వదలని వాన

బంగాళాఖాతంలో ఏర్పడిన వాయుగుండంతో జిల్లాలో భారీ వర్షాలు కురుస్తున్నాయి. ఎడతెరిపి లేకుండా ఈదురుగాలులతో కూడిన వానలు దంచికొడుతున్నాయి. ఆదివారం రెండో రోజు కూడా ముసురు వదల్లేదు.

• యాదాద్రి జిల్లాలో రెండో రోజూ దంచికొట్టిన వర్షం
• రెడ్‌ అలెర్ట్‌ ప్రకటించిన వాతావరణ శాఖ
• రహదారులు జలమయం.. తేలిన గుంతలు
• రోడ్లపై విరిగిపడిన చెట్లు.. వాహనదారుల ఇబ్బందులు
• ఉధృతంగా ప్రవహిస్తున్న మూసీ నది
• జిల్లా ఆస్పత్రిలోకి చేరిన వర్షం నీరు
• అడ్డగూడూరులో 19.6 సెంటీమీటర్ల వర్షపాతం

యాదాద్రి భువనగిరి, సెప్టెంబర్‌ 1 (నమస్తే తెలంగాణ) : బంగాళాఖాతంలో ఏర్పడిన వాయుగుండంతో జిల్లాలో భారీ వర్షాలు కురుస్తున్నాయి. ఎడతెరిపి లేకుండా ఈదురుగాలులతో కూడిన వానలు దంచికొడుతున్నాయి. ఆదివారం రెండో రోజు కూడా ముసురు వదల్లేదు. రాత్రి నుంచి నాన్‌స్టాప్‌గానే వర్షం కురుస్తూనే ఉంది. దీంతో వాతావరణ శాఖ రెడ్‌ అలెర్ట్‌ ప్రకటించింది. జిల్లాలో రెండు రోజులుగా సూర్యుడు కనిపించడమే గగనమైంది.

సాయంత్రం తర్వాత జర్రంత గరువించింది. ఆకాశం మేఘావృతమై, మేఘాలు దట్టంగా కమ్ముకున్నాయి. భారీ వర్షాలతో రోడ్లన్నీ జలమయమయ్యాయి. అత్యవసరమైతే తప్ప జనాలు ఇంటికే పరిమితమయ్యారు. ఇక పలు మండలాల్లో చెట్లు విరిగి రోడ్లపై పడ్డాయి. కరెంట్‌ స్తంభాలు నేలకొరగడంతో విద్యుత్‌ సరఫరాలో అంతరాయం ఏర్పడింది. వాగులు వంకలు పొంగి పొర్లుతున్నాయి. చెరువుల్లోకి నీరు వచ్చి చేరుతున్నాయి.

అత్యధికంగా 19.6 సెంటీమీటర్ల వర్షపాతం
జిల్లాలోని అన్ని ప్రాంతాల్లో భారీగా వర్షాలు కురిశాయి. అడ్డగూడూరులో అత్యధికంగా 19.6 సెంటీమీటర్ల వర్షపాతం నమోదైంది. పోచంపల్లిలో 17, బీబీనగర్‌, మోత్కూరులో 10, రామన్నపేట, ఆత్మకూరు (ఎం)లో 9.8, నారాయణపురంలో 9.3, చౌటుప్పల్‌లో 9.2, బొమ్మలరామారంలో 9.1, ఆలేరులో 8.1, వలిగొండ, తుర్కపల్లిలో 8, భువనగిరిలో 7.9, రాజాపేటలో 7.8, మోటకొండూరులో 7 సెంటీమీటర్ల చొప్పున వర్షపాతం నమోదైంది. జిల్లాలో సోమవారం కూడా మోస్తరు వర్షాలు కురిసే అవకాశం ఉందని వాతావరణ శాఖ తెలిపింది.

ఉధృతంగా ప్రవహిస్తున్న మూసీ..
ఎగువన కురుస్తున్న భారీ వర్షాలతో మూసీ ప్రవాహం పెరిగింది. జిల్లా మీదుగా వెళ్తున్న మూసీ నది ఉధృతంగా ప్రవహిస్తున్నది. బీబీనగర్‌ మండలంలోని రుద్రవెల్లి వద్ద ఉధృతి పెరుగడంతో పరిస్థితిని స్థానిక అధికారులతో కలిసి కుంభం అనిల్‌కుమార్‌ రెడ్డి పరిశీలించారు. అధికారులు అప్రమత్తంగా ఉండాలని సూచించారు. వలిగొండ మండలంలోని భీమలిం గం కత్వ వద్ద సంగెం-గొల్లెపల్లి గ్రామాల మధ్య ఉన్న లోలెవల్‌ బ్రిడ్జిపై నుంచి నీరు ప్రవహిస్తున్నది. రెవెన్యూ అధికారులు రెండు వైపులా హెచ్చరిక బోర్డులు ఏర్పాటు చేశారు.

జిల్లాలో వర్ష ప్రభావం ఇలా..

• భారీ వానలతో ప్రభుత్వ జిల్లా ఆస్పత్రి జనరల్‌ వార్డులోకి వర్షం నీరు చేరింది. కిటీకిల నుంచి నీరు రావడంతో బెడ్లు తడిసిపోయాయి. దీంతో రోగులు తీవ్ర ఇబ్బందులు పడ్డారు. శానిటరీ సిబ్బంది వరద నీటిని తొలగించారు.
• భువనగిరి మాస్‌ కుంటకు వెళ్లేదారిలో చెట్టు విరిగి రోడ్డుపై పడటంతో వాహనదారులు ఇబ్బందులు పడ్డారు.
• ఆత్మకూరు మండల వ్యాప్తంగా వాగు లు ప్రవహిస్తున్నాయి. ప్రధాన రోడ్లపై చెట్లు విరిగిపడటంతో ప్రయాణికులు తీవ్ర ఇబ్బందులు పడ్డారు. రోడ్లన్నీ గుంతలమయంగా మారాయి.
• ఆలేరు మండలంలోని కొలనుపాకలో పీతాంబరం వాగు రోడ్డుపై నుంచి ప్రవహిస్తున్నది.
• రాజాపేట మండల వ్యాప్తంగా కురుస్తున్న వర్షాలతో చెరువుల్లోకి నీరు వచ్చి చేరుతున్నది.
• మోటకొండూరు మండలంలోని కొండాపూర్‌, ఆత్మకూర్‌ (ఎం) మం డలంలోని కాల్వపల్లి మధ్యలో నుం చి ప్రవహిస్తున్న బిక్కేరు వాగు ను కలెక్టర్‌ హన్మంతు కె.జెండగే పరిశీలిం చి అధికారులను ఆప్రమత్తం చేశారు.
• యాదగిరిగుట్ట మండలంలోని మల్లాపురం వాగులోకి వరద నీరు రావడంతో చెక్‌డ్యాంపై మత్తడి దుంకుతున్నది. యాదగిరిగుట్ట పట్టణంలో మురికి కాల్వలు ఉప్పొంగడంతో లోతట్టు ప్రాంతాలు జలమయమయ్యాయి. బాలికల హాస్టల్‌లో చెట్టు విరిగి పడింది.
• భువనగిరి మండలం అనాజిపురం-భువనగిరి మధ్య ప్రధాన రహదారిపై రోడ్డుకు అడ్డంగా చెట్టుకు విరిగి పడింది. దీంతో వాహనదారులు తీవ్ర ఇబ్బందులు పడ్డారు. కొద్ది సేపు ట్రాఫిక్‌ జామ్‌ అయ్యింది.
• వరంగల్‌ జిల్లా కేసముద్రం, మహబూబాబాద్‌ వద్ద రైల్వే ట్రాక్‌ దెబ్బతినడంతో భువనగిరి మండలం పగిడిపల్లి రైల్వే స్టేషన్‌ నుంచి నడికుడి రైల్వే లైన్‌ గుంటూరుకు దారి మళ్లించారు.
• రామన్నపేట మండలకేంద్రంలోని ఓ ఇంటిపై విద్యుత్‌ స్తంభం విరిగిపడింది. ఇంట్లో ఎవరూ లేకపోవడంతో ప్రాణ నష్టం తప్పింది. వెల్లంకి-సుంకేనపల్లి రోడ్డుకు అడ్డంగా చెట్లు పడిపోవడంతో రాకపోలకు ఇబ్బంది వాటిల్లింది.

వర్షపాతం వివరాలు ఇలా..
మండలం : వర్షపాతం (సెం.మీ.)
అడ్డగూడూరు 19.6
పోచంపల్లి 17
బీబీనగర్‌ 10
మోత్కూరు 10
రామన్నపేట 9.8
ఆత్మకూరు (ఎం) 9.8
నారాయణపురం 9.3
చౌటుప్పల్‌ 9.2
బొమ్మలరామారం 9.1
ఆలేరు 8.1
వలిగొండ 8
తుర్కపల్లి 8
భువనగిరి 7.9
రాజాపేట 7.8
మోటకొండూరు 7