40 శాతం సంపద ఒక్క శాతం మంది వద్దే !

ధనవంతుడే ధనవంతుడు అవుతున్నాడు. మధ్యతరగతి మరింత దిగువకు పడిపోతుంటే, పేదలు దారిద్య్రంలో కూరుకుపోతున్నారు. ఆధునిక భారతంలో ఆర్థిక అసమానతలు తీవ్రమవుతున్నాయి. దేశంలో40.5 శాతం సంపద కేవలం జనాభాలో 1 శాతంగా ఉన్న సంపన్నుల వద్దే ఉన్నది. పేదలు మాత్రం మౌలిక అవసరాలనూ తీర్చుకోలేని స్థితిలో కొట్టుమిట్టాడుతున్నారు

• అట్టడుగు జనాభా వద్ద 3 శాతం డబ్బు మాత్రమే
• 2022లో ఏకంగా 46% పెరిగిన అదానీ సంపద
• జీఎస్టీ వసూళ్లలో 64% పేదలు కట్టిందే
• ఆర్థిక అసమానతలపై ఆక్స్‌ఫామ్‌ నివేదిక

ధనవంతుడే ధనవంతుడు అవుతున్నాడు. మధ్యతరగతి మరింత దిగువకు పడిపోతుంటే, పేదలు దారిద్య్రంలో కూరుకుపోతున్నారు. ఆధునిక భారతంలో ఆర్థిక అసమానతలు తీవ్రమవుతున్నాయి. దేశంలో40.5 శాతం సంపద కేవలం జనాభాలో 1 శాతంగా ఉన్న సంపన్నుల వద్దే ఉన్నది. పేదలు మాత్రం మౌలిక అవసరాలనూ తీర్చుకోలేని స్థితిలో కొట్టుమిట్టాడుతున్నారు. అదే సమయంలో జీఎస్టీ వసూళ్లలో 64శాతం పేదలు కట్టిందే కావడం విస్మయపర్చే విషయం. ‘సర్వైవర్‌ ఆఫ్‌ ది రిచెస్ట్‌’ పేరుతో ఆక్స్‌ఫామ్‌ విడుదల చేసిన నివేదికలో ఈ సంచలన విషయాలు బయటపడ్డాయి.

దావోస్‌, జనవరి 16: దేశంలో ఆర్థిక అసమానతలపై ఆక్స్‌ఫామ్‌ సంస్థ ఆందోళన వ్యక్తం చేసింది. కేవలం 1 శాతం మంది వద్దే 40 శాతం సంపద పోగుబడినట్టు వెల్లడించింది. పేదల వద్ద కేవలం 3 శాతం సంపద మాత్రమే ఉన్నట్టు పేర్కొన్నది. అలాగే జీఎస్టీ చెల్లింపుల్లో మూడింట రెండు వంతులు పేదలే చెల్లిస్తున్నారని వెల్లడించింది. సంపన్నులు చెల్లిస్తున్నది కేవలం 4 శాతమే అని తెలిపింది. స్విట్జర్లాండ్‌లోని దావోస్‌లో జరుగుతున్న ప్రపంచ ఆర్థిక సదస్సులో భాగంగా ఆక్స్‌ఫామ్‌.. ‘సర్వైవర్‌ ఆఫ్‌ ది రిచెస్ట్‌’ పేరుతో నివేదిక విడుదల చేసింది.

166కు చేరిన బిలియనీర్ల సంఖ్య..
ఆక్స్‌ఫామ్‌ నివేదిక ప్రకారం.. 2012- 2021 మధ్య భారత్‌లో సృష్టించిన సంపద 1 శాతం మంది చేతుల్లోకే వెళ్లింది. ఈ ఒక శాతం మంది గత రెండేండ్లలో సంపాదించిన ఆస్తి.. మిగిలిన జనాభా సంపాదించిన మొత్తం కన్నా రెట్టింపు. అడ్డుగున ఉన్న 50 శాతం మంది వద్ద కేవలం 3 శాతం సంపద ఉన్నది. ఒక్క 2022లోనే గౌతమ్‌ అదానీ సంపద 46 శాతం పెరిగింది. భారత్‌లో 2020లో 102 మంది బిలియనీర్లు ఉండగా, 2022 నాటికి ఆ సంఖ్య 166కు చేరింది.

టాప్‌-100 కుబేరుల వద్ద 53.88 లక్షల కోట్లు..
ప్రస్తుతం టాప్‌ 100 సంపన్నుల వద్ద ఉన్న సంపద రూ.53.88 లక్షల కోట్లు. ఈ మొత్తం కేంద్ర బడ్జెట్‌కు 18 నెలలకు సరిపడుతుంది. నివేదిక విడుదల సందర్భంగా ఆక్స్‌ఫామ్‌ ఇండియా సీఈవో అమితాబ్‌ బెహర్‌ మాట్లాడుతూ.. ‘దురదృష్టవశాత్తు ధనవంతులకు మాత్రమే దేశం అన్నట్టు భారత్‌ తయారవుతున్నది. దళితులు, ఆదివాసీలు, ముస్లింలు, మహిళలు, అసంఘటిత రంగంలోకి కార్మికులు ఇబ్బందులు ఎదుర్కొంటూనే ఉన్నారు’ అని పేర్కొన్నారు. దేశంలో ఆర్థిక అసమానతలు తొలగిపోవాలంటే అత్యంత ధనవంతులపై వెల్త్‌ ట్యాక్స్‌ విధించాలని కేంద్ర ఆర్థిక మంత్రికి ఆక్స్‌ఫామ్‌ సూచించింది. ఆ ట్యాక్స్‌ను నేషనల్‌ హెల్త్‌ మిషన్‌కు మళ్లించాలని తెలిపింది.

ప్రపంచవ్యాప్తంగా చూస్తే..

• 170 కోట్ల మంది వేతనాలు ద్రవ్యోల్బణం కన్నా దిగువ స్థాయిలో ఉన్నాయి. కానీ, బిలియనీర్ల సంపద రోజుకు 2.7 బిలియన్‌ డాలర్ల చెప్పున పెరుగుతున్నది.
• ప్రపంచంలోని మల్టీ మిలియనీర్లు, బిలియనీర్లపై 5 శాతం పన్ను విధిస్తే 1.7 ట్రిలియన్‌ డాలర్లు సమకూరుతుంది. ఆ మొత్తంతో 200 కోట్ల మందిని పేదరికం నుంచి బయటపడేయొచ్చు.
• ప్రపంచంలో ఆకలితో అలమటిస్తున్న జనాభాలో 60 శాతం మంది మహిళలు, బాలికలే ఉన్నారు.
• అనేక దేశాల్లో బిలియనీర్ల కన్నా పేదలే ఎక్కువ పన్నులు చెల్లిస్తున్నారు.
• ఈ అసమానతలకు ధనవంతులు, కార్పొరేట్లకు దశాబ్దాలుగా ఇస్తున్న పన్ను తగ్గింపులే కారణం.

 

నివేదికలోని కీలకాంశాలు

•  కరోనా ప్రారంభమైనప్పటి నుంచి 2022 నవంబర్‌ నాటికి దేశంలో బిలియనీర్ల సంపద 121 శాతం పెరిగింది.
• సంపన్నులకు విధించిన పన్ను కన్నా పేదలు, మధ్యతరగతిపై విధించిన పన్ను ఎక్కువ.
• 2021-22లో జీఎస్టీలో వసూలైన మొత్తం(రూ.14.83 లక్షల కోట్లు)లో 64 శాతం (దాదాపు మూడింట రెండు వంతులు) దిగువన ఉన్న 50 శాతం మంది పేదలు కట్టిందే. మధ్యలోని 40 శాతం మంది 1/3 వంతు కట్టగా, టాప్‌ 10 సంపన్నులు కట్టిన జీఎస్టీ 4 శాతమే.
• దేశంలోని ధనవంతులకు కార్పొరేట్‌ ట్యాక్స్‌, ఇతర ట్యాక్స్‌ల నుంచి మినహాయింపు దక్కుతున్నది. ఇతర ఇన్సెంటివ్స్‌ అందుతున్నాయి.
• దేశంలోని టాప్‌ 100 మంది ధనవంతులకు 2.5 శాతం పన్ను గానీ, టాప్‌ 10 ధనవంతులకు 5 శాతం పన్ను గానీ విధిస్తే ఆ డబ్బుతో దేశంలోని 15 కోట్ల మంది పిల్లలను చదివించొచ్చు.
• 2017-2021 మధ్య పెరిగిన గౌతమ్‌ అదానీ సంపదపై ఒకసారి విధించే పన్నుతో రూ.1.79 లక్షల కోట్ల నిధులను సేకరించవచ్చు. ఆ మొత్తంతో దేశంలోని ప్రాథమిక స్కూళ్లలో 50 లక్షల మంది టీచర్లకు ఏడాది పాటు జీతాలు ఇవ్వొచ్చు.
• దేశంలోని బిలియనీర్లపై ఒకసారి 2 శాతం పన్ను విధిస్తే రూ.40, 423 కోట్ల ఆదాయం వస్తుంది. ఆ డబ్బుతో పౌష్ఠికాహార లోపంతో బాధపడుతున్న పిల్లలకు వచ్చే మూడేండ్ల పాటు పౌష్టికాహారం అందించొచ్చు.
• టాప్‌ 10 ధనవంతులపై ఒకసారి 5 శాతం ట్యాక్స్‌ విధిస్తే రూ.1.37 లక్షల కోట్లు వస్తాయి. ఇది 2022-2023 బడ్జెట్‌లో కేంద్ర ఆరోగ్య, కుటుంబ సంక్షేమ శాఖ (రూ.86,200 కోట్లు), కేంద్ర ఆయుష్‌ శాఖ (రూ.3,050 కోట్లు)కు కేటాయించిన నిధుల కన్నా ఎక్కువ.
• లింగ అసమానతల విషయానికి వస్తే కార్మికుడు రూపాయి సంపాదిస్తే, కార్మికురాలు 63 పైసలు మాత్రమే సంపాదిస్తున్నది.
• షెడ్యూల్‌ కులాలు, గ్రామీణ కార్మికుల సంపాదనల్లో వ్యత్యాసం చాలా ఉంది. అగ్రవర్ణాలు సంపాదించిన దానిలో షెడ్యూల్‌ కులాలవాళ్లు 55 శాతం మాత్రమే పొందుతున్నారు.
• 2018-19 మధ్య పట్టణ ప్రాంతాలతో పోల్చితే గ్రామీణ కార్మికులు సగం ఆదాయాన్ని మాత్రమే పొందారు.

 

ఈసారీ సంపద పైపైకే..

నైట్‌ ఫ్రాంక్‌ సర్వే

ఈ ఏడాదీ దేశంలోని అపర కుబేరుల సంపద పెరుగవచ్చని ఓ గ్లోబల్‌ సర్వేలో తేలింది. గత ఏడాది ప్రతీ 10 మంది భారతీయ అపర కుబేరుల్లో 9 మంది సంపద పెరిగింది. ఈ క్రమంలో ప్రస్తుత సంవత్సరం కూడా వీరి సంపద మరింత పెరుగవచ్చని ప్రముఖ రియల్‌ ఎస్టేట్‌ కన్సల్టెంట్‌ నైట్‌ ఫ్రాంక్‌ సర్వే వెల్లడించింది. ‘ది వెల్త్‌ రిపోర్ట్‌: ఔట్‌లుక్‌ 2023’ పేరుతో సర్వే వివరాలను నైట్‌ ఫ్రాంక్‌ తాజాగా విడుదల చేసింది. 2022లో 88 శాతం భారతీయ అల్ట్రా హై నెట్‌వర్త్‌ ఇండివీడ్యువల్స్‌ (యూహెచ్‌ఎన్‌డబ్ల్యూ) సంపదలో వృద్ధి కనిపించిందని, ఇందులో 35 శాతం మంది సంపద 10 శాతంపైనే ఎగిసిందని నైట్‌ ఫ్రాంక్‌ తెలిపింది. అభద్రత, అస్థిరత ఎక్కువగా ఉన్నప్పటికీ ఈ స్థాయిలో సంపద పెరుగడం గొప్పేనని అభిప్రాయపడింది. ఈ నేపథ్యంలో ఈ ఏడాది కూడా సంపద పెరిగే అవకాశాలే ఉన్నట్టు చెప్పింది. సర్వేలో 47 శాతం భారతీయ అపర కుబేరుల్లో తమ సంపద నిరుడుతో పోల్చితే ఈ సంవత్సరం 10 శాతానికిపైనే పెరుగుతుందన్న విశ్వాసం కనిపించిందని, మిగతా 53 శాతం మందిలో కూడా కనీసం 10 శాతమైనా పెరుగుతుందన్న ఆశాభావం వ్యక్తమైందని నైట్‌ ఫ్రాంక్‌ వెల్లడించింది.

సర్వే ముఖ్యాంశాలు

• దేశంలోని అపర కుబేరుల్లో ఒక్కొక్కరికి నివాసగృహాలు 5కుపైనే ఉన్నాయి. తొలి, రెండో ఇండ్లకే 37 శాతం సంపదను కేటాయిస్తున్నారు. విదేశాల్లో నివాసంకోసం తమ సం పదలో 15శాతం ఖర్చుచేస్తున్నారు.
• గత ఏడాది యూహెచ్‌ఎన్‌డబ్ల్యూఐల్లో 14 శాతం మంది కొత్తగా ఇం డ్లను కొన్నారు. ఈ ఏడాదీ దాదాపు 10 శాతం మంది ఇంటి కొనుగోళ్లు చేపట్టే సంకేతాలున్నాయి.
• బ్రిటన్‌, యునైటెడ్‌ అరబ్‌ ఎమిరే ట్స్‌, అమెరికాల్లో ఇండ్ల కొనుగోళ్లకు ఎక్కువగా ఆసక్తి కనబరుస్తున్న భారతీయ అపర కుబేరులు. బ్రిటన్‌కే మొగ్గుచూపుతున్న 47 శాతం మం ది. తర్వాతి స్థానాల్లో యూఏఈ (41శాతం), అమెరికా (29శాతం), కెనడా (18శాతం) ఉన్నాయి.
• ఈ ఏడాది పెట్టుబడుల తర్వాత ఆర్ట్స్‌, వాచీలు, లగ్జరీ హ్యాండ్‌ బ్యాగుల కొనుగోళ్లకే ఆసక్తి చూపిస్తున్న 53 శాతం మంది భారతీయ అపర కుబేరులు.