తడిసిన పంటలను కాపాడుకోండిలా..

ఆరుగాలం కష్టపడి పంటలు పండిస్తున్న రైతులను తుఫాన్‌ ఆందోళనకు గురి చేస్తున్నది. పంటలు చేతికొస్తున్న తరుణంలో మిగ్‌జాం తుఫాన్‌ తీవ్ర నష్టాన్ని కలిగిస్తుందని రైతుల్లో కలవరం మొదలైంది.

• యాజమాన్య పద్ధతులతోనే నష్ట నివారణ
• తగిన జాగ్రత్తలు తీసుకోవాలంటున్న వ్యవసాయ నిపుణులు

ఆరుగాలం కష్టపడి పంటలు పండిస్తున్న రైతులను తుఫాన్‌ ఆందోళనకు గురి చేస్తున్నది. పంటలు చేతికొస్తున్న తరుణంలో మిగ్‌జాం తుఫాన్‌ తీవ్ర నష్టాన్ని కలిగిస్తుందని రైతుల్లో కలవరం మొదలైంది. ప్రస్తుతం కొన్ని ప్రాంతాల్లో వరి పంటలు కోత దశలో ఉండగా, కొన్ని చోట్ల కోతలు పూర్తయి కొనుగోలు కేంద్రాల్లో ధాన్యం రాసులు ఉన్నాయి.

కూలీల కొరతతో పత్తి మొక్కలపైనే ఉండగా.. మిరప కాత దశలో ఉన్నది. ఈ నేపథ్యంలో తుఫాన్‌తో పంటలు నష్టపోకుండా రైతులు తగిన జాగ్రత్తలు తీసుకోవాలని, సరైన యాజమాన్య పద్ధతులు పాటిస్తే నష్టాన్ని నివారించవచ్చని వ్యవసాయ శాస్త్రవేత్తలు సూచిస్తున్నారు.

వరి పంటలో తీసుకోవాల్సిన జాగ్రత్తలు

• వర్షంలో తడిసిన గింజలు రంగు మారడం, సరిగా మొలకెత్తకపోవడం, మిల్లింగ్‌లో ఎక్కవ నూక రావడం, నాణ్యత తగ్గడంతోపాటు రేటు కూడా
  తగ్గుతుంది.
• ధాన్యం దెబ్బతినకుండా ఉండేందుకు పొలంలో నీరు నిలిచిన చోట కాల్వలు తీసి నీటిని
  బయటికి పంపాలి.
• ఒక వేళ వర్షం ఎక్కువై నీరు నిల్వ ఉంటే నాలుగైదు దుబ్బులు కలిపి నిలబెట్టి కట్టలు కట్టాలి. దీంతో వరి దుబ్బులు కిందపడకుండా ఉంటాయి.
• లీటరు నీటిలో 50 గ్రాముల ఉప్పు కలిపి పడిపోయిన పైరుపై పిచికారీ చేసుకోవాలి. దాంతో గింజ రంగు మారడం తగ్గి మొలకెత్తకుండా ఉంటాయి.

మిరప పంటలో చేపట్టాల్సిన చర్యలు..

• మిరప పంట ప్రస్తుతం కాయ దశలో ఉన్నది. మబ్బులతో కూడిన వాతావరణం వల్ల మిరప పంటను తెగుళ్లు అధికంగా ఆశించే అవకాశం ఉంటుంది. వర్షాలు అలాగే కురిస్తే కాయ కుళ్లు తెగులు, కొమ్మ ఎండు తెగులు ఉధృతి పెరిగే అవకాశం కూడా ఉంటుంది. ఈ నేపథ్యంలో రైతులు ఈ జాగ్రత్తలు తీసుకోవాలి.
• లీటరు నీటిలో మూడు గ్రాముల కాపర్‌ ఆక్సీక్లోరైడ్‌, 1గ్రాము కార్బెండిజం కలిపి మొక్కల మొదల్లో పోయడం వల్ల ఎండు తెగులు తుగ్గుతుంది.
• కొమ్మ ఎండు తెగులు నివారణకు లీటరు నీటిలో ఒక గ్రాము ప్రొపికోనజోల్‌, డైఫెస్కజోల్‌, కాపర్‌ ఆక్సీక్లోరైడ్‌, కార్బెండిజం, మాంకోజెబ్‌ వంటి మందులు మోతాదు ప్రకారం మార్చి మార్చి పిచికారీ చేయాలి.
• బ్యాక్టీరియా ఆకుమచ్చ తెగులు నివారణకు కాపర్‌ ఆక్సీక్లోరైడ్‌, స్ట్రెప్టోసైక్లిన్‌ మందులు కలిపి పిచికారీ చేయాలి.
  పత్తి పంటలో తీసుకోవాల్సిన జాగ్రత్తలు
• చేనుపై తడిసిన పత్తిని తీయకుండా ఎండిన తర్వాతనే ఏరాలి. ప్లాస్టిక్‌ పట్టాలపై మండెలుగా వేసి రెండు, మూడు రోజులు ఆరబెట్టాలి. ఇలా చేయడం వల్ల పత్తిలో తేమ శాతం తగ్గి గింజ గట్టిపడి శుభ్రంగా ఉంటుంది.
• ఎనిమిది శాతం తేమ ఉన్న పత్తిని గోనె సంచుల్లో తొక్కి తేమ తగలని చోట నిల్వ చేయాలి. దీంతో పత్తి రంగు మారకుండా ఉండి ధర ఎక్కువగా వచ్చే అవకాశం ఉంటుంది.

రైతులు అప్రమత్తంగా ఉండాలి

పంటలు చేతికొస్తున్న తరుణంలో ముంచుకొస్తున్న తుఫాన్‌తో రైతులు అప్రమత్తంగా ఉండాలి. వర్షం తగ్గిన తర్వాత మొక్కలను ఎప్పటికప్పుడు పరిశీలిస్తూ శాస్త్రవేత్తలు, వ్యవసాయ శాఖ అధికారులను సంప్రదించాలి. అవసరమైతే పంటల వద్దకు తీసుకెళ్లి వారి సలహాలు, సూచనల మేరకు మోతాదు ప్రకారం మందులు పిచికారీ చేయాలి.

– దొంగరి నరేశ్‌, కేవీకే శాస్త్రవేత్త, గడ్డిపల్లి