంధించారు. ఈడీ, సీబీఐతో బెదిరింపులకు దిగుతూ ఇతర పార్టీల నేతలపై విరుచుకుపడుతున్నారని లేఖలో పేర్కొన్నారు.

Arvind Kejriwal | ఆర్‌ఎస్‌ఎస్‌ చీఫ్ మోహన్‌ భగవత్‌కు ఢిల్లీ మాజీ ముఖ్యమంత్రి, ఆమ్‌ ఆద్మీ పార్టీ జాతీయ కన్వీనర్‌ కేజ్రీవాల్‌ లేఖ రాశారు. ఈ సందర్భంగా ఆయన ఐదు ప్రశ్నలు సంధించారు. ఈడీ, సీబీఐతో బెదిరింపులకు దిగుతూ ఇతర పార్టీల నేతలపై విరుచుకుపడుతున్నారని లేఖలో పేర్కొన్నారు. ఇతర పార్టీల ప్రభుత్వాలను కూలుస్తున్నారని.. ఎన్నికల ప్రభుత్వాలను పడగొట్టడం దేశానికి, ప్రజాస్వామ్యానికి మంచిదేనా. అంటూ ప్రశ్నించారు. తాను రాజకీయ పార్టీ నేతగా లేఖ రాడం లేదని.. సాధారణ పౌరుడిగా రాస్తున్నట్లు తెలిపారు. దేశ పరిస్థితిపై తాను ఆందోళన చెందుతున్నానన్నారు. బీజేపీ నేతృత్వంలోని కేంద్ర ప్రభుత్వం దేశాన్ని, దేశ రాజకీయాలను ఏ దిశగా తీసుకెళ్తున్నది.. అది యావత్‌ దేశానికి హానికరమని.. ఇలాగే కొనసాగితే మన ప్రజాస్వామ్యం, దేశం అంతమవుతుందన్నారు. పార్టీలు వస్తాయి.. పోతుంటాయని.. నాయకులు వస్తుంటారు.. పోతుంటారని.. కానీ, భారతదేశం ఎప్పుడూ ఉంటుందన్నారు. ఈ దేశ త్రివర్ణ పతాకాన్ని ఎప్పుడూ సగర్వంగా ఎగురవేయడం మన బాధ్యత అన్నారు.

లేఖలో ప్రస్తావించిన ఐదు ప్రశ్నలు..

• దేశవ్యాప్తంగా ఇతర పార్టీల నాయకులను అన్ని రకాలుగా ప్రలోభాలకు గురి చేసి.. చివరకు ఈడీ, సీబీఐతో బెదిరింపులకు గురి చేస్తున్నారు. పార్టీలను విచ్ఛిన్నం చేసి ఇతర పార్టీల ప్రభుత్వాలను పడగొడుతున్నారు. ఎన్నికైన ప్రభుత్వాలను పడగొట్టడం దేశానికి, ప్రజాస్వామ్యానికి మంచిదేనా? మీరు గానీ, ఆర్‌ఎస్‌ఎస్‌ నిజాయితీ లేకుండా అధికారం పొందడాన్ని అంగీకరిస్తారా? అంటూ ప్రశ్నించారు.
• దేశంలోని కొంతమంది నాయకులను అవినీతిపరులని ప్రధానమంత్రి, హోంశాఖ మంత్రి అమిత్‌షా బహిరంగ వేదికలపై వ్యాఖ్యలు చేస్తున్నారు. వారంతా కొద్దిరోజులకే బీజేపీలో చేరారు. ఉదాహరణకు 28 జూన్‌ 2023న ఓ బహిరంగ సభలో ప్రధానమంత్రి ఓ పార్టీకి చెందిన నాయకుడిపై రూ.70వేలకోట్ల కుంభకోణం ఆరోపణలు చేశారు. ఆ తర్వాత కొద్దిరోజులకే ఆ పార్టీని బద్దలుకొట్టి అదే నాయకుడితో ప్రభుత్వం ఏర్పాటు చేసి.. అవినీతిపరుడిగా పేరుతెచ్చుకున్న నాయకుడిని ఉప ముఖ్యమంత్రిని చేశారు. ఇతర పార్టీల అవినీతి నేతలను బీజేపీలో చేర్చుకున్న సందర్భాలు చాలానే ఉన్నాయి. అలాంటి బీజేపీని మీరు. ఆర్‌ఎస్‌ఎస్‌ ఊహించారా? ఇది చూస్తే బాధ అనిపించడం లేదా? అని లేఖలో ప్రశ్నించారు.
• ఆర్‌ఎస్‌ఎస్‌ నుంచి పుట్టిన పార్టీ బీజేపీ. అది తప్పుదోవపడితే దాన్ని సరైన దారిలో పెట్టాల్సిన బాధ్యత ఆర్‌ఎస్‌ఎస్‌పై ఉంది. తప్పుడు పనులు చేయకుండా ప్రధానిని అడ్డుకున్నారా? అంటూ మరో ప్రశ్న సంధించారు.
• బీజేపీకి ఇకపై ఆర్‌ఎస్‌ఎస్‌ అవసరం లేదని లోక్‌సభ ఎన్నికల సమయంలో జేపీ నడ్డా అన్నారు. ఆర్‌ఎస్‌ఎస్‌ ఓ విధంగా బీజేపీకి తల్లిలాంటిది. జేపీ నడ్డా వ్యాఖ్యలు ప్రతి ఆర్‌ఎస్‌ఎస్‌ కార్యకర్తను తీవ్రంగా బాధించాయని తాను తెలుసుకున్నానన్నారు. ఈ విషయంలో మీరు ఏం చెప్పాలనుకుంటున్నారో యావత్‌ తెలుసుకోవాలనుకుంటుందన్నారు.
• అందరూ కలిసి బీజేపీ నేతలు 75 సంవత్సరాల తర్వాత పదవీ విరమణ చేయాలని చట్టం చేశారు. దాంతో ఎల్‌కే అద్వానీ, మురళీ మనోహర్‌ జోషివంటి కీలక నేతలు పదవీ విరమణ పొందారు. గత పదేళ్లలో ఖండూరి, శాంతకుమార్‌, సుమిత్రా మహాజన్‌ మొదలైన బీజేపీ నేతలు దూరమయ్యారు. ఈ నిర్ణయం ప్రధాని మోదీకి వర్తించదని అమిత్‌షా అంటున్నారు. ఎల్‌కే అద్వానీకి వర్తించింది.. ప్రధాని మోదీకి వర్తించదని మీరు అంగీకరిస్తారా? చట్టం అందరికీ సమానం కాదా? ప్రతి భారతీయుడి మదిలో ఈ ప్రశ్నలు తలెత్తుతున్నాయి. ఈ ప్రశ్నలకు ఆలోచించి సమాధానం ఇస్తానని ఆశిస్తున్నానని కేజ్రీవాల్‌ లేఖలో పేర్కొన్నారు.