ఏ పంట తర్వాత ఏ పంట వేయాలంటే!

• పంటల మార్పిడితో భూసార వృద్ధి
• రోగకకారక జీవుల కట్టడికి ఇదే మంచిది
• వ్యవసాయ శాస్త్రవేత్త సలహాలు, సూచనలు

గరిడేపల్లి, మే 31 : ఒకే రకమైన పంటలను సాగు చేయడం వల్ల పొలాల్లో భూసారం తగ్గుతుంది. రోగాలను కలిగించే పురుగుల సంఖ్య బాగా పెరిగి దిగుబడి తగ్గుతుంది. పంటల మార్పిడి వల్ల భూమిలోని పోషకాలు సంవృద్ధిగా అందుతాయి. పంటల మార్పిడితో కలిగే ప్రయోజనాలు ఇలా ఉన్నాయి.

• ఒక పంటను ఒకే పొలంలో వరుసగా పండించడం వల్ల చీడపీడల ఉధృతి అధికం కావడానికి అనుకూల పరిస్థితులు ఏర్పడుతాయి.
• పురుగు జీవిత చక్రం పూర్తి చేసుకొని తీవ్రమైన హాని కలిగించే స్థితికి చేరుకుంటుంది.
• పంట మార్పిడి చేసినప్పుడు పురుగు జీవిత చక్రం ఛేదించబడుతుంది. ఎందుకంటే ఒక పంటపై ఆశించే పురుగులు మరొక పంటపై ఆశించడం సాధారణంగా జరుగదు.
• వేగంగా వృద్ధి చెందే కొన్ని రకాల పురుగులను పంట మార్పిడి వల్ల అదుపులో పెట్టవచ్చు
• ఒకే లోతు వ్యవస్థ కలిగిన పంటలను ఉదాహరణకు పత్తి, మిరప మొదలైన పంటలను మార్పిడి చేయకుండా సాగు చేయడం వల్ల ఒకే లోతు పొరల నుంచి పోషకాలు తీసుకోవడంతో నేల నిస్సారమవుతుంది.
• వరి, వేరుశనగ, జొన్న, మొక్కజొన్న వంటి పైర్లు నేల పై పొరల నుంచి పోషకాలు తీసుకుంటాయి.
• నేల భౌతిక లక్షణాలు, స్వభావం దెబ్బతినకుండా ఉండడానికి, చీడపీడల అభివృద్ధిని నిరోధించడానికి పంట మార్పిడి తప్పక చేయాలి.
• అప్పుడప్పుడు అవసరాన్ని బట్టి పశుగ్రాసం కోసం గడ్డిజాతి పైర్లు, భూసారాన్ని పెంచడానికి పచ్చిరొట్ట పైర్లు వేసుకోవచ్చు.

పంటలుఇలా వేయాలి

• వరి తర్వాత మినుము, పెసర, శనగ వేయడం వల్ల సుడిదోమ, టుంగ్రో వైరస్‌ను నివారించవచ్చు.
• చెరకు తర్వాత వరి వేయడం వల్ల వేరు పురుగును తగ్గించొచ్చు. అలాగే వరిలో దోమపోటు నివారించవచ్చు.
• పత్తి వేసిన పొలంలో జొన్న, మొక్కజొన్న, నువ్వులు, మినుము వేస్తే లద్దె పురుగు, పచ్చ పురుగులను నివారించవచ్చు.
• జొన్న, మొక్కజొన్న తర్వాత కందిని సాగు చేస్తే కాయతొలుచు పురుగు ఉధృతి తగ్గుతుంది.
• వరిని సాగు చేసే పొలంలో ముందుగా పప్పుధాన్యాలను సాగు చేయడం వల్ల నేల సారవంతమవుతుంది.
• వేరుశనగలో ఆకుముడుతను నివారించేందుకు పప్పుజాతికి చెందిన పైర్లు వేయాలి.
• కంది, మిరప పంటల్లో ఎండు తెగులు నివారణకు జొన్న, మొక్కజొన్న పంటలు సాగు చేయాలి.
• నులి పురుగు సమస్య అధికంగా ఉన్న ప్రాంతాల్లో వేరుశనగ, మిరప, పొగాకు, వంగ పైర్ల సాగును కొన్ని పంట కాలాల వరకు ఆపాలి.
• ఆహార పంటలైన వరి, జొన్న, మొక్కజొన్న, సజ్జ పంటలను పప్పుజాతి పంటలైన పెసర, మినుము, వేరుశనగ సాగుతో మార్పిడి చేయాలి.
• ఆహార వాణిజ్య పంటలను పశుగ్రాస పైర్లతో ఒకసారి, పప్పుజాతి పైర్లతో మరోసారి మార్పిడి చేయడం లాభదాయకం.

పంట మార్పిడితో రోగాలకు అడ్డుకట్ట

రైతులు ఒకే రకమైన పంటలు సాగు చేయడం వల్ల ఆ పంట మొక్కలకు అవసరమైన పోషకాలు తక్కువవుతాయి. రోగకారక పురుగుల ఉధృతి పెరిగి దిగుబడి తగ్గుతుంది. వరుసగా ఒకే పంటను కాకుండా వివిధ రకాల పంటల సాగుతో పురుగుల జీవిత చక్రాన్ని నిలిపివేయవచ్చు. దాంతో రైతులు మంచి లాభాలను పొందగలుగుతారు.
– దొంగరి నరేశ్‌, కేవీకే శాస్త్రవేత్త, గడ్డిపల్లి