Pahalgam Terror Attack | పాకిస్థానీయులకు దేశంలోకి ప్రవేశం నిషేధం.. భారత్‌ కీలక నిర్ణయాలు

పహల్గాం ఉగ్రదాడికి ప్రతీకారంగా పాకిస్థాన్‌పై దౌత్యపరమైన చర్యలను భారత ప్రభుత్వం బుధవారం ప్రారంభించింది. సింధూ జలాల ఒప్పందాన్ని నిలిపివేయడం, పాకిస్థానీ జాతీయులకు భారత్‌లో ప్రవేశంపై నిషేధం విధించడం వంటి ఐదు అంశాలతో కూడిన చర్యలను భారత్‌ ప్రకటించింది.

• దేశంలోని పాక్‌ పౌరులు 48 గంటల్లో వెళ్లిపోవాలి
• భారత్‌-పాక్‌ సింధూ జలాల ఒప్పందం నిలిపివేత
• ఇరుదేశాల అటారీ- వాఘా సరిహద్దు మూసివేత
• భారత్‌ నుంచి దౌత్య సలహాదారుల బహిష్కరణ
• పాక్‌ హైకమిషన్లలో సిబ్బంది సంఖ్య 30కి కుదింపు
• పహల్గాం దాడి నేపథ్యంలో పాక్‌పై భారత్‌ చర్యలు
• కేంద్ర క్యాబినెట్‌ భేటీలో కీలక నిర్ణయాలు
• సింధూ నదీ జలాల ఒప్పందం నిలిపివేత

Pahalgam Terror Attack | న్యూఢిల్లీ, ఏప్రిల్‌ 23: పహల్గాం ఉగ్రదాడికి ప్రతీకారంగా పాకిస్థాన్‌పై దౌత్యపరమైన చర్యలను భారత ప్రభుత్వం బుధవారం ప్రారంభించింది. సింధూ జలాల ఒప్పందాన్ని నిలిపివేయడం, పాకిస్థానీ జాతీయులకు భారత్‌లో ప్రవేశంపై నిషేధం విధించడం వంటి ఐదు అంశాలతో కూడిన చర్యలను భారత్‌ ప్రకటించింది. ప్రధాని నరేంద్ర మోదీ బుధవారం భద్రతా వ్యవహారాలకు సంబంధించిన క్యాబినెట్‌ కమిటీతో సమావేశమై పహల్గాం ఉగ్రదాడి అనంతర పరిస్థితిని సమీక్షించారు. సమావేశం అనంతరం భారత ప్రభుత్వం పాకిస్థాన్‌పై చేపట్టిన ఐదు చర్యలను ప్రకటించింది.

• 1960లో పాక్‌తో కుదుర్చుకున్న సింధూ నదీ జలాల ఒప్పందాన్ని తక్షణమే నిలుపుదల చేస్తున్నట్లు కేంద్రం వెల్లడించింది. సీమాంతర ఉగ్రవాదానికి అందచేస్తున్న మద్దతును నిలిపివేస్తున్నట్లు పాక్‌ నుంచి స్పష్టమైన, విశ్వసనీయమైన ప్రకటన వెలువడే వరకు నదీ జలాల ఒప్పందాన్ని నిలిపివేస్తున్నట్లు ప్రకటించింది.
• అటారీ-వాఘా సరిహద్దు చెక్‌పోస్టును వెంటనే మూసివేస్తున్నట్లు తెలిపింది. చట్టబద్ధమైన పత్రాలతో భారత్‌లోకి ప్రవేశించిన పాకిస్థానీ పౌరులు మే 1వ తేదీలోగా ఈ మార్గంలో తిరిగి వెళ్లిపోవచ్చని భారత్‌ ప్రకటించింది.
• సార్క్‌ వీసా మినహాయింపు పథకం కింద పాకిస్థానీ జాతీయులు భారత్‌లో ప్రయాణించడానికి అనుమతించబోమని ప్రభుత్వం ప్రకటించింది. పథకం కింద గతంలో పాకిస్థానీ జాతీయులకు జారీ చేసిన వీసాలు రద్దయినట్లేనని ప్రభుత్వం స్పష్టం చేసింది. ఈ పథకం కింద వీసా తీసుకుని ప్రస్తుతం భారత్‌లో ఉన్న పాకిస్థానీ జాతీయులు 48 గంటల్లోగా భారత్‌ను వీడాలని ప్రభుత్వం ఆదేశించింది.
• ఇస్లామాబాద్‌లోని భారతీయ హై కమిషన్‌ నుంచి తన రక్షణ, నౌకాదళ, వైమానిక సలహాదారులను ఉపసంహరిస్తున్నట్లు భారత్‌ ప్రకటించింది. అదే విధంగా ఢిల్లీలోని పాకిస్థానీ హై కమిషన్‌లో ఉన్న ఆ దేశ సైనిక, నౌకాదళ, వైమానిక సలహాదారులు వారం రోజుల్లోగా భారత్‌ను వీడాలని కేంద్ర ప్రభుత్వం ఆదేశించింది.
• భారత్‌లోని పాక్‌ హై కమిషన్లలోని దౌత్యాధికారుల సంఖ్యను ప్రస్తుతమున్న 55 నుంచి 30కి తగ్గించాలని పాకిస్థాన్‌ను ఆదేశించినట్టు విదేశాంగ కార్యదర్శి విక్రమ్‌ మిస్రీ తెలిపారు.

త్వరలోనే గట్టిగా బదులిస్తాం: రాజ్‌నాథ్‌ 

న్యూఢిల్లీ: అమాయక పౌరులను పొట్టనబెట్టుకున్న ఉగ్రవాదులకు త్వరలోనే గట్టి బదులిస్తామని రక్షణ శాఖ మంత్రి రాజ్‌నాథ్‌ సింగ్‌ హెచ్చరించారు. కేవలం ఈ దాడికి పాల్పడిన వారినే కాకుండా, దానికి వ్యూహం పన్నిన వారినీ వేటాడుతామని ఆయన అన్నారు. పహల్గాం ఘటన, శ్రీనగర్‌లో భద్రతా చర్యల పటిష్ఠం తదితర అంశాలపై ఆర్మీ చీఫ్‌ జనరల్‌ ద్వివేది, నేవీ చీఫ్‌ అడ్మిరల్‌ దినేశ్‌ త్రిపాఠిలతో చర్చల అనంతరం ఆయన ఈ వ్యాఖ్యలు చేశారు. ‘కొందరు పిరికివాళ్లు మతాన్ని లక్ష్యంగా చేసుకుని చేసిన ఈ ఉగ్రవాద చర్య కారణంగా మంగళవారం అమాయక ప్రజలు ప్రాణాలను కోల్పోయారు. పూర్తి అమానవీయమైన ఈ చర్య మనల్ని తీవ్ర దుఃఖం, బాధలోకి నెట్టేసింది’ అని ఆయన అన్నారు. ఎలాంటి పరిస్థితులనైనా ఎదుర్కోవడానికి సిద్ధంగా ఉండాలని అంతకుముందు ఆయన భద్రతా దళాలను ఆదేశించారు.