Yadadri Bhuvanagiri : కాంగ్రెస్ విముక్త రాష్ట్రం అయ్యేంత వ‌ర‌కు పోరాటం : మాజీ మంత్రి జ‌గదీశ్‌రెడ్డి

తెలంగాణలో ప్ర‌స్తుతం లాఠీ పాలన.. లూఠీ పాలన నడుస్తుంద‌ని, తెలంగాణ కాంగ్రెస్‌ విముక్త రాష్ట్రంగా అయ్యేంత వరకు పోరాటం చేస్తామ‌ని మాజీ మంత్రి, సూర్యాపేట ఎమ్మెల్యే గుంట‌కండ్ల జ‌గ‌దీశ్‌రెడ్డి అన్నారు. శ‌నివారం భువనగిరి పట్టణ కేంద్రంలో దీక్ష దివస్ సందర్భంగా తెలంగాణ తొలి ముఖ్యమంత్రి కేసీఆర్ చిత్రపటానికి క్షీరాభిషేకం చేశారు. అనంత‌రం జ‌రిగిన కార్య‌క్ర‌మంలో..

యాదాద్రి భువనగిరి, న‌వంబ‌ర్ 29 : తెలంగాణలో ప్ర‌స్తుతం లాఠీ పాలన.. లూఠీ పాలన నడుస్తుంద‌ని, తెలంగాణ కాంగ్రెస్‌ విముక్త రాష్ట్రంగా అయ్యేంత వరకు పోరాటం చేస్తామ‌ని మాజీ మంత్రి, సూర్యాపేట ఎమ్మెల్యే గుంట‌కండ్ల జ‌గ‌దీశ్‌రెడ్డి అన్నారు. శ‌నివారం భువనగిరి పట్టణ కేంద్రంలో దీక్ష దివస్ సందర్భంగా తెలంగాణ తొలి ముఖ్యమంత్రి కేసీఆర్ చిత్రపటానికి క్షీరాభిషేకం చేశారు. అనంత‌రం జ‌రిగిన కార్య‌క్ర‌మంలో ఆయ‌న మాట్లాడారు. నవంబర్ 29 దీక్ష దివస్ మనందరికీ స్వాతంత్ర్యo తెచ్చిన రోజు. దేశానికి ఆగస్టు 15 ఎలాగో మనకు నవంబర్ 29 అలాగే. కేసీఆర్ చావు నోట్లో తలపెట్టి, మొక్కవోని పట్టుదలతో దీక్ష చేసి ఢిల్లీ మెడలు వంచిన రోజు. కేసీఆర్ దీక్ష చేసిన 11 రోజులు ఒక్కో క్షణం ఒక్కో భయంతో గడిపినం. మా నేతకు ఏమైనా అయితే తెలంగాణ ఎటు పోతుందో అని కన్నీరు పెట్టినం. కేసీఆర్ మాత్రం నా శవయాత్ర తెలంగాణ జైత్ర యాత్ర ఒకేసారి జరగాలి అన్నారు. అప్పటిదాకా దీక్ష విరమించేది లేదని పట్టుబట్టారు. ఆనాటి ఆంధ్ర పోలీసులు, నాయకులు ఎన్నో జిమ్మిక్కులు చేసిండ్రు. అయినా అన్నింటిని ఛేదించి తెలంగాణ సాధించినం. హైదరాబాద్ లేకుండా తెలంగాణ అన్నారు. అప్పుడు కేసీఆర్ గుండె లేని మనిషి ఉన్నా లేనట్లే హైదరాబాద్‌తో కూడిన తెలంగాణనే కావాలని పట్టుబట్టారు. ఢిల్లీ గడగడ లాడింది. తెలంగాణ బెబ్బులిలా నిలబడి బరిగీసి కొట్లాడి లక్ష్యం ముద్దడినం.

కాంగ్రెస్ నాయ‌కులు త‌స్మాత్ జాగ్ర‌త్త‌

కేసీఆర్ అంటే తెలంగాణ తెచ్చిన ముఖ్యమంత్రి. తెలంగాణ కోసం చావు అంచుల దాకా, పేగులు తెగే దాకా కొట్లాడిన ఉక్కు మనిషి. అలాంటి కేసీఆర్‌పై ఇప్పుడు కాంగ్రెస్ దొంగలు అవాకులు చవాకులు పేలుతున్నారు. తస్మాత్ జాగ్ర‌త్త‌. కేసీఆర్‌పై నోరు జారితే ఖబడ్దార్. కేసీఆర్ తెలంగాణ సమాజానికి దేవుడు. అందరి గుండెల్లో గూడు కట్టుకున్న మహానేత. కేసీఆర్ సైనికులుగా మేమంతా తెలంగాణ అభివృద్ధికి కట్టుబడి పని చేసినం. ఇప్పుడు వస్తున్న 24 గంటల కరెంట్, మంచి నీళ్లు, పాడి పంటలు, తెలంగాణ ఆదాయం అన్ని కేసీఆర్ సాదించినవే.

కేసీఆర్ మ‌ళ్లీ సీఎం కావ‌డం ఖాయం

తెలంగాణ వాదులపై తుపాకి ఎక్కుపెట్టిన దుర్మాగుడు రేవంత్ రెడ్డి. ఇప్పుడు కాంగ్రెస్ వాళ్లు అనుభవిస్తున్న పదవులన్నీ కేసీఆర్ తెచ్చినవే. కేసీఆర్‌పై కుట్రలు చేయని పార్టీ లేదు. ఎప్పుడూ పిల్లి శాపనార్థాలు పెడతారు. ఇప్పుడు కూడా కేసీఆర్ ఆరోగ్యం బాగాలేదు అని అబద్దాలు ప్రచారం చేస్తున్నారు. కేసీఆర్ మళ్లీ సీఎం కావడం ఖాయం అన్నారు. తెలంగాణ అభివృద్ధి జరిగేది ఒక్క కేసీఆర్ తోనే సాధ్యం అన్నారు.